Talafaasolopito o le Ekalesia: O se Punavai o le Malosi ma Musumusuga
Saunia e Elder Quentin L. Cook
O Le Korama a Aposetolo e Toasefululua
Tala na saunia e tusitalafaasolopito o le Ekalesia o Kate Holbrook ma Matt Grow
A o tatou aoao atili e uiga i le Au Paia ua mavae, o le a faamalosia i tatou i le faataunuuina o a tatou lava misiona o se afafine po o se atalii o le Atua.
Taumatau: ata o le tamaitai mai le Getty Images; taumatau i le pito: Addison Pratt ma lana api talaaga, Farani Polenisia, 1844
Elder Cook: O le talafaasolopito o le Ekalesia e mafai ona avea ma se punavai taua o le faatuatua, ae mo nisi tagata, ua malamalama sese pe ua le amanaiaina. O nisi tagata ua latou faamatalaseseina ma le iloa lelei ia tala o aso ua mavae ina ia maua ai le masalosalo.
O le aoaoina o le talafaasolopito moni o le Ekalesia, o le a fusia faatasi ai o tatou loto ma le Au Paia o ananafi ma le aso. O le a tatou maua ai faataitaiga o tagata e lē atoatoa o e sa o atu i luma ma le faatuatua ma faataga le Atua e galue e ala ia i latou ina ia ausia ai Lana galuega. Ou te folafola atu o le suesue i le talafaasolopito o le Ekalesia e mafai ona faaloloto ai lou faatuatua ma lou manao e ola atoatoa atili i le talalelei.
O le tala i le Toefuataiga o se tala o le ositaulaga, lotomau, ma le faatuatua. O i tatou uma o se vaega o le Toefuataiga ma le talafaasolopito o le Ekalesia. E tofu i tatou ma se misiona ia ausia i lenei olaga, o le a fesoasoani ai i le talalelei ia tumu ai le lalolagi. A o tatou aoao atili e uiga i le Au Paia ua mavae, o le a faamalosia i tatou i le faataunuuina o la tatou lava misiona o se afafine po o se atalii o le Atua.
I le ova ma le 24 tausaga o avea ai a’u ma se Pulega Aoao, o le naunautaiga o le Usoga ia matuai manino mea uma i le mea e mafai ai, e uiga i le talafaasolopito o le Ekalesia faapea foi i aoaoga faavae. Matou te lagonaina o le taumafaiga e tuuina atu punaoa fou—aemaise lava Pepa a Iosefa Samita, Tala o Autu o le Talalelei, Autu o Talafaasolopito o le Ekalesia, ma le taimi nei o le voluma tuufaatasi o le Au Paia1—o se auala matagofie e suesue ai tagata i tusiga na e moni ma o le a fesoasoani ia i latou ia malamalama i le talalelei a Iesu Keriso i se auala o faamatalaga faamaonia.
O se tasi o tala ou te fiafia lava i ai i le Au Paia o le tala ia Addison Pratt na alu atu i le Pasefika i Saute. Pe 60 ana papatisoga sa fai. Sa ma maua ma lou toalua, o Mary, le avanoa e asiasi atu ai i atumotu o Austral, Farani Polenisia, lea na aoao ai Addison Pratt.
O se tasi o aafiaga sili ona ofoofogia ua ou maua o le faalogo lea i se tamaitai talavou o faapea mai, “O au o se tagata o le augatupulaga lona fitu o le Ekalesia.” Sa papatisoina e Addison Pratt lona tuaa matua ua leva a o lei malaga atu le Au Paia i Iuta.
Po o fea lava o e i ai i lenei lalolagi, po o le a lava le gafa e te tupuga mai ai, e taua oe, o oe o se vaega o le talafaasolopito o le Ekalesia. Matou te matua manaomia lava oe ma mananao ia te oe. O le a e faamanuiaina olaga o tagata.
Aisea e le talanoa tele ai le Ekalesia e uiga i nisi o mea e feteenai i lona talafaasolopito?
Saunia e Kate Holbrook
Tauagavale: Ata na tusia e David Green
Ina ua fa o’u tausaga, sa faigaluega lou tina ma lou tinamatua i le Maota o le Ofagapi, le fale tuai o Polika Iaga i le aai o Sate Leki, Iuta. Sa la aoaoina au i mea uma e uiga ia Polika Iaga ma sa tele ana ava sa i ai. Pe tusa o le 10 tausaga mulimuli ane, sa ou iloa ai sa i ai iā Iosefa Samita ni ava se toatele. Ou te lei iloa e uiga i maa talifaaaliga, lea na faaaoga e Iosefa e fesoasoani ai e faaliliu le Tusi a Mamona, seia oo ina avea au ma se tagata matua. E lei natia e le Ekalesia ni faamatalaga mai ia te au, ae peitai o faamatalaga o le talafaasolopito sa lei faamamafaina ao ou laitiiti.
O mea sa ou aoaoina i a’u lotu i Aso Sa ma a’u vasega seminare o le galuega autu lea a le Ekalesia. Sa ou aoao e salamo. Sa ou aoao e faaogatasi lo’u olaga ma le talalelei a Iesu Keriso. Sa ou aoao pe faapefea ona faatulaga se sootaga ma lo’u Tama oi le Lagi. O mea nei i lo’u olaga e sili ona pele ia te a’u. Ou te iloa e mo nisi tagata, e mafai ona matua tiga lava le aoao e uiga i se mea sa e manatu sa tatau ona e iloa ae e te lei iloaina. O le pogai lena ua ma faia ai ma Matt le galuega o loo ma faia. Matou te faamoemoe o lena aafiaga mo tagata o le a avea nei ma se vaega o le taimi ua tuanai ona ua ia i tatou le tusi Au Paia, lea e faaalia ai se talafaasolopito atoa mo tagata.
E faapefea ona tatou iloa pe e faatuatuaina se punavai o le talafaasolopito o le Ekalesia?
Saunia e Matt Grow
Ua iva tausaga o o’u faigaluega mo le Ekalesia i le tusia o talafaasolopito. Ua ou vaaia le uiga faaalia o o tatou Pulega Aoao e faatatau i lo tatou talafaasolopito. O talanoaga e le faatatau i le “E faapefea ona tatou nanaina pe suia le talafaasolopito?” Ae, o talanoaga e faatatau i le “E faapefea ona tatou faia le talafaasolopito ia maua e tagata, avanoa, ma malamalama i ai?”
Ua tatou iloa uma lava o le luitau i le vaitau lenei o faamatalaga e le o le sueina o tali—ua siomia i tatou e tali—ae o le ia iloatino le va o tali lelei ma tali leaga, faamatalaga lelei ma faamatalaga leaga. E anoano ia talanoaga i luga o le initoneti e uiga i lo tatou talafaasolopito, ma o le tele o nei talanoaga e tupu ai le tele o le ita nai lo o le malamalama.
Ia faaeteete i puna o faamatalaga lea e nā ona saili e toso i lalo tagata. Ae ia vaavaai mo puna o faamatalaga e faavae i faamaumauga na tuua e tagata lava ia ma faapea ona saili ia tonu ia i latou. E ese le faigofie o le taalo “ua maua oe” i mea ua tuanai, ia aveese mai ai se upusii po o se mea na tupu mai lona aano moni ae fai ia foliga o se mea e faapopoleina ai.
I le avea ai ma se tusitalafaasolopito, ou te taumafai e mulimuli i le fautuaga a se tusi talafatu Peretania. Fai mai a ia: “O le taimi ua tuanai o se atunuu ese: latou te faia ai ni mea e ese iina” (L. P. Hartley, The Go-Between [1953], prologue). O lona uiga, a tatou asiasi i taimi ua tuanai, tatou te le mananao e avea i tatou ma se “turisi auleaga.” Tatou te taumafai ia malamalama i tagata i totonu o o latou lava siosiomaga ma a latou lava aganuu. Tatou te fia onosai i mea tatou te vaai i ai o o latou sese. Tatou te fia lotomaualalo e uiga i tapulaa o lo tatou lava malamalama. Ma tatou te mananao ia maua se agaga o le alofa mama e uiga i le taimi ua tuanai.
Iosefa Samita ma le Tusi a Mamona
A o ou i ai i tausaga o le talavou, sa matou manatu o le a le alu lou uso matua e fai se misiona ona sa faatagaina le uarota e auina atu na o se alii talavou se toatasi i le taimi e alu i se misiona. Sa tatau ona avanoa isi tagata uma mo le lesitala i le militeli. Ae na iloa ane e lo matou epikopo ma le peresitene o le siteki e mafai ona la toe auina atu se isi toatasi. O lea, sa la talanoa ai i lou uso, ma sa sau o ia i le fale ma tau atu i ou matua.
O lo’u tama o se tagata lelei tele, ae sa le toaga o ia i le Lotu. O lana tali sa le lelei—ae mo se mafuaaga e le masani ai. Sa lei faitio o ia i le Ekalesia pe o se misiona foi, ae sa sauniuni lou uso mo le aoga faafomai. Sa fai mai lo’u Tama, “Ua e saunia oe lava e te alu i le aoga faafomai. Ua e aveina vasega. E mafai ona tele atu mea lelei e te faia pe afai e te alu i le aoga faafomai nai lo mea e te mafaia pe a e alu i se misiona.”
I lena afiafi, sa ma saofafai ai ma lou nei uso faamaoni, ma sa ma talanoa toalua. Na ma faaiuina faapea e tolu lava fesili o le a iloa ai lana tali i lo ma tama. O le mea muamua o le, “Pe na avea Iesu Keriso ma Faaola o le lalolagi?” O le lona lua o le, “Pe o le Tusi a Mamona o le afioga a le Atua?” Ma lona tolu o le, “Pe o Iosefa Samita o se perofeta?” Sa ou iloaina o tali i na fesili e tolu o le a aafia ai le toetoe lava o faaiuga uma o le a ou faia mo aso uma o totoe o lou ola.
Sa ou alofa pea i le Faaola ma sa ou faitauina le Tusi a Mamona, ae o le iloaina o le taua tele o na tali, sa ou tatalo ai i lena po ma maua ai e ala i le Agaga Paia se tali maoae o na fesili. O Iesu Keriso o le Faaola, o le Tusi a Mamona o le afioga a le Atua, ma o Iosefa Samita o se perofeta. Ou te molimau atu e moni nei mea uma lava.
Aisea e fai ai si eseese o tala e uiga i le Uluai Faaaliga a Iosefa Samita?
Saunia e Matt Grow
Sa faamaumauina e Iosefa Samita pe sa talosaga atu i ana tusiupu e faamaumauina ni tala eseese se fa o le Uluai Faaaliga. O tala e faamatalaina se tala e tutusa lava, ae o loo i ai ni eseesega. E le tatau ona tatou tete’i i lena mea. Afai sa tutusa atoatoa ia tala, o le taimi lena ou te, i le avea ai ma se tusitala faasolopito, o le a ou masalomia loa aua e le o le ala lena e galue ai le mafaufau i mea e manatua. Ua tatou vaaia foi lea lava mamanu e tasi i isi tala i le talafaasolopito po o tusitusiga paia (tagai Galuega 9:7; 22:9).
O le isi mea taua ia manatua o le faigata ona pueina i le gagana o se aafiaga paia. Na taua e Iosefa le gagana o se “falepuipui itiiti, ma le vaapiapi” (i le History of the Church, 1:299). Mafaufau i ou aafiaga e aupito sili ona paia. O le a le faigofie ona faaupu? E tatau ona tatou faamanatuina ua tele ni a tatou tala ona latou te aumaia ia i tatou ni manatu fou ma se vaaiga fou. Alu e faitau tala e fa o le Uluai Faaaliga i totonu o tala i le Autu o le Talalelei. O le faia o lea mea o le a loloto ai lou talisapaia o le mea na tupu i lena aso.
O le a le matafaioi a le Urima ma le Tumema sa fai i le faaliliuga o le Tusi a Mamona?
Saunia e Kate Holbrook
Tauagavale: Ata na tusia e David Green
Na faaliliuina e Iosefa Samita le Tusi a Mamona e ala i le meaalofa ma le mana o le Atua. O le Urima ma le Tumema, atonu na tou faitau i ai, o loo ta’ua i le Tusi a Mamona, sa tanumia faatasi ma papatusi. Ina ua tuu atu e Moronae ia Iosefa Samita ia papatusi auro, sa ia tuuina atu foi ia te ia le Urima ma le Tumema. O le maa vaai, lea na faaaoga foi e Iosefa e faaliliu ai, e lei tanumia ma papatusi. O se mea sa maua e Iosefa i ona lava tausaga na muamua atu lea sa fesoasoani ia te ia na te lagona ai le ola e tusa ai ma faaaliga faaleagaga. O lea, sa ia faaaogaina ai ia mea e lua.
O Ema Samita, o se tasi o ana tusiupu, sa ia manatuaina mulimuli ane e faapea, soo se taimi lava e nofo ai i lalo Iosefa e toe amata ona faaliliu, na te le fesili lava, “Ia, o fea foi sa ou gata ai? O fea na ta gata mai ai?” Na te amata tonu lava i le vaega sa la’ua gata ai. Afai e te vaai i se itulau o le apitalaaga patino a Iosefa Samita lea sa ia tusia i le tolu o tausaga ina ua uma le faaliliuga o le Tusi a Mamona, e tumu i upu na kolosi ese, manatu e le atoatoa, ma fuaiupu motumotu. Pe a e vaai i se itulau o le Tusi a Mamona sa faamalau atu, e leai se mea faapena o i ai. E atoatoa, tusiga matagofie—e atoa fuaiupu, e leai se mea na kolosi ese.
O se mea manaia e mafaufau i ai, ae o le mea e taua ia te a’u o anomea o le Tusi a Mamona. O le Tusi a Mamona na aoao mai ai au e le tupu o Peniamina ina ia faamuamua le agalelei i le faamasino atu, lea na aoaoina ai au e Alema i le uiga o lou papatisoga, o mea ou te folafola atu e fai mo ma faatasi ai ma ou uso a au paia. O le Tusi a Mamona lea sa aoao mai ai a’u e Mamona ma Moronae e uiga i le taua o le alofa mama ma le mea e tatau ona fai e maua ai. Ua fesoasoani lenei tusi e mamanu ai le tagata ua ou i ai, ma le ala ou te vaai ai i le lalolagi.
Faaipoipoga Faa’autaunonofo
Ou te fia faia ni manatu se tolu e uiga i le faaipoipoga faa’autaunonofo. Muamua, o loo manino e tele naua se osigātaulaga i faaipoipoga faa’autaunonofo. Sa tele le alofa ma le lotogatasi, ae sa i ai foi le osigātaulaga, ma o matua i na faaipoipoga na aoaoina a latou fanau e ositaulaga. O le toatele o fanau o na faaipoipoga faa’autaunonofo na aveina atu le talalelei a Iesu Keriso i le salafa o le lalolagi ma faamanuiaina ai le tele o olaga.
Lona lua, sa i ai ni isi, e pei o Vilate Kimball, o e sa mauaina a latou lava faaaliga patino—ae latou te lei iloaina atoatoa e uiga i le mea o le a oo mai—o lenei aoaoga faavae na sau mai le Atua.2
Ma le lona tolu, i aufono sinia o le Ekalesia, o loo i ai se lagona e faapea o le faaipoipoga faa’autaunonofo e pei ona faatinoina na faataunuuina lona faamoemoega. E tatau ona tatou faamamaluina na Au Paia, ae ua faataunuuina lena faamoemoega.
I le taimi nei, e i ai fesili e lei taliina. Ae ou te manao ia outou iloa, o loo i ai so tatou Tama Faalelagi alofa o loo i ai [Sana] fuafuaga atoatoa, ma o Lana fuafuaga o se fuafuaga o le fiafia, ma o loo i ai so tatou Faaola o lē sa faia mea uma mo i tatou. E mafai ona tatou faatuatuaina i Laua.
Aisea na latou faia ai faaipoipoga faa’autaunonofo i aso popofou o le Ekalesia?
Saunia e Kate Holbrook
O le aoaoga a le Tusi a Mamona e uiga i le faaipoipoga faa’autaunonofo e faapea mai o le faaipoipoga o le finagalo lea o le Alii mo Lona nuu, ae o loo i ai ni tuusaunoaga e seāseā tupu pe a Ia poloaiina le faiga o faaipoipoga faa’autaunonofo ina ia tausia se nuu amiotonu (tagai i le Iakopo 2:30). O le tulaga lenei e seāseā ona tupu lea sa poloaiina ai Iosefa Samita e amatalia. Sa faigata ia Iosefa mo le tele o tausaga ona faaaoga lenei faatinoga, ae sa iu lava ina ia faatinoina ona sa manao o ia e usiusitai i le poloaiga a le Atua ia te ia. Sa taumafai o ia e faatino le faaipoipoga faa’autaunonofo i le ogatotonu o le 1830, ae o le 1841 moni lava lea na ia faifai malie ai, e sili atu le aloaia, ona faalauiloa atu le faatinoga i ana aumea faatuatuaina. Sa faateia i latou. Sa latou aioi atu i le tatalo i lo latou Tama o i le Lagi mo le malamalama i lenei mataupu faavae, ma sa latou mauaina ni molimau faaleagaga patino o le mea sao lea mo i latou i lena taimi.
O le faaipoipoga faa’autaunonofo, na faataitaia aloaia mo le tusa o le 50 tausaga, o se mea na mafai ona filifilia e tagata. O loo taumafai pea ia le au atamamai e iloilo pe toafia tagata matutua o le Au Paia o Aso e Gata Ai sa i ai moni lava i ni faaipoipoga faa’autaunonofo, ae ua matou iloa sa na o se vaega toalaiti lava o le Au Paia. Ma ua matou iloa o le toatele o i latou o tagata aupito tuuto, ma aupito malolosi o la tatou Ekalesia. O le 1890, sa tuuina atu ai e Peresitene Uilifoti Uitilafi (1807–98) se manifeso na faamutaina ai le faatinoina o faaipoipoga faa’autaunonofo. Ina ua faalogo nisi o tagata i lenei manifeso, sa matuu ese se [avega]. Sa faigata ia faaipoipoga faa’autaunonofo mo i latou. Ina ua faalogo isi i lenei manifeso, sa matua lofituina i latou. Sa latou ositaulagaina mea e tele, ma sa i ai a latou molimau e uiga i lenei mataupu faavae.
O nisi o tagata o le Ekalesia e tuufesili pe o le a le uiga o le faaipoipoga faa’autaunonofo lea sa tatou faia i le taimi ua tuanai mo le olaga a sau. Ae ua aoao mai o tatou taitai o le Ekalesia o le faaipoipoga faa’autaunonofo e le manaomia mo le faaeaga po o le mamalu e faavavau. E ui lava ou te faafetai au lava ia o le faaipoipoga i le toatasi o le tulafono, ma o le faaipoipoga faa’autaunonofo o le tuusaunoaga lea, ou te le faaleagaina molimau ma le usiusitai faamamaluina o o tatou tuaa faaleagaga o e na faatinoina lenei mataupu faavae. Sa latou usiusitai, ma sa latou maua se molimau na sa’o.
Malumalu ma Feagaiga
Luga: Malumalu o Katelani, saunia e Al Rounds; taumatau: Mose, Elaia, ma Elia, saunia e Gary Ernest Smith
I Katelani, Ohaio, o se tasi o mea mataina na tupu o le fausiaina ma le faapaiaga o le Malumalu o Katelani. O le tatalo o le faapaiaga, lea na maua e Iosefa e ala i se faaaliga, o loo maua i le vaega 109 o le Mataupu Faavae ma Feagaiga. I lena tatalo, sa ia ole atu ai i le Alii ina ia talia le gaosiga ma le taulaga a le Au Paia i le fausiaina o le malumalu.
E tasi le vaiaso talu ona uma le faapaiaga o le malumalu, ae maua e Iosefa Samita ma Oliva Kaotui se isi faaaliga. O le mea lea na tupu i le Eseta, o le Paseka foi lena. Na oo mai le Alii i se faaaliga ma taliaina le fale. Sa Ia fetalai atu i le Au Paia e tatau ona latou olioli i le mauaina, “na latou fausia lenei fale i loʼu igoa, ma lo latou malosi” (Mataupu Faavae ma Feagaiga 110:6). Ina ua tapunia lena faaaliga, na oo mai perofeta anamua e toatolu: o Mose, lea na toefuataiina mai ki mo le faapotopotoina o Isaraelu i vaega e fa o le lalolagi; Elaia, o le na faia le tisipenisione o le talalelei a Aperaamo; ma Elia, o le na toefuatai mai ki o le mana o faamauga (tagai Mataupu Faavae ma Feagaiga 110:11–16).
Ma o le toefuataiga o na ki sa matuai alagatatau lava ina ia ausia ai faamoemoega o le Alii. E le gata ina tatou manaomia le Tusi a Mamona ae faapena foi na ki ma sauniga o le malumalu. O na ki e lei sili atu lava le taua nai lo le taimi nei.
Ua ou matauina, pe a valaauina se tasi o Aposetolo e Toasefululua e avea ma perofeta, e liliu atu lona loto i sauniga o le malumalu i se auala maoae. Sa faamanuiaina au e i ai i le faapaiaga o le malumalu o Navu Ilinoi faatasi ai ma Peresitene Gordon B. Hinckley (1910–2008). Ou te manatua lona matuai ootia i le fausiaina o lenei malumalu ma le taua ia te ia o le aumaia o malumalu i le Au Paia. Sa faaauau pea e Peresitene Thomas S. Monson (1927–2018) lena taumafaiga ma maua ai le musumusuga lava lea e tasi mai le lagi lea na maua e Peresitene Hinckley. Ma ua tatou vaaia i se tulaga maoae lena musumusuga ia Peresitene Russell M. Nelson. Ua oo mai i ona luga le tiutetauave o le perofeta, ma na ia maua se lagona faateleina o le taua tele o sauniga o le malumalu.
O se tasi o ana savali muamua i le avea ai ma Peresitene o le Ekalesia o le uunaia lea o tagata e o i le malumalu, maua o latou sauniga, ma tumau i le ala o le Feagaiga. Ina ua mavae lena, sa ia saunoa mai, afai e i ai se mafuaaga ua e pau ese ai mai le ala o feagaiga, ia toe foi i luga o lena auala.3
Na faapefea ona faamanuiaina uluai Au Paia o Aso e Gata Ai e galuega o le malumalu?
Saunia e Matt Grow
Ina ua maliu Iosefa Samita, o puipui o le malumalu o Navu na itiiti ifo ma le afa ua maea, ma e lei umi ae manino mai ia Peresitene Polika Iaga (1801–77) faapea o le a toe tutuli ese foi le Au Paia. O lea sa ia fesili atu ai i le Alii, “Pe tatau ona matou nonofo e faauma le malumalu, ma le iloa o le a matou lafoaia e toetoe lava i le taimi e uma ai, pe tatau ona matou o i le taimi nei?” Na oo mai ma le manino le tali, “Nonofo” (tagai Brigham Young diary, Jan. 24, 1845, Church Archives; Ronald K. Esplin, “Fire in His Bones,” Ensign, Mar. 1993, 46). O sauniga o le faaeega paia ma le faamauga sa matua taua lava ma sa tatau ai ona nonofo le Au Paia.
Ma o lea la, mo le tausaga na sosoo ai, sa latou sasaa atu ai mea uma na latou maua i le malumalu. A o agai atu i le faaiuga, sa susunuina o latou fale faataamilo i Navu, ma sa sauniuni le Au Paia e o i sisifo i le taimi lava sa latou faamaeaina ai le malumalu. Ia Tesema 1845, na lava se vaega ua faamaeaina o le malumalu e mafai ai e le Au Paia ona faapaiaina se vaega, tuuina atu faaeega paia ia i latou o ē na agavaa, ma faamauina tane ma ava i le tasi ma le isi.
I le aluga o nai masina na sosoo ai, sa latou galulue i le taimi atoa lava e saunia ai tagata uma faaleagaga mo le savaliga tele i sisifo. Ia te au e loloto ma paia le faamauina o au e lena lava mana i lo’u toalua, fanau, matua, ma augatupulaga o ē ua maliliu ma augatupulaga e lei fananau mai. O le mea lena ua mafai ona faia e le Toefuataiga.
E mafai ona e faasoa maia se mea na tupu mai le Toefuataiga lea ua faamalosia ai lau molimau?
Saunia e Kate Holbrook
Tauagavale: Ata na tusia e David Green
Ou te manatua le tala ia Ema Samita lea na taumafai e sola ese mai sauaga i Misuri. Sa na o se vaega na aisa o le vaitafe o le Misisipi—e le lava e mafai ai ona malaga se taavale toso ma tagata ma a latou meatotino i luga. O se vaitafe lautele, ma e matautia pe a kolosi. Sa i ai se tamaitiiti a Ema e ono tausaga le matua sa pipii atu i le pito o lona sakete, se tamaitiiti e valu tausaga i le isi itu, se tamaitiiti e lua tausaga i le lima lea, ma se pepe i lena lima.
Sa suiina e le tuafafine faale-tulafono o se tasi o le au tusiupu a Iosefa ni taga ie e faamau faataamilo i le puimanava. I na ato i lalo o lona sakete, na tauaveina ai e Ema le kopi e tasi o le faaliliuga a Iosefa o le Tusi Paia, lea sa ia galue ai mo le tele o masina. Faatasi ai ma pepa o tusitusiga ma lana fanau, sa ia faia ai se laa se tasi ma le isi laa i le isi itu o lena vaitafe aisā, ma le faamoemoe o le a le pa’ū o ia i totonu.
Ia te au lava ia, o le faailoga sili lena o le lototele ma le faatuatua—afai e manaomia ona e faia se mea mo mea e te talitonu i ai, tau lava o lou agai i luma, e tasi le vae i luma o le isi.
Luga: ata na tusia e Dan Burr; Vavega i Quincy, saunia e Julie Rogers; Iosefa Samita i le Falepuipui i Liperate, saunia e Greg K. Olsen
“Ia Outou Loto Tetele”
E toatele outou o loo i ai faaosoosoga ma tofotofoga. O nisi e oo mai ona o loo i ai le faitalia. O nisi e oo mai ona o loo i ai se fili. Ae tatau ona outou iloa o loo i ai so tatou Tama oi le Lagi alofa, ma o le Togiola a Iesu Keriso e mafai ona faamanuiaina ai i tatou i auala ia atonu tatou te le malamalama atoatoa i ai.
O loo tau mai e nisi o tusi talafaasolopito o le aofai o le Au Paia o e na sosola mai Misuri i Navu i le taimi o le taumalulu o le 1838–39 na maualuga atu e pei o le 8,000. Sa o le taimi o le taumalulu. O fea sa i ai Iosefa? Sa i ai o ia i le Falepuipui i Liperate, sa nutimomoia i le mea na oo i ai le Au Paia. Sa ia lagona le tuulafoaiina o ia.
I lena tulaga matautia, na ia maua ai nisi o mau e sili ona matagofie—vaega 121, 122, ma le 123 o le Mataupu Faavae ma Feagaiga. E maoae lo latou taua. Ou te faamoemoe o le a outou faitauina. Au Paia o loo i ai se tala puupuu i lenei mea:
“Sa tagi atu Iosefa e fai ma sui o le Au Paia lē sala. ‘Le Alii e,’ sa ia augani atu ai, ‘o le a le umi latou te mafatia ai i nei sese ma sauaga lē tusa ai ma le tulafono, ae lei faamaluluina lou finagalo ia te i latou?’
“‘Lo’u atalii e, ia filemu lou agaga,’ sa tali mai ai le Alii. ‘O lou tiga ma ou puapuaga o le a na’o sina minute laitiiti; ma ona oo lea, afai e te talitalia lelei, o le a faaeaina oe e le Atua i lugā; o le a e manumalo i ou fili uma.’
“Sa faamautinoa mai e le Alii ia Iosefa, sa le’i faagaloina o ia. ‘Afai e tatala faamaga lautele mai e auvae lava o seoli le gutu ia te oe,’ na tau atu ai e le Alii ia Iosefa, ‘ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.’
“Sa faamanatu mai e le Faaola ia Iosefa, e le mafai ona sili atu puapuaga e oo i le Au Paia nai lo o mea sa oo i ai o Ia. E alofa o Ia ia i latou ma e mafai ona faamutaina o latou tiga, ae sa Ia filifili e mafatia i puapuaga faatasi ma i latou, tauave o latou tiga ma faanoanoaga o se vaega o Lana taulaga togiola. O ia mafatiaga sa faatumulia ai o Ia i le alofa mutimutivale, ma tuuina atu ai ia te la le mana e fesoasoani ma faamamā ai i latou uma o e liliu atu ia te Ia i o latou tofotofoga. Sa ia faamalosiauina Iosefa e taofimau pea ma folafola mai e le tuulafoaia lava o Ia.”
Na manatu Elder Heber C. Kimball (1801–68) faapea, o le amiotonu o le Faamasinoga Maualuga a Misuri o le a faasaoloto ai Iosefa, ae sa latou filifili e leai. Sa toe foi atu Heber i le Falepuipui o Liperate ma, e lei faatagaina i totonu o le lua, na valaau atu ia Iosefa ma le tala lē lelei.
Ma sa agalelei ma fiafia atu Iosefa ia te ia. “Ia fiafia,” o lana tala lea. Ona ia faatonuina lea o Heber e “aveese uma le Au Paia i le vave e mafai ai.”4
E i ai se lesona mo outou i lena mea: ia fiafia pea e tusa lava po o a o outou luitau. Afai e faaosoosoina oe e ni mea patino, alu ese mai ai. Faalagolago i le Agaga Paia. O le faataitaiga a Iosefa i le Falepuipui i Liperate, ma le sosola ese o le Au Paia mai Misuri i Navu o ni faataitaiga o le malosi ma le faatuatua i le Alii o Iesu Keriso.
I le avea ai ma se Aposetolo, ou te molimau atu ia Iesu Keriso. O a’u o se molimau mautinoa o Lona paia. Ou te manao ia te outou ia iloa Na te taitaia ma faatonutonuina le Ekalesia i se auala o le a manuia ai i tatou uma. Ou te molimau atu o loo soifua o Ia.
Ina ia maimoa i le faigalotu atoa, alu i le devotionals.ChurchofJesusChrist.org.