Nāhea Iosepha Semita i te ’īritira’a i te Buka a Moromona ?
Hou ’oia ’a huna ai i te mau ’āpī auro, ’ua pāpa’i ’o Moroni, te peropheta hope’a o te Buka a Moromona, i ni’a i te ’api upo’o parau ē, e ’īritihia te buka « nā roto i te hōro’a ’e i te mana o te Atua. » Tē vai noa nei te reira ’ei fa’ata’ara’a maita’i roa a’e nō te ’īritira’a o te Buka a Moromona.
’Ua ’auvaha ’o Iosepha Semita i te mau parau o te ’īritira’a i mua i te mau ta’ata pāpa’i, i te rahira’a o te taime ’o Oliver Cowdery. Nō te mea ho’i ē, tē ’īriti nei Iosepha i te hō’ē reo ’ite-’ore-hia, tītauhia iāna ’ia ti’aturi i ni’a i te Fatu. Hō’ē rāve’a tā te Fatu nō te tauturu, o te hōro’ara’a mai ïa i te mau mauha’a tino nō te tauturu ia Iosespha i te ’īritira’a. ’Ua parau te mau ’ite ē, ’ua hi’o Iosepha i roto i te mau mauha’a ’e e ’ite ’oia i te mau parau nā roto i te reo peretāne. Teie mau mauha’a ’īriti parau, tē vai ra te « ’īriti parau » ’aore rā, « te urima ’e te tumima »—e piti ’ōfa’i teatea tei tā’amuhia i roto i te hō’ē hiti auri ’ia nehenehe ia Iosepha ’ia hi’o i roto i te reira. ’Ua hōro’ahia teie mau mea ia Iosepha e tae noa atu i te mau pāpa’a parau. Te tahi atu mauha’a tā Iosepha i fa’a’ohipa o te hō’ē ïa « ’ōfa’i hi’o », tāna e hi’o i roto, pinepine nā roto i te tu’ura’a i roto i te hō’ē taupo’o. ’Ua ’itehia ia Iosepha teie ’ōfa’i nā mua atu ’e ’ua fa’a’ohipa ’oia i te reira nō te ’imi i te mau mea hunahia ’aore rā, te mau mea mo’e. ’Ua fa’a’ohipa ’oia i te ’īriti parau ’e te ’ōfa’i hi’o ’a ’īriti ai ’oia i te parau, ma te ti’aturi tāmau noa i ni’a i te fa’aurura’a o te ra’i ra.
E ’ohipa temeio mau te ’īritira’a o te Buka a Moromona ’e ’ua ravehia te reira « nā roto i te hōro’a ’e te mana o te Atua. »