Na’o Tusiga Faatekinolosi
Tatalaina o le Faitotoa i Faaaliga Faaletagata Lava Ia
Sa i ai taimi sa ou lagona ai le pei o loo ou tuitui i se faitotoa o loo tapunia ma o le a le tatalaina.
I nai tausaga ua mavae, sa valaaulia ai e Peresitene Russell M. Nelson ma le mafaitaulia o taitai o le Ekalesia i tatou e saili atu i faaaliga faaletagata lava ia ma aoao ia iloa le siufofoga o le Faaola ina ia mafai ona “faalogo ia te ia” (Talafaasolopito—Iosefa Samita 1:17).
Ae mo a’u lava ia, o faaaliga faaletagata lava ia o nisi taimi e fenumiai teisi ai. Ou te fiafia i le mafai lea ona fetalai tuusao mai le Atua ia te au, ae i le avea ai ma se talavou matua sa ou feagai ma le tele o filifiliga tetele, sa ou lagonaina i nisi taimi e pei o loo ou tu’itu’i i le faitotoa o le lagi ae leai se tali.
I nei taimi, sa ou faia ai lava ia mea faavae—o le faitauina o tusitusiga paia, fai au tatalo, alu i le lotu, ma le tausia o poloaiga—o le a la le mea o loo misi ia te a’u?
I nai masina ua mavae, sa ou iloa ai o nisi taimi o le mauaina o faaaliga e manaomia ai se taumafaiga sili atu i la tatou vaega. O nisi nei o auala sa ou iloa e alu ai i le maila faaopoopo.
1. Ia Filemu ma Faaavanoa se Taimi e Faalogo ai
O le filemu o le faatogafiti lea mo au. E i ai lava pea sa’u lisi o mea e fai e-leai-se-iuga. E ui ina ou faia ni mea se tele, ae e masani lava ona ou popole ma lofituina au i mea uma ua ou tuuto atu i ai au lava ia. A o ou saili mo auala e faalogo atili ai i faaaliga faaletagata lava ia, sa ou iloa ai sa ou ola i lou olaga e pei o Mareta nai lo o Maria.1 Ou te le’i tuuina atu lava se taimi ia te au e filemu ai. I le mae’a ai o le faitauina o lauga o le konafesi lea e fautuaina ai i tatou e fatu se nofoaga ma se taimi e faalogo soo ai i le Agaga, sa ou iloaina e tatau ona ou faia lena mea.2 Ua faia nei loa a’u suesuega o tusitusiga paia o le taeao i se kesi (nai lo o lo’u moega), ma ou te faaaoga ai a’u tusitusiga paia ina ia aua nei faalavelaveina a’u e la’u telefoni.
2. Faaalu se Taimi Faamoemoeina i le Malumalu
Ua faamanuiaina au e nofo latalata i ni nai malumalu, ma sa lelei lava lo’u auai atu i vaiaso taitasi. E toatele le Au Pulega Aoao ua aoao mai o le tapuai i le malumalu e mafai ona fesoasoani ia i tatou ia ogatasi atili ai ma le Agaga,3 o lea sa ou manatu ai ua leva lava ona ou faia. Ae e lei oo mai lava tali. A o ou tilotilo atu i ou mausa, sa ou iloaina sa i ai se vaega e moomia le faaleleia: E masani ona ou tulimoe i le malumalu. Sa ou tauina atu i au uo, “Afai e faapea mai Elder Dieter F. Uchtdorf, o le ‘moe i le lotu o se tasi lea o moe sili ona maloloina i lo isi,’4 ona tatau lea ona sili atu le moe o le malumalu!” ma sa ou fetuutuunai lo’u fiamoe e ala lea i le mafaufau faapea o le malumalu e matuai toafilemu lava ma e le mafai ona ou taofia. Ae o le malumalu e le o se nofoaga e malolo ai. Ou te alu i le malumalu e galue—e faatino ai sauniga sui lea e tuuina atu ai i tagata o lo’u aiga ua maliliu le avanoa e maua ai le ola e faavavau.5
Sa ou iloaina ua oo i le taimi ou te “ala mai ai” (Alema 32:27) ma ia sili atu ona fuafuaina i lau tapuaiga i le malumalu. Ou te taumafai e saunia au lava faaleagaga ma faalemafaufau ae ou te lei alu i le malumalu nai lo le vaai pe na o se isi vaega o au taumafaiga masani.
3. Auai i le Galuega o Talafaasolopito o Aiga
Ua atulasi ona uunaia i tatou e taitai o le Ekalesia i le tele o taimi ina ia punouai ai i le galuega o talafaasolopito o aiga ma ua fesootai ai le tele o faamanuiaga i lo tatou auai ai i lenei taumafaiga.6 Peitai, o le toatele o o’u tua’a ua faamaeaina uma o latou sauniga o le malumalu. O a la nisi mea e mafai ona ou faia? E mafai ona ou aoao e uiga i le olaga o tagata taitasi na ou aumaia i le malumalu—e vaai moni lava ia i latou o se tagata moni ma o se tasi o lo’u aiga. Sa amata foi ona ou faamaumauina lo’u lava talafaasolopito o le olaga, faasino igoa, ma faasoa atu ni tala musuia mai le talafaasolopito o lou aiga.
4. Faasoa Atu le Talalelei
Pe a ou faasoaina atu le talalelei—i le tagata e le auai ma le au paia—e masani lava ona ou aoaoina au lava i se mea fou i le iuga. Atonu ua e oo i lenei mea i lau misiona po o le taimi e te saunia ai se lesona o le Aoga Sa. E toatele taitai o le Ekalesia na faamautuina o le folafolaina o lo tatou faatuatua ma le faamalosiauina o le faamaoni i isi, o le a fesoasoani ia i tatou e maua atili ai faaaliga patino.7 Pe a tatou “tautala i lalo o le musumusuga a le Agaga Paia,” e mafai ona tatou “aoaoina e le aunoa se mea mai le mea [ua tatou] fai mai ai.”8 Ua amata ona ou faasoa atu le talalelei i luga o ala o faasalalauga faale-agafesootai, ma ou te aumaia i talanoaga i aso uma ma a’u uo ma lo’u aiga.
5. Iloaina o Faaaliga Faaletagata Lava Ia e Oo Mai i lea Laasaga ma lea Laasaga
O nisi tagata e maua ni tali manino pe a latou fesili atu i le Alii e uiga i filifiliga tetele i o latou olaga, ae mo au lava ia, e foliga mai e filemu le Tama Faalelagi e uiga i a’u fesili tetele. Ona ou iloa ai lea atonu o loo ou fai atu ni fesili sese.
E finagalo le Tama Faalelagi e talanoa mai ia te au,9 ae o loo Ia tuuina mai tali ia te au i “lea fuaitau i luga o lea fuaitau,” e lei i ai uma i le taimi e tasi.10 Sa ou iloaina sa ou tulimatai atu i luma i le faaiuga o lau malaga—o le faamoemoe i ni faailoga maoae o le a foia ai o’u faafitauli uma11—ae o le a ou fesili atu e uiga i ai, “O le a le isi laasaga e sosoo ai?”
Ou te le’i mauaina lava tali uma i au fesili tetele, ae ua ou iloa o loo faasolosolo malie lava ona taiala au e le Atua i nei tali tetele, e tasi le laa i le taimi. O lenei malamalamaaga ua faamalosia ai lo’u faatuatua ma talitonu o le a Ia faatumauina le taitaiina o a’u i le itu sao.
Tatalaina o le Faitotoa i Faaaliga Faaletagata Lava Ia
Pe a tatou mulimuli ia Iesu Keriso ma maua le meaalofa o le Agaga Paia, e mafai ona tatou maua faaaliga patino i aso taitasi. Ae e masani lava ona tatou le iloa pe faaalu se taimi e iloa ai lona faatasi mai pea ma le uunaiga o loo siomia ai i tatou. Peitai, ua faasolo ina fenumiai le lalolagi, ma e pei ona saunoa Peresitene Nelson, “O le a le mafai ona ola faaleagaga e aunoa ma le taialaina, taitaiina, faamafanafana, ma le uunaiga faifai pea a le Agaga Paia.”12
O le tele lava o le mafai ona tatou faalogo ma iloa le Agaga, o le lelei foi lena o le saunia o i tatou e fetaiai ma faatoilalo o tatou luitau. E mafai e i tatou uma ona saili ni auala e o ai i maila faaopoopo e maua ai faaaliga faaletagata lava ia i o tatou olaga, pe o le anapogi, auauna atu i isi, po o le faia o soo se tuufaatasiga o mea e faalatalata atili atu ai i tatou ia Keriso. O le faitotoa i tali a le lagi atonu e le matala atoa mai i le mavae ai o se minute—po o se masina—o le tuitui, ae afai tatou te taumafai ia faamoemoeina e valaaulia ma faalogo i le Agaga, o le a mafai ona tatou faalogo i Lona siufofoga filemu o tau mai le mea e maua ai le ki.