“Dagiti Patriarka: Asinoda ken No Apay a Napateg Daytoy,” Para iti Pigsa dagiti Agtutubo, Peb. 2022.
Binulan a Mensahe iti Para iti Pigsa dagiti Agtutubo , Pebrero 2022
Dagiti Patriarka
Asinoda ken No Apay a Napateg Daytoy
Nalabit a nangngegamon ti maipapan kada Abraham, Isaac, ken Jacob. Mabasatayo maipapan kadakuada iti Libro ni Mormon ken awan duadua a mangngegamto ti ad-adu pay maipapan kadakuada bayat ti panagadalmo iti Daan a Tulag itoy a tawen. Babaen iti panangted iti adu unay nga atension kadakuada, nalabit a napategda, di kadi? Ngem mabalin a salsaludsodem iti bagim, “Apay a napateg ita dagiti tallo a lallaki a nagbiag rinibribun a tawen ti napalabas?” No kasta, ti tulbek iti dayta a sungbat agpannuray kadagiti agnanayon a katulagan ken naikari a bendision nga inted ti Dios kadakuada.
Abraham
Dagiti panangiladawan ni Jarom Vogel
Maysa a naindaklan a propeta ni Abraham. Nalinteg ken managtungpal kadagiti bilin ti Dios.
Nabuniagan, immawat iti priesthood, ken nailantip iti asawana a ni Sara para iti kinaagnanayon.
Nakitulag ti Dios ken ni Abraham a dumakkelto ti kaputotanna ken addaandanto kadagiti isu met a bendision nga inawatna.
Idanondanto ti pakabuklan ti ebanghelio ni Jesucristo kadagiti pagilian ti daga.
Isaac
Ni Isaac ti anak da Abraham ken Sara.
Imbaga ti Dios ken ni Abraham a mangisakripisio ken ni Isaac. Inayat ni Abraham ni Isaac ngem pinilina ti agtungpal iti Dios. Kasakbayan la unay ti panangisakripisio ni Abraham ken ni Isaac, imbaga ti anghel ken ni Abraham nga agsardeng. Ti kinatallugod da Abaham ken Isaac nga agtungpal iti Dios ket simboliko ti Pannubbot ti Bugbugtong nga Anak ti Dios.
Naikari ken ni Isaac dagiti isu met la a bendision kas iti naikari ken ni Abraham.
Jacob
Kas met laeng iti ama ken lelongna, napudno ni Jacob iti Dios.
Gapu iti kinapudnona, binaliwan ti Apo ti nagan ni Jacob iti Israel, a kayatna a sawen “maysa nga agballigi iti Dios” wenno “bay-an nga agballigi ti Dios” (kitaen iti Bible Dictionary, “Israel”).
Addaan ni Jacob iti 12 nga annak a lallaki. Naam-ammo dagitoy nga annak a lallaki ken dagiti pamiliada kas dagiti tribu ti Israel.
Napabaro ti katulagan nga inaramid ti Dios ken ni Abraham ken ni Jacob ken dagiti annakna.
Dagiti Patriarka ken Dakayo
Kas maysa a miembro ti Simbaan, pasetka ti kaputotan da Abraham, Isaac, ken Jacob. Mayaplikar kenka ti katulagan nga inaramidda iti Dios!
Addaanka iti bendision ken pagrebbengan a mangiburay iti pammaneknekmo maipapan iti Mangisalakan ken mangibinglay iti ebanghelio.
Maawaganka pay a mangawis iti tunggal maysa nga agaramid ken agtungpal kadagiti katulagan ken umawat kadagiti ordinansa ti kinsaserdote. Kinuna ni Presidente Russell M. Nelson a paset daytoy amin ti pannakaummong ti Israel, a “daytoy ti kapatgan a banag a mapaspasamak iti daga iti agdama” (“Hope of Israel,” [worldwide youth devotional, Hunio 3, 2018], 8, ChurchofJesusChrist.org).
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, February 2022. Ilokano. 18344 864