5 Mautinoa i se Lalolagi Lē Mautonu

Saunia e Meg Yost

O nei upumoni e lima e mafai ona fesoasoani ia te oe i soo se mea.

E seasea lava ona mulimuli le olaga i se fuafuaga. Ua tumu i femilosaiga, feliuaiga, ma mea e faateia ai tagata uma. E mafai la faapefea ona tatou saunia mo le lumanai pe a tatou le iloa le mea o le a aumaia?

O le mea e laki ai, e i ai nai mea e mafai lava ona tatou faalagolago ai pea. O upumoni nei e le mafai ona suia. E mafai ona latou taitaia a tatou filifiliga ma uunaia i tatou e agai i luma, e tusa lava pe foliga mai ua pogisa ma lē mautinoa le ala i luma atu.

E alofa le Tama Faalelagi ia te oe.

Po o le a lava le mea e tupu i le olaga, e alofagia lava oe. E matuai taua tele oe i le Tama Faalelagi (tagai Mataupu Faavae ma Feagaiga 18:10). E taua oe i lalolagi!¹

Atonu e te le lagonaina le taua tele. Atonu e te lagona le nutimomoia ma le tuuatoatasi ma le fefe. Atonu e te lagona le le agavaa. Ae ina ua faamalamalama mai e Sister Joy D. Jones, le Peresitene Aoao o le Peraimeri, o le tāua ma le agavaa e le tutusa.² E tusa lava pe tatou te agasala, ua matua taua lava i tatou. O le tasi lena o mafuaaga na faatino ai e le Faaola le Togiola (tagai Mataupu Faavae ma Feagaiga 18:11–13). Aua Na te silafia ma alofa ia te oe, ua Ia saunia le ala mo oe e te toe mamā ai.

O loo i ai se fuafuaga a le Tama Faalelagi mo oe.

Ua e i ai i le lalolagi mo se faamoemoega: ia avea e faapei o le Tama Faalelagi ma Iesu Keriso ma toe foi atu e nonofo faatasi ma i La’ua. O le sini lena a le Atua mo oe, ma o le a Ia fesoasoani ia te oe ia ausia!

E le faapea o mea o le a faigofie i taimi uma; o le a tatou feagai pea ma luitau. Ae e mafai ona tatou mautinoa “o le a galulue faatasi mea uma mo le lelei o e e savavali sa’o” (Mataupu Faavae ma feagaiga 100:15).

O lana fuafuaga mo lou olaga atonu e foliga ese mai i lau fuafuaga, ae e mafai ona e faatuatuaina o lana fuafuaga o le a avea ma ou manuia ma taitai oe i le fiafia e faavavau. Faitau tusitaiala i le olaga: o tusitusiga paia, o lou faamanuiaga faapeteriaka, ma upu a perofeta o aso nei. O le a latou fesoasoani ia te oe ia e malamalama lelei i Lana fuafuaga mo oe.

Ona mulimuli ai lea i Lana taitaiga. Pe a tatou usiusitai i Ana poloaiga, o le a tatou maua le filemu ma le manuia (tagai i le Mosaea 2:22). “Ia outou lototetele,” e pei ona saunoa ai Peresitene Thomas S. Monson. “E manuia le lumanai e faapei o lou faatuatua.”³

O le sini tupito o le ola e faavavau.

A o tau le mautinoa la tatou auala i le olaga, e manino lo tatou taunuuga. A o tatou faia ni faaiuga, e mafai ona tatou fesili, “O fea o le a taʻitaʻia ai?”⁴ Afai e tuliese ai oe mai le ala i le ola e faavavau, e le o le filifiliga sao lea.

O nisi taimi tatou te maua ai ni faaiuga laiti, e pei o meaaoga po o le a le meaai e ai i le malologa. Tatou te le vaaia le faamoemoega moni o le olaga — avea e faapei o o tatou matua faalelagi. O le mea moni, a tatou agai atu i lena sini, o le a lelei mea uma. Ia tausisia se vaaiga e faavavau.

Atonu e le tutusa tatou olaga ma le fuafuaga na tatou faia. O le mea moni, e mautinoa lava e leai. Ae o lo tatou taunuuga o le mea aupito sili lea ona taua. Ia mautinoa o loo e i ai i le itu sao, ma faatasi ai ma le fesoasoani a le Alii, o le a lelei mea uma. O le a ia taialaina oe.

Ua ia te oe le faitalia.

E ui e taitaia e le Tama Faalelagi o tatou ala, ae Na te le tau maia ia i tatou mea uma e tatau ona tatou faia. Ua ia tuuina mai ia i tatou le faitalia, ma e finagalo o Ia ia tatou faaaogaina.

E pei ona fetalai mai le Alii, “E le tatau ona ou poloai atu i mea uma; … e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie” (Mataupu Faavae ma Feagaiga 58:26–27). I le tulaga la lea, o le auai ma le naunautai o lona uiga o le filiga ma le tuuto.

O nisi taimi, o le i ai o le faitalia atonu e le lagona ai se faamafanafanaga. O nisi taimi atonu tatou te mananao ai e ta’u mai ia i tatou le mea e fai. Ae o le mea moni, o le faitalia o se faamanuiaga sili. O se meaalofa mai le Atua ma o se tasi o mea e avea ai i tatou e faapei o Ia. E tuuina mai ai ia i tatou le mana.

O le a la le mea e te fia auai i ai?

E finagalo le Tama Faalelagi ia tatou alualu i luma.

O se tasi o na mafuaaga lelei o le punouai ai i lo tatou lava atinaega patino. E i ai lava mea e mafai ona tatou faaleleia atili mo i tatou lava, o mea e mafai ona tatou aoaoina, ma tomai e mafai ona tatou atiina ae. O loo i ai foi feagaiga e tatau ona tatou faia ma tausia.⁵

Na faamalamalama mai e Elder Dale G. Renlund o le Korama a Aposetolo e Toasefululua le taua o lo tatou alualu i luma i lenei auala: “E le finagalo le Atua i Ana fanau ina ia avea ma ‘fagafao’ e aoaoina ma usiusitai o le a le lamuina Ona seevae tosotoso i le potu malolo faaselesitila. Leai, e finagalo le Atua i Lana fanau ia tuputupu ae faaleagaga ma auai faatasi ma Ia i le pisinisi faaleaiga.”⁶

Saunia mo lou taunuuga e faavavau e ala i le avea ma tagata sili e mafai ona avea ai oe. Faailoa mai tomai e te manao e atiina ae ma meaalofa faaleagaga e te manaomia ina ia avea atili ai e faapei o le Atua.⁷ Ona fai lea o se fuafuaga e atiina ae na mea! Ia faamalolosia ou “musele faaleagaga” e ala i le faataitai.⁸

A foliga mai ua taufaafefe le olaga o i luma, ia manatua e le o se mea e le mafai ona pulea. E le o tuua na o outou. E malosi tele oe. Faatasi ai ma Iesu Keriso, ua le mafai ona taofia oe. O le a Ia fesoasoani ia te oe ina ia e maua mea uma na e fanau mai e te maua.