E Dua Ga na Veivakalougatataki sai Koya na ka Au Rawa ni Solia
Jonathan Mafra Sena de Santana
mai Santa Catarina, Brazil
Droini mai vei Allen Garns
Au sa vakacavara noqu vuli lawa voleka ki na imatai ni nona siganisucu na luvequ yalewa. Keirau nanamaki kei na watiqu ki na marautaki ni noqu tauri ivola, nona siganisucu neirau goneyalewa, kei na veimadigi vovou ena yaco mai vei keirau, ia e sega ni dua na ka a donu.
Au a sega tu ni cakacaka ni oti e dua na gauna lekaleka ni oti na noqu tauri koroi ka dredre meu kunea e dua na cakacaka. Sega ni dede, sa yaco mai na leqa vakailavo. Me dua mada ga na soqo ni marau lailai ni siganisucu ena dredre.
Ni oti e vuqa na veitalanoa vata kei na watiqu, keirau sa ciqoma na veika keirau sotava tiko. E a sega ni rawarawa vei au niu dua na tama meu sega ni rawa ni volia mada ga e dua na iloloma rawarawa vua noqu goneyalewa ka raica tu nona yalolailai na watiqu lomani.
Au sega ni kila na veika e yaco tiko. Au a masu ka kerea vua na Tamada Vakalomalagi me vukei au meu kila vakavinaka na veika e namaka vei au. Vakasauri ga, me vaka e dua na domo ni vosa ki na noqu vakasama, au rogoca na veivosa oqo: “O taukena e dua na ka yaga vakalevu duadua mai na veika kecega eda taukena ena vuravura oqo. E tu vei iko na matabete. Na iloloma vinaka cake cava e rawa ni o solia vei nomu goneyalewa mai na veivakalougatataki ni matabete?”
E tonawanawa na wainimataqu niu vakasamataka na kena ibalebale vei au na matabete. A vakasinaiti na yaloqu ena vakavinavinaka niu vakasamataka ni matabete sai koya na kaukauwa e rawa ni vakaduavatataka noqu matavuvale me tawamudu.
Au wasea na noqu nanuma vua na watiqu. Au tukuna vua ni ka duadua ga au rawa ni solia sai koya meu solia e dua na veivakalougatataki vei neirau goneyalewa. Keirau sa lewa vata ni oqo ena kauta mai na marau kei na vakacegu vua, sa rauta vinaka oya.
Ena nona siganisucu na luvei keirau yalewa, era kauta mai na itokani kei ira na wekai keitou e dua na keke kei na iukuuku rawarawa. Keitou vakavinavinaka ni keitou marautaka na siga talei oqo vata kei ira keitou lomana. Ena bogi oya au kotora na ligaqu e ului noqu goneyalewa ka vakalougatataki koya. Au vakalougatataki koya ena veika kece sara a vakauqeti au kina na Yalo ni Turaga meu tukuna.
Keitou se sotava tikoga na gauna ni veisau kei na bolebole me baleta na sega ni cakacaka kei na bula vakailavo. Ia ena loma sara mada ga ni yalorarawa kei na lomalailai, e yaco mai vei keirau na sautu kei na vakacegu mai vua na noda iVakabula, o Jisu Karisito. Au sega ni vakatitiqataka ni lewena Na Lotu i Jisu Karisito ni Yalododonu Edaidai vata kei na kaukauwa ni matabete sa dua na veivakalougatataki. Sai koya ga na ka au a rawa ni solia ena nona siganisucu na luvequ yalewa, ka sa rauta vakavinaka.