Itulau i le lotoifale
Faamanuiaina e se Togalaau Aina i le Taimi o le Taofiga se Aiga Fiti ma Isi
Maua e le ulugalii le faamalieina i le totoina lea o a latou lava meaai.
O le pesi o le faama’i o le KOVITI-19 i le lalolagi ma le tapunia o le tele o nofoaga ua suia ai le olaga o aso uma i ni auala ese’ese. O le lē faataunu’uina o le tele o fuafuaga tetele, le faaitiitia o feso’otaiga o aso uma, ma le faanofo’esea ua avea ma mea faigata ona taulimaina, ae peita’i, e toatele tagata ua latou maua ni auala fou e a’oa’o ai, toto ma faamanuiaina ai.
O Sulueti Kama o lo’o auauna o se failautusi o le Peresitene o le Misiona a Fiti i Suva, o le Ekalesia a Iesu Keriso o le Au Pa’ia o Aso e Gata Ai, ma isi mea e tele e pei o le avea ma Faiaoga o le Inisitituti (a’oa’oga faale-lotu), Faatonu o Feso’ota’iga a le Ekalesia, ma se tagata e fiafia e faamalositino i le Zumba . . . ae le’i avea lava ma se tagata tola’au.
I le tele o lona taimi sa i ai i le taimi o le taofiga ona o le KOVITI-19, sa ia totoina ai ni fuala’au lanumeamata.
Ia Me 2020, na o atu ai o ia ma lona to’alua mai Suva aga’i atu i Nadi e siaki ni uo ua le toe faigaluega. E fai se faatoaga tele lava a lā uo nei e tōtō ai a latou lava meaa’i. A’o latou asiasi atu faatasi i se faamiliga, na iloa atu e Sulueti laina o fatu faamili. Ma sa vave ona pipi’i atu i ai. Na amata ai iina lona fiafia e fai togalaau.
O apa o faamiliga, tamato, kapisi, ma isaraelu na ia avea i lona fale. Na tonu ia te ia o le a totoina i totonu o apa ma o lea ua i ai nei le aofa’iga o apa i le 84 o fualaau aina, e i ai kukama, pi Farani, lakisi, ma fualaau faamanogi meaai e pei o le silano, tili, orekano ma polo feū.
Sa ia a’oa’oina e uiga i palapala e sili ona lelei mo faato’aga, su’esu’e i vailaau mo manu nini’i ma fetufa’ai faamatalaga ma uo o ē e fai faato’aga. Na fauina e lona to’alua se fale laau mo ia.
“O se mea sili lenei ua tupu ia i maua, ua ma maua se mea e fiafia i ai ma se tomai ma te le’i maua muamua ma ua le mafai ona ave’ese atu,” o le tala lea a Sulu.
O le itulau Facebook a Sulu e tumu i tala ma e masani ona aofia ai ma le tele o ata o ana laau ma ni faamatalaga e pei o nei: “A mae’a le itula o le faamalositino i le Zumba i le 5 i le taeao, e lē mafai ona ou faatali i lo’u o’o atu i le fale e siaki a’u laau ma toe toto nisi laau ia tele. Matua’i o’u fiafia lava e vaai atu i a’u laau faamanogi meaai—orekano ma tili ua totogo a’e faatasi ma kukama . . . faato’a uma ona toto atu isi fatu i le aso To’onai.”
“O aso uma ou te naunau ai lava e fia vaai i a’u laau ma vaai i lo latou ola tuputupu a’e, e ui lava o lea faato’a ou galue ai i le taeao.”
O a latou mea e fai i nei fualaau aina uma pe a o’o i le taimi e selesele ai? Ua iloa lelei lava e Sulu le tali o le mea lena. “Ua na o lo’u to’alua lava ma a’u e iloa ma o le a matua fai ia tele atu nai lo mea ma te mana’omia, ma faailoa atu i le Epikopo. Ma te tatalo ia manuia le ma faatoaga ina ia mafai ona foa’i atu fua mo tagata o lo’o mana’omia.”