Te Kabanea n Taeka
Nako ao Karaoia ma Onimakinan te Atua
Iroun Beretitenti Henry B. Eyring
Kauoman ni Kauntira n te Moan Beretitentii
Man te marooro n te maungatabu ni kabuta n Okitobwa 2010.
Te kairake are Nibwaai n Ana Boki Moomon e kakibea inanona te nano ni kan karikirakea onimakinan te Uea n ongotaeka nakon Ana tua. Nibwaai e kaitarai kangaanga ao e kuri ni mate ngke e taekin taeka n onimaki aikai bwa ti kona ao ti riai n namakinna ae nene inanora: “N na nako ao N na karaoi baike e a tia n tua te Uea, bwa I ataia bwa e na bon aki anga te kaetieti te Uea nakoia natiia aomata, ma ti ngkana e a tia ni katauraoa te kawai ibukiia are a na kona iai ni kakoroa bukin te bwai are e tua nakoia bwa a na karaoia” (1 Nibwaai 3:7).
Te onimaki anne e roko man ataakin te Atua. Ti a tia ngaira kaain te Ekaretia, n raka riki nakoia aomata iaon te aonaaba, ni karekea, rinanon waaki aika mimitong ni Kaokan te euangkeiro, n namakina te kakaitau ibukin bwaai ake e a tia ni kaoti te Atua Ibukina bwa tina kona n Onimakinna iai.
Irou e waaki inanon 1820 ma te ataeinimwaane n te buakonikai n te Nne n aroka ni mwakoron New York. Te ataeinimwaane, Iotebwa Timiti Jr., e nakonako nakon te tabo ae onoti ao e katorobubua n tataro ma te onimaki ae bwanin bwa e na kaeka te Atua. Ni katoa tai are I wareka iai rongorongona aei, onimakinan te Atua ao Ana toro e rikirake:
“I noora te oota iaon atuu, ae raka riki otana nakon otan taai, are e ruo ni karaurau ni karokoa e bwaka nako aou.
“… Ngke e tiku te ota i aou I noriia uoman Aomata, ake raneaneaia ao mimitongiia e aki kona ni kabwarabwaraaki, n tei n te eea i etau. Temanna mai ibuakoia e taetae nakoiu, ni weteai n arau ao n taku, ni kotea are temanna—Natiu ae Tangiraki Teuaei. Ongo Irouna!” (Iotabwa Timiti—Rongorongo 1:16–17).
Te Tama e kaotia nakoira bwa E maiu, bwa Iesu Kristo bon Natina ae Tangiraki, ao e tau ana tangira ibukira bwa e na kanakoa Natina bwa e na kamaiura. Ao ibukina bwa iai au koaua bwa E wetea te ataeinimwaane anne bwa e na riki bwa te burabeti, I onimakiniia Ana abotoro ao burabeti ni boong aikai ao naake e weteiia bwa a na beku ibukin te Atua.
Ko kaota am onimaki iroun te Atua ngkana ko kakauongo ma te nano ni kan reirei ao n rairannano ao ngkanne ko nako ao ko karaoi bwaai nako ake E tua. Ngkana e tau onimakinan te Atua n ongora nakon Ana rongorongo ni kaunganano, kaetieti, ao te kairiiri mairouia Ana toro, kona kunei. Ao ngkana ko nako ao ko karaoi bwaai ake E tangiria bwa kona karaoi, korakoram n onimakinna e na rikirake, ao n te taina kona kaonaki n te kakaitau ni kunea bwa E na onimakiniko.