Wan Tank blong Testemoni
Pikja i kam long Phil, i2iArt.com
Long ol senia yia blong mi long hae skul, papa mo mama blong mi, tufala i bin divos. Blong plante yia, mi bin stap wajem papa blong mi we i no stap tekem sakramen. Mi save se hem i gat hadtaem blong obei olgeta komanmen, be mi no save andastanem se hadtaem ia i stap longlongtaem. Taem we papa mo mama blong mi i talem se papa i eskomuniket, nao sista blong mi mo mi i jes lanem evri ditel.
!Mi no laekem yu nating!” Mi singaot long hem, plante, plante taem wetem wota i fulap long ae. Mi harem mi kros bigwan. ?Hao nao papa i save mekem hemia long famli blong mifala? Mi tingting long hemia miwan. ?Olsem wanem nao hem i save giaman long mifala blong wan longfala taem?
Filing blong mi blong sek long fas taem, mo kros ia, i no stap longtaem. Afta sam wik, kros blong mi i go lus we mi nomo filim wan samting. Fas taem, blong no filim wan samting i wan wei blong givhan long mi blong mi nomo filim kros mo harem nogud, be long en, harem gud ia i kam we tingting blong mi i lus evriwan, we mi nomo gat hop. Mi filim se laef blong mi i go brokbrok i folfoldaon raon long mi. Long tetaem ia, moa bitim bifo, mi filim se mi nid blong mi mas konek wetem heven. Mi nidim blong filim lav blong God; mi nidim blong filim se God i stap lidim mi, i givim pis mo i hilim mi.
I no longtaem afta, jeneral konfrens i kam. Long wan sesen, mi bin lisin mo stap wet blong filim kamfot blong God. Be hemia i no kam. Long ples ia, insaed long japel we i tudak, mi tingting se, mi no save filim Tabu Spirit, be mi mi save stret se Hem i stap long ples ia. Hem i mas stap long ples ia. Taem mi stap tingting long hemia, mi stat blong tingbaot evri smol witnes we mi bin kasem se ol skripja oli tru, se Josef Smit i wan profet, se Papa long Heven i bin blesem famli blong mi, mo we blong stap obei long ol komanmen, i tekem pis i kam. I olsem we mi bin gat wan tank blong testemoni.
Moa mi tingting i gobak long ol witnes blong bifo long saed blong spirit, moa mi luksave se, nomata mi wantem tumas blong filim Spirit, i no bin mata tumas se mi no bin save filim paoa blong Hem i lidim mi long stret taem ia. Mi bin gat wan stoa finis, we i fulap long kwaet witnes we Hem i stap givim se gospel ia i tru.
Save ia i sapotem mi, mo i bin givim long mi, filing ia blong wantem gohed blong obei long ol komanmen, iven we i luk se i no gat wan kwik ansa i kamaot. Sloslo, mi filim lav blong Papa long Heven mo Sevya moa insaed long laef blong mi. Blong stap kolosap long Tufala, iven we mi no save oltaem filim se Tufala i stap kolosap long mi, i tekem wan pis ia, we mi no save tanem baksaed long hem, mo i tekem wan moa strong testemoni abaot gospel blong Sevya. Hemia i gohed blong lidim mi naoia taem mi stap fesem wan bigfala hadtaem we mi no sua long wanem we i stap, o taem we mi harem nogud long wan samting long hat blong mi. Mi save se mi save trastem Papa long Heven mo Sevya, mo we bae Tufala i hilim, leftemap, mo mekem wanwan long yumi i kam strong moa.