“Kot a ereni kich Sipwe Papatais,” Liahona, February 2021
Porous ren Liahona Iteiten maram, February 2021
Kot a ereni kich Sipwe Papatais
Jises Kraist a fori ewe nenien apiru ren papatais seni emon mi wor an mumuta seni Kot.
Nupwen sise mwo kon sineiochu tichikin porousen manauen Jises Kraist, sia sinei pwe a papatais nupwen A 30 ierin (nengeni Luke 3:23). Ikei ekkoch mettoch sia kaeo usun papatais seni An nenien apiru.
Ren Emon me Emon Aramas
Ika pwe sia wate me miritino ach sipwe weweiti sokofesenin nefinen pung me mwan, Samach won Nang a mochen sipwe papatais (nengeni Doctrine and Covenants 18:42). Jesis mi unusoch, nge A pusin finata an epwe papatais pwe epwe aponueta an Kot kewe annuk (nengeni Matthew 3:13–17; 2 Nifai 31:7). Pwan mo ekkewe rafen mano ra pwan tongeni etiwa papatais. Sia awora faniter ren ach sia papatais non ekkewe tempel. (Nengeni Doctrine and Covenants 128:15–18.)
Epwe fis seni ewe Mumuta an Kot
Jises ese chok papatais seni emon. Pwe a feino ngeni tetenin pwin we John, ewe mi wor ren ewe pochokunen mumuta seni Kot. Mwirin an Kraist we a mano me Noun kewe chon kuno ra ninino, ena pochokun me mumuta seni Kot ese chiwen wor won ei fonufan. Iwe, non 1829, John sou papatais a pwa ngeni Joseph Smith me ngeni i ewe mumuta ren papatais non iten Kot. Pokiten ena niwinsefanito, sia tongeni papatais ren ena chok pwan mumuta ikenai.
Ruu-Anen Pwon
Papatais a pachenong ruu-anen pwon, ika pwon mi pin, nefinach me Kot. Sia pwon:
-
Ach sipwe wata iten Jises Kraist woch.
-
Sipwe chechemeni I fansoun meinisin.
-
Sipwe aponueta an kewe annuk.
Niwinin ach aneasosich, Kot a pwon pwe Ngunun We epwe chok nonomw rech fansoun meinisin. Ekkewe Kapasen ewe iotekin sakrament a achema ngeni kich usun ei pwon iteitan wiik. (Nengeni Doctrine and Covenants 20:77, 79.)
Angei ewe Ngun mi Fel ina ew auchean kinikin me non ewe Papatais
Mwirin an Jises we papatais, ewe Ngun mi Fel a pwato non usun napapen emon muro (nengeni 2 Nifai 31:8). Ikenai, mwirin aramas ra papatais, ra efeioch ren ewe nifangen Ngun mi Fel. Wewen pwe ra angei eu feioch mi murino ra kokko ngeni ar repwe angei ewe nifangen omusomusen tipis me ewe Ngun mi Fel (nengeni 2 Nifai 31:17). Ewe Ngun mi Fel a tongeni anisi kich seni osukosuk, aururu kich, emweni kich ne fori mi pung, me anisi kich ach sipwe mefi an Kot tong (nengeni Doctrine and Covenants 39:6).
Sia Tongeni Ach Sipwe Aier Fansoun Meinisin
Kot a sinei pwe sipwe mwanino. Ina mwo ika sia fokkun achocho, sipwe fokkun tipis me nipwakingaw ngeni ach kewe pwonen papatais. Nge A mut ngeni kich meinisin ach sipwe aier. (Nengeni Doctrine and Covenants 18:13.) Iteitan ran sia tongeni achocho ngeni ach sipwe omusomus me apungu met mi mwan. Sia tongeni iotek me tingor ngeni Kot epwe omusakicheno. Nge, nupwen sia angei ewe sakrament ren tipetekisonen netipach, ewe Ngun mi Fel a tongeni nonomw rech (nengeni 3 Nifai 18:11).
Met Pukefel a Apasa usun Papatais?
Sam me In repwe anisi nour kewe ar repwe moneta ngeni papatais (nengeni Doctrine and Covenants 68:25).
Ekkewe ra kukun seni 8 ier ese namot ar repwe papatais (nengeni Moronai 8).
Nupwen sia papatais, sia pwon ngeni “netipeta ren ekkewe ra netipeta; … aururu ekkewe ra mochen aurur, me oupwe chon pwarata usun Kot fansoun meinisin me non mettoch meinisin, me non neni meinisin” (Mosaia 18:9).
© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Translation of Monthly Liahona Message, January 2021.Chuukese.17463 901