i Yaya ni Veiqaravi na Koniferedi Raraba

Ena vei vosacavuti veilaveti kece, itovo tudei vakamatavuvale, kei na ivakavuvuli mai vei ira na italai ni Turaga, na koniferedi raraba e vakavurea vei keda e vuqa na sala ni veiqaravi—ni bera, ni yaco tiko, se ni oti na mua ni macawa ni koniferedi raraba!

iVakatakilakila

scenes from general conference

Me vaka ni rau qasenivuli ni kalasi ni vakavakarau ni kaulotu, o Susie kei Tom Mullen erau dau bolei ira vakawasoma na lewe ni nodrau kalasi me ra sureta e dua me sarava na koniferedi raraba.

“Nona sureti e dua me cakava e dua na ka e tiki bibi ni cakacaka vaka daukaulotu, ka yaga tale ga ki na veiqaravi,” a tukuna o Susie. “O ira neirau gonevuli era dau tukutuku lesu mai vakawasoma ena kena dau tini vinaka vei ira ka vaka kina o ira ka ra sureti.”

Oqo e vica vei ira na sala era tukuna na gonevuli ni ra dau dolele yani kina:

“Keimami veiqaravi vua e dua na itokani ka sotava tiko eso na bolebole ni bula. Keimami a sureti koya me vakarorogo ki na koniferedi raraba me baleta na isau ni taro. Ni keimami sikovi koya ni oti na koniferedi raraba, e tukuna ni rogoca e vuqa sara na vei vakasama vinaka ka rawa ni veivuke.”
“Keimami a cakava e dua na kana vata ni koniferedi raraba ka kauta yani na ivakalomavinaka me wasea vata. A taleitaki sara vakalevu ka nanumi me na caka tale.”
“Au a sureta e dua na itokani me sarava na koniferedi raraba vata kei au. Ni keitou veivosaki kina, keitou nanuma me keitou draiva yani ki na valenisoqoni me raica se keitou rawa ni sarava kina. Keitou cakava, ka sa cecere na veika e sotavi mai kea!”

Me vaka erau sa vulica na Mullens kei ira na nodrau gonevuli, e vuqa tu na sala meda veiqaravi kina ni vakayagataki na koniferedi raraba. E dua na sala vakasakiti me ra wasea na vosacavuti veilaveti, na ivalavala tudei vakamatavuvale, veivosaki vakatitobu, kei na nodra ivakavuvuli na italai ni Turaga!

Sureti ira na Tani ki na Nomu iTikotiko

“Na iVakabula a vakaroti ira Nona tisaipeli mera ‘veilomani me; vaka kau sa lomani kemudou’ (Joni 13:34). Meda raica sara na sala e lomani keda kina o Koya. … Kevaka eda tauri Koya me noda ivakaraitaki uasivi, sa dodonu meda tovolea me dodoliga yani vei ira na tamata kecega.” —Peresitedi Dallin H. Oaks¹

Ena vica na yabaki sa oti neitou dauveituberi ni matavuvale vinaka o Mike a raica ni o iratou na luvequ e tolu kei au e tiko edua neitou komupiuta lailai me sarava kina na koniferedi raraba. E a sureti keitou sara ki na nona vale me sarava vata kei watina o Jackie, ka cikeva ni keitou na taleitaka na veitokani. Ratou a marau na noqu gone me sarava na koniferedi ena dua na TV dina; Au taleitaka sara na veitokoni; ka marautaka na neitou gauna vata.

Oti o ya, na sara koniferedi raraba vata sa yaco me dua na ivalavala tudei. Ena gauna mada ga sa dua kina na neitou TV, keitou marautaka ga me gole vei Mike kei Jackie vata kei na neitou ilokoloko, ivolalailai, kei na ivakalomavinaka me baleta na koniferedi raraba . Rogoca vata na nodra vosa na parofita sa ka vakamareqeti sara. Keitou yaco me vaka edua na matavuvale. O Mike kei Jackie erau yaco me so vei ira noqu itokani voleka sara ka rau ikarua ni tubudra na luvequ. Na nodrau loloma kei na veitokani sa dua na veivakalougatataki cecere ki na noqu matavuvale. Au vakavinavinakataka na nodrau lomasoli me rau dolava na nodrau vale kei na yalodrau vei keitou.

Suzanne Erd, California, Amerika

iVakavuvuli me Vakatavulici

“Raica”

Na iVakabula ena loloma a taura na gauna me raica na nodra gagadre na tamata ka cakacaka me sotava na veigagadre o ya (raica na Maciu 9:35–36; Joni 6:5; 19:26–27). Eda rawa ni da cakava na ka vata oqo.

“Sureti vakatotolo”

Ni oti na noda raica na nodra gagadre o ira eda veiqaravi kina, na ikalawa e tarava o ya meda yavala sara.“Rogoca na nodra vosa na parofita”

E dodonu meda “dausoqoni vata wasoma” (Moroni 6:5) meda vuli vata, tubu vata, ka veivosakitaka baleta na veika vakayalo ka bibi ki na yaloda.

“Lako mai, rogoca na domona e dua na parofita, ka rogoca na vosa ni Kalou”² e rawa ni dua vei ira na veisureti bibi duadua e rawa ni da vakatetea yani vei ira eda qaravi ira.

“Loloma kei na veitokani”

Me da veivuke ka uqeti ira vakaidina na tani, e dodonu meda tara cake na veitokani ena yalo loloma kei na “loloma sega ni veivakaisini” (raica na Vunau kei na Veiyalayalati 121: 41).

iVakatakilakila

looking at a tablet

Wasea ena Initaneti

“Na sala ni vakau itukutuku raraba sa iyaragi rabailevu ka rawa ni vakayaco-ka ena sala vinaka ki na vuqa na tamata kei na matavuvale. Ia au vakabauta ni sa kena gauna vei keda me vaka na tisaipeli i Karisito meda vakayagataka vakadodonu na iyaya ni cakacaka veivakauqeti oqo me yaga ena vakadinadinataki ni Kalou na Tamada Tawamudu, Nona ituvatuva ni marau vei ira Na luvena, kei Na Luvena, o Jisu Karisito, me vaka ni iVakabula kei vuravura.” —Elder David A. Bednar³

Na initaneti e vakatarai keda meda wasea na kosipeli ki vuravura taucoko. Au taleitaka o ya! Ni tiko e vica na itaviqaravi me baleta na koniferedi raraba, ia e vakavuqa, au tovolea me vukei ira na tani me vakavurea e dua na veivosaki mai na vosa ni koniferedi raraba. Noda raica na taro mai vei ira na tani ena rawa ni vukei keda meda raica na ka ena dua na rai vou ka rawa ni idewadewa ki na noda dui taro me veivosakitaki.

Au sa kunea ni o vakayagataka na taro eso me veivosakitaki kina na vosa mai na koniferedi raraba vata kei na nomu matavuvale ni veiqaravi, e vukei iko mo raica na nodra kaukauwa ka vakakina na veika era gadreva. E dua vei ira na taro au dau taleitaka me taroga, o ya, Na cava o nanuma ni iulutaga mai na soqoni ni koniferedi raraba ka se qai oti koto oqo?

Na isau ni taro e rawa mo raica kina na veika e yaco tiko ena nodra bula kei na veika e bibi vei ira. Sa rawa kina vei iko mo yaco me dua na dauveiqaravi vinaka cake se o tagane se yalewa baleta ni sa rawa mo raici ira vakavinaka cake.

Camille Gillham, Colorado, Amerika

iVakavuvuli me Vakatavulici

“Wasea na kosipeli”

Eda sa veiyalayalatitaka meda “tu ka vakadinadinataka na Kalou ena veigauna kecega, kei na veika kecega, kei na veivanua kecega dou sa tiko kina” (Mosaia 18:9).

“Vakavurea e dua na veivosaki”

Na itukutuku mai na Koniferedi Raraba e rawa ni vakavurea na veitalanoa e veivakurabuitaki, veiganiti, ka liutaki vakayalo. Kei na mataqali veivosaki vakaoqo e rawa ni vaqaqacotaka na nomu veimaliwai, vukea nomu ivakadinadina me tubu, ka kauta mai vei iko na reki! (raica na Vunau kei na Veiyalayalati 50:22).

“Vakayagataka na Taro”

“Na veitaro vinaka eso ena vukei iko mo kila vinaka na ka era taleitaka, nodra kauwai eso, se taro mai vei ira tale na tani. E rawa me toroya cake nomu veivakavulici, sureta na Yalo, ka vukei ira na tamata me vuli.”⁴