O Fale e Sili Ona Matagofie
O le Faaola o le enisinia atoatoa, tufuga, ma le mamanu anoafale. O Lana galuega faatino o le faaatoatoaga ma le olioli e faavavau o o tatou agaga.
Talu ai nei lava sa tosina ai la’u vaai i se laupapa mo faasilasilaga i le Aai o Sate Leki. Sa faasalalauina ai se meaafale ma le kamupani e mamanuina totonu o fale. Sa faigofie lona faaupuga, “Tautuaina Fale e Sili Ona Matagofie i le Aai o Sate Leki.”
Sa le galo le savali—o le a le uiga o se “fale e sili ona matagofie”? Sa oo ina ou iloaina ua ou mafaufau lava i lena fesili, aemaise lo’u mafaufau i le fanau sa o ma tausia ma lo’u toalua o Kathy, ma fanau ua latou tausia nei. E faapei o matua i soo se mea, sa tatou popole ma tatalo mo o tatou aiga. Ma o loo tatou faia pea lava. Tatou te mananao moni mo mea sili ona lelei mo i latou. E mafai faapefea ona latou ola i fale e sili ona matagofie? Sa ou tomanatu i fale o tagata o le Ekalesia sa ma maua le avanoa ma Kathy e asiasi atu i ai. Sa valaaulia i ma’ua i totonu o fale i Korea ma Kenya, i Filipaina ma Peru, i Laos ma Lativia. Se’i ou faasoa atu ni matauga se fa e uiga i fale matagofie.
Muamua, mai le silafaga a le Alii, o le faavaeina o fale e sili ona matagofie, e faalagolago mea uma i uiga auaumama patino o tagata e nonofo ai iina. O nei fale e le faia ia matagofie i se isi lava ala taua pe mausali e ala i meaafale po o le tausaafia po o tulaga faaagafesootai o tagata e anaina. O uiga aupito matagofie o soo se fale o foliga o Keriso e atagia mai i tagata e nonofo i le fale. O le mea e taua o le mamanu o anoafale o agaga o e nonofo ai i le fale, ae le o le fausaga lava ia.
O uiga paia o Keriso e maua i le “gasologa o taimi”1 e ala i le agaigai i luma ma le loto atoa i le ala o feagaiga. O uiga paia faa-Keriso e teuteuina ai olaga o i latou e taumafai e ola i le amiolelei. Latou te faatutumuina fale i le malamalama o le talalelei, pe o le palapala e fola ai pe o le alei. Tusa lava pe na o oe i lou aiga e mulimuli i le poloaiga e “saili i nei mea,”2 e mafai lava ona e saofaga i le faatotogaina faaleagaga o le fale o lou aiga.
Tatou te mulimuli i le timaiga a le Alii ia “faatulaga [i tatou lava]; ia saunia mea manaomia uma; ma faatu se fale” e ala i le faatulagaina, saunia, ma faavae o tatou olaga faaleagaga, ae lo o tatou fale ma fanua. A o tatou tulitulimatai atu ma le onosai i le ala o feagaiga a le Faaola, o le a avea o tatou fale “o se fale o le mamalu, o se fale o le tulaga maopooo, [ma] o se fale o le Atua.”3
Lua, o e nonofo i fale e sili ona matagofie e faaavanoa se taimi e suesue ai i tusitusiga paia ma upu a perofeta soifua i aso uma. Na valaaulia i tatou e Peresitene Russell M. Nelson “ia liua” ma “toe faafou” o tatou fale e ala i le suesueina o le talalelei.4 O lana valaaulia ua faailoa mai ai e faapea o fale e sili ona matagofie e nofoia e galuega mu’amu’a taua o le tuputupu ae patino ma le toe faafouina o o tatou vaivaiga. O le salamo i aso taitasi o se meafaigaluega o le liua lea e mafai ai ona tatou ola ae ma si agalelei teisi, sili atu ona alolofa, ma sili atu ona malamalama. O le suesueina o tusitusiga paia tatou te latalata atili ai i le Faaola, o le o lona alofa agalelei ma le alofa tunoa e fesoasoani ia i tatou i lo tatou tuputupu ae.
O le Tusi Paia, Tusi a Mamona, ma le Penina Tau Tele o loo ta’u mai ai tala i aiga, o le mea lea e le o se mea e ofo ai i na voluma paia o ni tusitaulima e le mafaatusalia mo le fauina o fale e sili ona matagofie. O loo faamatala mai ai popolega a matua, o le malaia o faaosoosoga, o le manumalo o le amiotonu, o tofotofoga o le oge ma le mau, ma matautia o taua ma taui o le filemu. O loo faaali mai pea lava pea e tusitusiga paia ia i tatou le ala e faamanuiaina ai aiga e ala i le ola amiotonu ma le ala e toilalo ai e ala i le tulimata’ia o isi ala.
Tolu, o fale matagofie e mulimuli i le atatusi tupito na fatuina e le Alii mo Lona fale e sili ona matagofie, o le malumalu lea. O le fauina o se malumalu e amata i laasaga faavae—faamamaina o le vao ma faalaugatasia le laueleele. O na uluai taumafaiga e tapena le laueleele e ono faatusa i le tausia o poloaiga faavae. O poloaiga o le faavae lea e fausia ai le tulaga faalesoo. O le tulaga faalesoo mautu e taitai atu ai i tatou ia mausali, tumau, ma le le maluelue,5 e faapei o le auivi u’amea mo se malumalu. O lenei auivi mautu e mafai ai e le Alii ona auina mai Lona Agaga e suia o tatou loto.6 O le iloa ai o se suiga maoae o le loto e faapei o le faaopoopo atu o ni vaega matagofie i le anoafale o se malumalu.
A o tatou faaauau pea i le faatuatua, o le a suia malie e le Alii i tatou. Tatou te mauaina Ona fofoga i o tatou mata ma amata ai ona atagia mai le alofa ma le matagofie o Ona uiga.7 A o tatou avea atili e faapei o Ia, o le a tatou lagonaina le toafimalie i Lona Maota, ma o le a Ia lagonaina foi le toafimalie i o tatou foi lava [fale].
E mafai ona tatou tausisia le fesootai valalata atu o o tatou fale i Lona maota e ala i le faaagavaaina mo le ma le faaaogaina o se pepa faataga o le malumalu i le tele e mafai ai i tulaga. A o tatou faia lena mea, o le a i ai foi le paia o le maota o le Atua i o tatou foi fale.
O le Malumalu matagofie o Sate Leki o loo tu lata ane. Na fauina e paionia i meafaigaluega matavale, o anomea i le lotoifale, ma galuega fita e le uma, ma na fauina le malumalu mai le 1858 e oo atu i le 1893. O le mea aupito sili na ofoina atu e uluai tagata o le Ekalesia i le faa-enisinia, tusiata fale, ma le mamanuina o le anoafale, na fofoaina ai se fatuga maoae ua lauiloa i le faitau miliona.
Toeitiiti atoa le 130 tausaga ua mavae talu ona faapaiaina le malumalu. E pei ona ta’ua e Elder Gary E. Stevenson ananafi, o mataupu faavae faaenisinia na faaaoga e mamanu ai le malumalu ua suia nei i tulaga e fou atu ma saogalemu. O le le faamalolosia o le tulaga faaenisinia ma le le toe faaleleia o vaivaiga faalefausaga o le malumalu o le a faalataina ai le talitonuga o paionia, o e sa faia mea uma sa latou mafaia ona tuua ai lea o le vaaiga o le malumalu i augatupulaga e sosoo ai.
Sa amataina e le Ekalesia se galuega faatino e fa-tausaga o le toefuataiga e toe faaleleia ai le malosiaga faalefausaga ma malosiaga faalenatura o le malumalu.8 O le faavae, fola, ma puipui o le a faamalolosia. O le poto aupito sili faaenisinia o i ai i le taimi nei, o le a aumaia ai le malumalu i tulaga faaona po nei. O le a le mafai ona tatou vaai i suiga faalefausaga, ae o o latou aafiaga o le a tino mai ma e taua. I lenei galuega uma, o le a faapolopoloina ia vaega matagofie o le mamanu o le anoafale.
E ao ina tatou mulimuli i le faataitaiga ua tuuina mai ia i tatou e le toe faafouga o le Malumalu o Sate Leki ma faaalu se taimi e iloilo ai o tatou lava tulaga faaenisinia faalenatura faaleagaga ina ia mautinoa o tatou ogatusa ma le taimi. O le iloiloina faavaitaimi o oe lava ia; e o faatasi ma le fesili i le Alii, “Se a se mea o toe ou te lei faia?”9 e mafai ona fesoasoani ia i tatou taitoatasi e saofaga atu ai i le fauina o ni fale e sili ona matagofie.
Fa, o fale sili ona matagofie o ni malutaga mai afā o le olaga. Ua folafola mai e le Alii e faapea, o i latou o e tausia poloaiga a le Atua e “manuia i le laueleele.”10 O le manuia a le Atua o le mana lea e fetaomi atu ai i luma e ui lava i faafitauli o le olaga.
I le 2002, sa ou aoaoina ai se lesona taua e uiga i faafitauli. A o i ai i Asunción, Parakuei, sa matou fono ma peresitene o steki o le aai. I le taimi lena, sa feagai Parakuei ma se mafatiaga matuia tautupe, ma e toatele tagata o le Ekalesia sa mafatia ma sa le i gafataulimaina mea e manaomia. Ou te lei toe oo i Amerika i Saute talu mai la’u misiona ma ou te lei vaai lava i Parakuei. Sa na o ni nai vaiaso talu ona ou auauna atu i le Au Peresitene o le Eria. O lo’u le mautonu e uiga i lo’u le gafatia ona tuuina atu se taitaiga i na peresitene o siteki, sa ou fesili atu ai ia te i latou e ta’u mai ia te a’u na o ni mea o sologa lelei ia latou siteki. O le peresitene o le siteki na muamua, sa ia ta’u mai e uiga i mea sa sologa lelei. Sa ta’u mai e le isi na sosoo ai ia mea sa sologa lelei ma ni nai faafitauli. E oo atu i le taimi o le peresitene o le siteki na mulimuli, sa ia ta’ua na o se soloa’iga o luitau na oso ai le le fiafia. A o faamalamalama mai e peresitene o siteki le ogaoga o le tulaga, sa faateleina lo’u popole, toetoe ina a le mautonu i le tala e fai.
Ina ua taufaaiuiu tala a le toe peresitene o le siteki, sa oo mai se manatu i lo’u mafaufau: “Elder Clayton, fai atu ia i latou le fesili lea: ‘Peresitene, mai tagata o a outou siteki o e totogi atoa se sefuluai, totogi se taulaga anapogi limafoai, faalautele o latou valaauga i le Ekalesia, e asiasi moni i a latou aiga o ni faiaoga o aiga po o faiaoga asiasi11 i masina taitasi, faia afiafi faaleaiga, suesue i tusitusiga paia, ma faia tatalo faaleaiga i aso taitasi, e toafia o i ai ni faafitauli e le mafai ona latou taulimaina e i latou lava e aunoa ma le tau la’a atu o le Ekalesia e foia ia faafitauli mo i latou?’”
I le tali atu i le uunaiga sa ou mauaina, sa ou fesili ai i peresitene o siteki i lena fesili.
Sa latou tilotilo mai ia te a’u ua tete’i ma le lē magagana ona faapea mai lea, “Pues, ninguno,” o lona uiga “Ia, e leai a se isi.” Sa latou faamatala mai ia te a’u e leai se tagata, o e na faia uma na mea e i ai ni faafitauli sa latou le mafaia ona foia e i latou lava. Aisea? Aua sa latou nonofo i fale e sili ona matagofie. O lo latou ola faatuatua na latou maua ai le malosiaga, vaaiga mamao, ma le fesoasoani faalelagi sa latou manaomia i faigata o le tamaoaiga lea e siomia ai i latou.
E le faapea ai o le a le mama’i e amiotonu, mafatia i faalavelave faafuasei, feagai ma faaletonu tau pisinisi, pe fetaiai foi ma isi faigata o le olaga. E aumaia pea lava e le olaga nei ia luitau, ae i le aula’iga o taimi ua ou vaai ai ia i latou o e taumafai e usiusitai i poloaiga e faamanuiaina i lo latou agai pea i luma ma le toafilemu ma le faamoemoe. O loo avanoa na faamanuiaga i tagata uma i soo se mea.12
Na tautino mai e Tavita, “Afai e le atiina ae e le Alii le fale, e galulue fua i latou o e atiina ae.”13 Po o fea lava e te nofo ai, pe o a lava foliga o lou fale, ma pe o le a lava foi le tulaga o lou aiga, e mafai lava ona e fesoasoani e fauina le fale e sili ona matagofie mo lou aiga. Ua saunia e le talalelei toefuataiina a Iesu Keriso ia fuafuaga mo lena fale. O le Faaola o le enisinia atoatoa, tufuga, ma le mamanu anoafale. O Lana galuega faatino o le faaatoatoaga ma le olioli e faavavau o o tatou agaga. Faatasi ai ma Lana fesoasoani alofa, e mafai ai e lou agaga ona avea ma mea uma e finagalo ai o Ia e avea ai, ma e mafai ona avea oe ma ituaiga aupito silisili o lou lava tagata.
Ou te molimau atu ma le agaga faafetai o loo soifua le Atua ma le Tama o i tatou uma. O Lona Alo, le Alii o Iesu Keriso, o le Faaola ma le Togiola o tagata uma. E alolofa atoatoa i La’ua ia i tatou. O Le Ekalesia a Iesu Keriso o le Au Paia o Aso e Gata Ai o le malo o le Alii i le lalolagi. O loo taialaina e perofeta soifua ma aposetolo i ona po nei. E moni le Tusi a Mamona. O le talalelei toefuataiina a Iesu Keriso o le atatusi tupito atoatoa mo le faavaeina o fale e silisili ona matagofie. I le suafa o Iesu Keriso, amene.