Hi’o ma te mata ’āpī, Fa’aro’o ma te tari’a ’āpī, Paraparau ma te arero ’āpī

Nā Elder Allistair B. Odgers

Hitu Ahuru Area

’Ua parau Elder Marvin J. Ashton nō te pupu nō te Tino ’Ahuru Ma Piti ’āpōsetolo : « Te fa’a’itera’a rahi roa a’e ’e te pāpū nō tō tātou haerera’a i mua ’e tō tātou haerera’a i te Mesia, ’o te huru ïa o tā tātou ravera’a i te tahi atu mau ta’ata ».¹

Mai te mea ’ua vai te hōho’a o te Mesia i ni’a i tō tātou nei mata ’e tē hi’o ra tātou nā roto i te mata o te Mesia, e noa’a mai ia tātou te ’aravihi rahi a’e nō te hi’o i te hōho’a o te Mesia i ni’a i tō vetahi ’ē mata. E fa’ateitei te reira i tō tātou hina’aro ’ia rave maita’i a’e ia vetahi ’ē.

Tītauhia ’ia ora tātou i ni’a atu i te mea tā tātou e ’ite nei—’e ’ia ora tātou i ni’a atu i tā tātou iho hi’ora’a ’e tā tātou mau tītaura’a nō te hi’o ia vetahi ’ē ma te māramarama ’āpī.

’A fa’ata’a ai tātou ’e ’a feruri ai i te hō’ē huru ’āpī nō te rave i te mau ta’ata, e ti’a paha ’ia ui tātou ia tātou iho ē : tē ’ite ra ānei tātou i tō tātou mau Golia ’ei fifi rahi roa e’ita e pohe ’ia tātou ’aore rā e’ita e mara’a ia tātou ; ’aita rā, mai ia Davida tātou i te hi’o—mea nā roto i te mata o te Atua—nō te rahi o Golia e’ita e nehenehe e’ita e tano.

E mea maita’i ē, i terā tītaura’a manihini ’ia « ’ana’anatae i te ’ohipa maita’i » nō te ha’amaita’ira’a i te huru tā tātou e rave ia vetahi ’ē, tē mana’o nei au ē ’aita tātou e ha’ape’ape’a roa ra nō te mau ha’amaita’ira’a tei tītauhia ia tātou ’ia rave i roto i tō tātou iho orara’a. ’A ha’amana’o na ē, rahi noa atu tātou i te ha’amaita’i ia tātou, rahi noa ato’a atu ā te maita’i tā tātou e ’ite i roto ia vetahi ’ē.

1. Te huru tā tātou e paraparau ’e e rave te tahi i te tahi, ’o te huru ïa tā tātou e paraparau ’e e rave i te Mesia. ’Aita e ta’a-’ē-ra’a.

E mea ta’a ’ē te huru terā ’e terā ta’ata e paraparau ’e e mea ta’a ’ē te huru terā ’e terā ta’ata e fāri’i i te parau, ’āre’a rā, e ’imi ana’e i te tahi atu mau rāve’a nō te ‘hi’o’ ia vetahi ’ē ’e nō te paraparau maita’i a’e ia rātou.

’Eiaha ’oe e riri. Mai te mea ē ’ua tano tātou, e’iaha tātou e riri, ’e mai te mea ’ua hape tātou, ’eiaha ato’a ’ia nā reira.

’Ua nā ’ō Elder Lynn G. Robbins nō te Hitu ’Ahuru : « E mā’itira’a te riri. ’O te ti’amāra’a ’ia mā’iti. Mai te mau fa’aotira’a tā tātou e mā’iti. Tītauhia ia tātou ’ia feruri i te fa’aotira’a ’ia mā’iti ’eiaha e riri. ’O te ’ino’ino te teina nō te riri, ’o te fa’a’utu ’aore rā te fa’ariri te taea’e fa’a’amu o te riri ’e ’o te hae te tua’ana o te riri. »²

’Oia mau, e hapa tā tātou pā’āto’a, nāhea rā tātou ’ia rave i tā vetahi ’ē hapa ? E mea maita’i ’ia tāpo’i tātou i te hapa o tō tātou mau ta’ata tupu i te ’ahu nō te aroha, inaha e tītauhia paha te ’ie ’ā’ano maita’i nō te tāpo’i i tō tātou nei.

Tē nā ’ō ra te Mataio 25:40 : « ’O ’outou i nā reira i te hō’ē taea’e iti ha’iha’i roa i roto i tā’u mau taea’e nei, ’ua nā reira ïa ’outou iā’u ».

Nō reira, mai te mea ’ua riri tātou ’aore rā ’ua ha’amata tātou i te fa’ateitei i te reo ’aore rā ’ua ha’amata te ta’ira’a reo i te au ’ore, ’aore rā e mea hāmani ’ino tātou i te ta’ata, ’aita tātou e nā reira noa i ni’a i terā ta’ata, tē nā reira ato’a ra rā tātou i ni’a i te Fatu Iesu Mesia. E nehenehe e parau ē, ’ua tū’ati tō tātou here i te Mesia i tō tātou here nō te ta’ata tā tātou e au iti roa a’e.

2. E aha te ta’a-’ē-ra’a i roto i te ravera’a a Simona te pharisea ia Iesu Mesia, ’e te ravera’a a te vahine i roto i te parabole i roto i te Luka pene hitu ?

’Ua ha’api’i Elder James E. Talmage ē : « E peu i terā ra tau e ha’apa’o ta’a ’ē i te mau manihini rahi ; e fāri’i iāna ma te ’āpā iāna, e hōro’a iāna i te tahi pape nō te horoi i te repo i ni’a i tōna ’āvae ’e te tahi hinu nō te fa’atāhinu i tōna rouru ’e te huruhuru ta’a. »³

E pharisea ’o Simona ; e melo nō te hō’ē ha’apa’ora’a fa’aro’o ’eta’eta mau i roto i te ha’apa’ora’a i te ture a Mose. Te ’amutārahu 50 denari i roto i te parabole, ’o Simona ïa (Luka 7:41-47).

’Aita Simona i hōro’a ia Iesu ma’a pape nō te horoi i tōna ’āvae, ’aita ’oia i ’āpā iāna, ’aita ’oia i fa’atāhinu iāna i te hinu. E here iti tō Simona iāna. Noa atu rā, ha’amana’o ana’e ē, tītau-ato’a-hia ia Simona ’ia fāri’i i te fa’aorera’a hapa, mai ia tātou pā’āto’a nei.

Nō te vahine ra, e ta’ata hara ’oia, e 500 denari tāna tārahu i roto i teie parabole. ’Ua horoi ’oia i te ’āvae o te Fa’aora ma tōna roimata ’e ’ua tāmarō i tōna rouru ; ’ua ’āpā noa ’oia i tōna ’āvae ’e ’ua fa’atāhinu i tōna ’āvae i te hinu parai. ’Ua here roa ’oia ’Iāna.

I te taime e fa’a’ite tātou i tō tātou here ’e te pūpūra’a ia tātou i te Fatu ra Iesu Mesia, e nehenehe tātou e ’ite i tāna fa’a’orera’a hara. ’Ia fāri’i ana’e tātou i te fa’a’orera’a hara a te Fatu, e ’ī tātou i te hina’aro ’ia here rahi a’e ’e ’ia tāvini rahi a’e iāna. ’Ua fa’a’ore hope roa te Mesia i taua vahine ra ’e ’ua here hope ato’a ’oia iāna. ’Ua fa’a’orehia tāna mau hara, e mea rahi ho’i (’īrava 48).

Mai te mea e ta’ata fa’a’ore ri’i noa tātou i te hapa, e ta’ata here ri’i noa ato’a tātou.

3. Mai te mea e’ita tā tātou e nehenehe e fa’a’ore i te hapa a vetahi ’ē, e’ita te Atua e nehenehe e fa’a’ore i tā tātou hara (Mareko 11:24-26).

E mea pa’ari ’ia fa’a’ore i te hapa, e mea ata’ata ’e e mea ’ana’anatae.

E mea pa’ari nō tō tātou nātura ta’ata,
E mea ata’ata nō te mea e fa’ahepo te reira ia tātou ’ia amo i te hōpoi’a nō te haerera’a i mua nō ananahi, ’e
E mea ’ana’anatae nō te mea e fa’ati’amā te reira ia tātou nō te riro mai i te ta’ata maita’i roa a’e e noa’a ia tātou.

’Ua parauhia ē : te ’orera’a e fa’a’ore i te hapa a te hō’ē ta’ata, mai te pātiara’a ïa i roto ia tātou i te tahi rā’au ta’ero ’a tīa’i noa atu ai ’ia pohe taua ta’ata ra.

Nō reira—nāhea tātou i te taime e rave ai te hō’ē ta’ata i te hō’ē ’ohipa hape ?

Te Parau Ha’api’ira’a ’e te mau Parau Fafau 121 : Tē hōro’a nei te mau ’īrava 43-44 i te mau ta’ahira’a nō te ha’apa’o i te hara a te hō’ē ta’ata.

Rave ’oi’oi ’e rave pāpū i terā fifi [te hara]. E mea faufa’a ’ia vai pāpū ’e ’ia vai au.
Pāhono maoti te mana o te Vārua Maita’i ; ’eiaha rā nā roto i te riri.
Fa’a’ite i te here rahi atu ā.
E ’ere tā tātou fā te hāmani-’ino-ra’a ia vetahi ’ē, te tūpa’ira’a ia rātou ’aore rā te ha’apēpēra’a ia rātou. ’Aita, tītauhia ’ia fa’aro’o noa tātou i te Atua ; ’e ’ia fa’atura noa ’e ’ia pāruru noa i te ta’ata tei hapa.

E ’ere te fa’aorera’a hapa i te fa’a’ore-noa-ra’a i te ’ohipa a te ta’ata hara ’aore rā te ta’ata tei ha’apēpē ia tātou, nō te fa’a’ore-ato’a-ra’a i te ’ohipa a te ta’ata tei ’ore i rave i te mea tā tātou e mana’o nei e tītauhia ia rātou ’ia rave.

I terā taime ’e terā mai, e noa’a mai tō tātou ’ino’ino i te mau ta’ata, te mau hoa ’e te mau fēti’i, ’e e mo’ehia tātou ia rātou, tō tātou rā mana’o i ni’a ia rātou, ’e tā tātou ’ohipa i ni’a ia rātou, ’o tō tātou ato’a ïa mana’o ’e te ’ohipa i ni’a ia Iesu Mesia. E riro ato’a te reira ’ei tāmatara’a pāpū ’o vai mau tātou.

Te mau taea’e ’e te mau tuahine, ’aita tā’u e moni ’e te ’auro, nā roto rā i te i’oa o Iesu Mesia, tē ani nei au ia tātou pā’āto’a ’ia ti’a mai i ni’a ’e ’ia hi’o i te mau tamari’i a te Atua ma te mata ’āpī… ’ia fa’aro’o ma te tari’a ’āpī… ’e ’ia paraparau ma te arero ’āpī, ’ia ti’a ia tātou ’ia fa’a’ite nā roto i tā tātou mau parau ’e te mau ’ohipa i ni’a ia vetahi ’ē ē, ’ua fa’afāriu-mau-hia tātou i te Mesia ra.