KOVITI-19: O Savali o le Faasinoala, Faamalologa, ma le Faamoemoe
Ua molimauina e tagata o le ekalesia le vaaia o le aao o le Alii e oo lava i lenei vaitau o suiga, atuatuvale, ma le maliu.
Sa Faatasi o Ia ma A’u i Lena Taimi; O Loo Faatasi Foi o Ia ma A’u i le Taimi Nei
A o ou nofonofo i le fale ma taumafai e faatoafilemu lo’u atuatuvale i le mea o loo tupu i le lalolagi, sa ou soona susueina la’u api talaaga ma ou tau atu ai i le faaupuga lea: “E anoanoai atuatuvalega e oo mai pe a ala a’e i luga i aso taitasi i lenei lalolagi, ae faatasi ai ma le faatuatua i aoaoga o le talalelei, e mafai ai ona tuu atu le vae e tasi i luma o le isi. … E faatoilalo e le faatuatua i taimi uma le fefe.”
Sa ou iloaina ua faatoa ou mauaina le faaaliga patino mamana ma na tuuina mai e le Tama Faalelagi ia te au e ala i a’u lava tusiga i la’u api talaaga mai le tele o tausaga ua mavae. Sa faamanuiaina au i se taimi o le filemu ma le malamalama sa faatasi le Tama Faalelagi ma au i lena taimi, ma o loo i ai nei o Ia faatasi ma au i le taimi nei.
Danette Gray, Iuta, ISA
E Mafai e le Agaga Paia ona Galue i le Upega Tafa’ilagi
Sa musuia au e amata ona fai ia vasega seminare e ala i talanoaga faavitio i vaega [group video chats]. E lua aso a o lei taofia lo matou aai i lalo o le kuorenitini, sa faia ai le uluai lesona a le matou vasega i le initoneti.
O nisi o matua sa auai faatasi mai i le matou vasega, e aofia ai i latou e le auai i le ekalesia. Sa oono lo’u tagi a o matou suesueina faatasi le Mosaea mataupu e 2. Sa matou taufai lagonaina le Agaga a o matou aoaoina o le auauna atu i isi o le auauna lava lea i le Atua. Na tele ni mea sa ou aoaoina e uiga i le mauaina ma le iloaina o faaaliga faaletagata lava ia. O le a faaalia mai e le Agaga Paia le moni o le talalelei i le tele o ituaiga mamanu. Po o a lava mea o loo tutupu i le lalolagi, e leai se mea e mafai ona taofia le galuega a le Tama Faalelagi mo le faaolataga o Ana fanau mai le agai i luma.
Marites Pineda, Mindanao, Filipaina
Matou Te Lei Misia se Aso o le Seminare
Tusa lava foi i mea uma ua tutupu i le koronavairusi, ou te fiafia lava e faapea atu matou te lei misia lava se aso o le seminare. O le aoaoina o a’u vasega i talanoaga i le vitio e tulai mai ai ni nai luitau, ae ou te fiafia lava e matauina matua ma tei laiti o faalogologo mai i a matou talatalanoaga. Ou te fiafia aua o loo maua ai se lagona o le faia e le aunoa ma masani a o matou aiga, ma e sili lo’u fiafia ua mafai ona matou faaauau pea ona fefaasoaai molimau i le tasi ma le isi e uiga ia Iesu Keriso ma Lona alofa mo i tatou.
Mandi Crandell, Yigo, Guam
Auauna Atu ia i Latou i Itu Uma e Lua o le Veli
Sa ou galue o se tamaitai faifeautalai faamisiona sinia i le Misiona i Misuri Initipene ina ua le toe faia sauniga Lotu, ma sa amata ona faaesea le tagata lava ia i o matou potu mautotogi. Sa matou faaaogaina a matou telefoni ma komepiuta e fesootai ai ma tagata o le au paia ma aapa atu ai ia i latou sa matou galulue, ma se lei o mai i taimi uma i le lotu.
Ina ia faaaoga le taimi, sa tonu ia te au e fai ni nai gafa faaleaiga, e ui ina sa fai si umi o faigata ia te au ona sue nisi igoa fou. Ina ua ou alu i totonu o le FamilySearch, sa ou maua ai se faailo o se faamaumauga o loo faatalitali ina ia faaopoopoina. O lena faamaumauga e tasi na ou maua ai pe tusa ma le 70 tagata i la’u laina. Ina ua mavae aso e lima, sa muta le gasolo mai o igoa. I se taimi mulimuli ane i lena aso, sa matou iloa ai ua faataga i matou e o i o matou aiga. Ua ou faanoanoa e tuua, ae sa ou lagonaina foi le faamanuiaina ona sa mafai ona ou auauna atu i lo’u aiga i le isi itu o le veli, i lenei taimi faigata.
Kim Nielson, Oregon, ISA
O Le Faia o La Tatou Vaega ia Faagaoioia ai Pea le Galuega a le Alii
Ina ua fautuaina faifeautalai o la matou eria e nonofo i o latou faleapi, sa matou taumafai e faia la matou vaega, o le valaaulia o se uo e aoao e uiga i le Ekalesia. O loo faasoa atu e faifeautalai a latou lesona i le telefoni i la matou uo. Matou te lagonaina le Agaga i lo matou fale ma e faafetai ai i le tekinolosi ua tatou maua i nei ona po. E maoae le vaaia o le galuega a le Alii o loo gasolosolo pea e ui i luitau uma o i le lalolagi
Elaina Reich, Uosigitone, ISA
E Faafofoga mai le Faaola i a Tatou Pesepesega
Ou te galue o se faifeau faamisiona auauna atu a le Ekalesia i le polokalama o le PathwayConnect i le Siteki o Kyiv Ukraine. Sa tonu i taitai o le polokalama e aoao faamasani i matou uma o e taitai patino i tauaofiaga ina ia mafai ai ona matou faatautaia e aunoa ma le vaaitino. O le aso lava na sosoo ai, sa faasilasila mai ai e le malo aiaiga o le kuorenitini i Kyiv.
Ou te fiafia lava i le avanoa e tauaofia faatasi ai mo le PathwayConnect. Ma ou te fiafia lava i le avanoa e tauaofia faatasi ai e tapuai ma pepese faatasi i le fale i Aso Sa. Ou te faafetai lava mo le faamautinoaga e faapea, o le mea e faapotopoto ai le toalua po o le toatolu i Lona suafa, e i ai foi o Ia iina. E leai se tasi e iloa pe o le a le umi o le a kuorenitini ai matou i Kyiv, ae ua matou iloa o le a faafofogaina e le Faaola a matou pesepesega.
Kateryna Serdyuk, Kyiv, Iukureini
“Ua Oo i le Taimi e Toe Ave ai Lou Aiga”
Ina ua faasalalau mai talafou e uiga i le KOVITI-19, sa faalogoina e pei ua soona faatele lē mafaufau. Ona oo lea ina gasolo pea aso, sa amata ona ou lagonaina le le to’a ma sa oo ai lava ina [ou] gatete e uiga i le lumanai o lo tatou lalolagi.
I se tasi taeao, sa le mafai ona ou toe moe ma sa ou saofai ma manatunatu loloto pe o le a le uiga o nei mea uma. Ona oo mai ai lea o le toafilemu. Sa aoao mai au e le Agaga e faapea, ua tuuina mai e le Alii ia te au se meaalofa. Sa Ia faapea mai, “Ua oo i le taimi e toe ave ai lou aiga.”
Ua pisi naua le olaga. O lenei faama’i oti ua aumaia ai i lo matou aiga le avanoa e taulai atu ai i mea e taua: o le talalelei a Iesu Keriso. E mafai ona ou lelemoina i lalo nisi o nei tosinaga ’oona i le lalolagi ae taulai atu i le aoaoina o la’u fanau e vaavaai atu ia Keriso. E silafia lelei e lo tatou Tama o i le Lagi i tatou. Ua ou lagonaina lena mea i le taimi nei nai lo se isi lava taimi.
Mary Ostler, Nebraska, Iuta, ISA
Ua Uma Ona Saunia i Tatou e le Alii mo Lenei Mea
Ina ua ou faatoa maua le tala faapea ua taofia mo se taimi le tumau ia potopotoga faale-Lotu, sa fai si o’u le fiafia. Ae o le taimi nei ua mafai ona ou iloa le ala na saunia ai e le Alii i tatou mo lenei taimi e ala i Ana perofeta. O suesuega o le talalelei e totonugalemu i le aiga, e mafai ona fesoasoani ia i tatou i taimi faigata. Ou te faafetai lava ona o loo mafai lava ona ou ’ai ma inu i le faamanatuga i Aso Sa ma maua afioga a perofeta. E mafanafana lava le iloa ai, seia oo i le taimi ua mafai ona tatou toe potopoto faatasi ai, ae e mafai lava ona tatou lagonaina lea lava Agaga e tasi.
Emma van As, Gauteng, Aferika i Saute
Ua Uma Ona Aoaoina i Tatou i le Ala e Tapuai Ai
A o ma auai ma lo’u toalua i le faatinoga o le sauniga o le faamanatuga i lo matou fale mo le uluai taimi, sa ou lagonaina le matua malosi o le Agaga ma sa le mafai ai ona ou usuina le viiga sa matou filifilia. I le 70 ma ona tupu tausaga sa ou auai ai i sauniga tapuai, ou te le manatuaina so’u talisapaia loloto o faamanuiaga ua tatou maua e ala i le avea o i tatou ma tagata o le ekalesia ma le auai ai i Le Ekalesia a Iesu Keriso o le Au Paia o Aso e Gata Ai.
Ua uma ona aoaoina i tatou i le ala e tapuai ai ma lē tatou te tapuai i ai. Ioe, tatou te misia mafutaga ma o tatou uso a Au Paia ma o le a tatou fiafia e toe foi i le mea “masani” i se taimi vave e mafai ai, ae ou te faafetai lava mo lesona o loo tatou aoaoina i le taimi nei ao tatou mulimuli i le fautuaga a le perofeta i la tatou tapuaiga, “totonugalemu i le aiga, e lagolago-e le Ekalesia.”
Susan Preator, Montana, ISA
Mauaina o le Filemu ma le Lotogatasi
O le faia o afiafi faaleaiga o se mea ma te sagisagi atu lava i ai ma la’u tama tama i vaiaso taitasi. E masani ona ma aumaia tagata o le au paia, uo, ma faifeautalai i lo matou fale. Ona matua suia ai lea o mea ona o le faama’i oti. O le taimi nei ua fai a matou afiafi faaleaiga ma uo i luga o le telefoni. I le aluga o lenei taimi ua mafai ona tele mea matou te faia e matou te felata’i ai.
Ou te faafetai mo lo tatou perofeta pele, o lē sa valaauliaina i tatou e anapopogi. O le toatele o i tatou sa mafai ona lagonaina le mana o le lotogatasi ma le filemu e ala i lena aafiaga. I taimi faapenei, o le filemu tatou te manaomia e sau mai le Faaola o Iesu Keriso.
Roshene McKenzie, Kingston, Jamaica
E Pule le Atua
Sa amata la’u misiona i le na o le lua ma le afa masina talu ai. Sa tofia au e galue i Hermosillo, Mekisiko. O aso uma sa ou maua ai le avanoa e feiloai atu i tagata matagofie o e sa saunia ia talia le talalelei toefuataiina. Sa ou lagonaina ua faatoa amata ona ou faataunuuina lo’u faamoemoega i le taimi na faasalaveia ai e le KOVITI-19 la’u misiona.
E tiga le tuua o na tagata ua ou matua alofa tele i ai, ae sa ou lagonaina foi le filemu tele ma le malupuipuia aua ua ou iloa o loo tumau pea ona i ai i le Atua le pule. Ou te faafetai ua ia i tatou se perofeta ma Aposetolo e taialaina i tatou i lenei taimi. E faapei o le toatele o faifeautalai i le lalolagi, ou te mautinoa e le o le mutaaga lea o la’u misiona. E le o toe mamao ona mafai lea ona ou toe fesoasoani e tulei i luma le galuega a le Alii ma faaauau pea ona avea o se meafaigaluega i Ona aao, e aumaia nisi agaga ia salamo.
Carolina Roman, Puerto Rico