I Tulaga Aao o Iesu
E alala le tusitala i Iuta, ISA.
O lo’u igoa o Maria. Ou te nofo i Isaraelu ma lou aiga. E tele o matou aafiaga faapitoa a o savavali i mea ua leva ona femaliuai ai Iesu.
Peteleema
O se tasi nofoaga faapitoa sa matou asiasi i ai o Peteleema, lea na soifua mai ai Iesu. Na malaga Maria ma Iosefa e tusa ma le 90 maila (144 km) mai lo latou fale i Nasareta. Sa matou asia se falesa na fausia i le mea na manatu tagata sa i ai le fale o manu.
Sa matou vaaia foi laufanua e lata ane i Peteleema. O loo tausia ai pea e leoleo mamoe a latou lafu iina, e pei ona latou faia i le po na soifua mai ai Iesu. Sa matou faalogo i leo baaing o mamoe a o matou pepese “Sa Iutaia o Leoleo Lelei” (Viiga, nu. 121). O le a ou manatua pea ou lagona a o usuina lena pese.
O Le Sami o Kalilaia
O le Sami lenei o Kalilaia. O se vaituloto matagofie sa aoao atu ai e Iesu le faitau afe o tagata ma faia vavega e tele. Sa ou matua lagonaina lava le Agaga iina. E i ai se lagona toafilemu e tau mai ai ia te au mea paia na tutupu iina.
Ou te fiafia e alu i nofoaga na femaliuai ai Iesu, e pei o le Vaitafe o Ioritana, lea na papatisoina ai Iesu. Pe a ou i ai i nei nofoaga, ou te savalivali solo ma le filemu e latalata i tagata o loo tapuai atu ia Iesu e ala i le faamumuina o moligao ma tootutuli i le tatalo. Ou te lagona pea i lou loto o loo fiafia le Tama Faalelagi ma Iesu Keriso i tagata o e faaali lo latou alofa mo i Laua.
Ierusalema
O Ierusalema o se aai tele. I le Aso Sa a o lei faasatauroina o Ia, sa tietie atu ai iina Iesu i luga o se asini (tagai i le Mataio 21:1–11). Sa faafeiloaia o Ia e tagata i totonu o le aai e ala i le talotalo o laupama ma alalaga, “Osana!”
O Aso Sa i tausaga taitasi a o lumanai le Eseta, e mulimuli ai tagata i le ala na maliu ai Iesu e agai atu i Ierusalema. Latou te aveina laupama ma usu ni pese e uiga ia Iesu. I se tasi tausaga na auai lou aiga ma isi tagata Kerisiano i lenei savali. Sa matagofie le lagona o le alofa o tagata uma mo lo latou Faaola.
E te le tau savali i le ala na savali ai Iesu ina ia mulimuli ai i ona tulaga aao. E mafai ona e mulimuli i Lana faataitaiga i soo se mea!