Iesu Keriso: O Le Puna o le Olioli Tumau
Saunia e Elder David A. Bednar
O Le Korama a Aposetolo e Toasefululua
Mai se saunoaga i le faigalotu, “Ina ia Latou Maua le Olioli,” na tuuina atu i le Iunivesite o Polika Iaga i le aso 4 o Tesema, 2018.
E mafai ona maua e tagata taitasi o le Ekalesia toefuataiina a le Alii o loo taumafai e manatua ma faamamalu i feagaiga paia ma tausi i poloaiga ona maua le meaalofa o le olioli tumau.
Ata o le Soifua Mai o Iesu Keriso, na tusia e Michael Malm
Sa ou auai talu ai nei i se sauniga molimau na malosi le faaleagaga ma faalogologo ma le totoa i se tuafafine tuuto sa tautino mai, “Ua ou maua le olioli tele ona o le fuafuaga o le faaolataga a le Tama.”
Sa vave ona manino mai ia te au o le mea moni e faapea sa lei tautala lava lenei fafine i upu masani. O le malamalama lea na susulu mai i ona fofoga, o le mamalu faaleagaga o lona leo, o le susulu ma le toafilemu o ona foliga—o mea uma e uiga ia te ia sa faamautu mai ai le moni o mea sa ia saunoa mai ai. Na faatumulia o ia i le olioli. Sa ia faasusuluina atu le olioli. E moni lava, sa avea atili ai o ia e faapei o le Faaola ma mauaina Ona fofoga i ona mata (tagai i le Alema 5:14), o se vaega o le liua ai i le olioli.
O lona faaalia o le faatuatua na mafai ai ona ou manatua upu o nisi o viiga masani:
Ma le faatuatua, tatou te uu ai le ai uamea
Ma maua ai i lenei lo tatou olioli.1
O mai, o mai, outou le Au Paia;
Galulue fiafia. …
Ua sili lava le taumafai
Ia tiai ia le faavaivai;
Ae faia pea, ma fiafia—
Ua Lelei! Ua Lelei!”2
O lea, ou olioli ai:
“Ua ou iloa lou Faaola ua soifua Ia i luga!”3
Ma i lenei vaitau o le Kerisimasi, o le a tatou usuina:
“Tala fiafia o le olioli tele na ou aumaia
Ia te oe ma tagata uma.”4
Ma le
Talu ona avea ma Peresitene O Le Ekalesia a Iesu Keriso o le Au Paia o Aso e Gata Ai, ua masani ona tuuina mai e Peresitene Russell M. Nelson se valaaulia i tagata o le lalolagi e aofia ai le folafolaga o le olioli: “O la matou savali i le lalolagi e faigofie ma faamaoni: matou te valaaulia fanau uma a le Atua i itu uma e lua o le veli e o mai i lo latou Faaola, mauaina faamanuiaga o le malumalu paia, ia maua le olioli tumau, ma agavaa mo le ola e faavavau.”6
Sa Ia Faamaloloina i Latou Uma, saunia e Michael Malm
O le a tonu lava le uiga o lenei olioli lea tatou te usuina ma aoao atu ma o lea ua ia i tatou le matafaioi e ofoina atu i tagata uma? Ma e faapefea ona maua? Sei o tatou mafaufau faatasi i tali o nei fesili taua e lua.
O Le a Le Olioli?
O se faauigaga masani a le lomifefiloi o le olioli o “se lagona o le malie maoae [po o] fiafiaga.”7 I sona faatusatusaga, ua faamatala e le Taiala i Tusitusiga Paia le olioli o “se tulaga o le fiafiaga sili [lea e afua] mai i le ola amiotonu.”8 O le mea e mataina ai, o la tatou vaaiga o le talalelei e fesoasoani ia i tatou ia malamalama ai o le olioli e sili atu nai lo o se lagona po o se uiga mo na o se taimi; ae, o se meaalofa faaleagaga ma se tulaga o loo i ai ma o le a oo i ai. Ona o lenei mafuaaga, sa ou faamatalaina ai le tuafafine sa tuuina atu lana molimau ua faatumulia ma faasusuluina i le olioli.
I le avea o se tama poto ma le alofa, sa aoao atu e Liae ona atalii o le faamoemoega tonu lava o le olaga faitino e mo tagata uma ina ia maua le olioli:
“Ae faauta, ua faia mea uma e tusa ma le poto o ia o Le ua silafia mea uma.
“Na pa’ū Atamu ina ia i ai tagata; ma ua i ai tagata, ina ia latou maua le olioli” (2 Nifae 2:24–25).
Sa otooto mai e Atamu ma Eva lesona taua sa la aoaoina mai le Tama e Faavavau ma mai o laua lava aafiaga. Na tautino mai e Atamu: ‘Ia viia lava le suafa o le Atua, aua ona o la’u solitulafono ua pupula ai o’u mata, ma o le a ou maua i le olaga lenei le olioli, ma o le a ou toe vaai i le Atua i le tino” (Mose 5:10; faaopoopo le faamamafa).
Ma e sa faapea mai Eva: “Ana le seanoa la ta solitulafono, po ua le maua e i taua ni fanau, ma po ua le mafai ona ta iloa le lelei ma le leaga, ma le olioli o le togiolaina o i taua, ma le ola e faavavau e tuuina mai e le Atua ia i latou uma o e usiusitai” (Mose 5:11; faaopoopo le faamamafa).
O le fuafuaga o le fiafia a le Tama ua mafai ai e Lana fanau ona maua se tino faaletino ma maua le poto masani faaletino, e filifili le amiotonu i luma o le amioleaga ma faaosoosoga, ma fesoasoani ai i le Tama Faalelagi ma Lana fuafuaga sili e ala i le faamamaluina o le faaipoipoga ma le tulaga faalematua.9 I le iuga, i le taimi o le a tatou toetutu ai, “o le agaga ma le tino o le a toe faatasia e le mafai ona toe tuueseeseina, ina ia mafai ona latou maua se atoatoaga o le olioli” (Mataupu Faavae ma Feagaiga 138: 17; faaopoopo le faamamafa).
E Faapepfea ona Maua le Olioli?
Ou te talitonu o le eseesega i le va o le olioli amiotonu ma le fiafia faalelalolagi o se aoaoga ma e fesoasoani tatou te malamalama atili ai i le natura o le olioli moni. O le olioli e oo mai le faaaogaina o le faatuatua i le Alii o Iesu Keriso, agavaa e mauaina ma faamamaluina ma le faamaoni sauniga ma feagaiga paia, ma taumafai ina ia loloto le liua i le Faaola ma Ona faamoemoega. O le malie o le taunuuga o “faafiafiaga,” “faataalo [ma] e masani o uiga pisapisao po o faamatalaga,” po o tulaga faamalieina.10 O se aso i le tietiega i le Disneyland e malie. O le sauniuniga ma le agavaa ma le auai i le sauniga o le faamanatuga e olioli ai.
O le olioli e faaleagaga; o le malie e faaletino. O le olioli e tumau; o le malie e le tumau. O le olioli e loloto ma mauoa; o le malie e papau. O le olioli e atoa ma atoatoa; o le malie ua na o se vaega. O le olioli e faatatau i le olaga faaletino ma le faavavau; o le malie e faatatau i le na o le olaga faaletino.
E taua mo i tatou ina ia aua lava nei faaluafesasi pe fesuiai le olioli loloto tumau o le avea ma soo tuuto mo le papau o mea malie le tumau.
O le Togiola o le taulaiga lea ma ua na o le puna lava o le olioli tumau ma le faavavau. Ua molimau mai le perofeta o Iakopo: “Ae, faauta, o e amiotonu, o le au paia lea a Le Paia e Toatasi o Isaraelu, o i latou ia o e sa talitonu i Le Paia e Toatasi o Isaraelu, o i latou ia o e na onosaia satauro o le lalolagi, ma inoino i lona maasiasi, o le a fai mo o latou tofi le malo o le Atua, na saunia mo i latou mai le faavaega o le lalolagi, ma o lo latou olioli o le a atoatoa e faavavau” (2 Nifae 9:18; faaopoopo le faamamafa).
O le Punavai Moni o le Olioli
Ona o le fuafuaga a le Tama Faalelagi ma le Togiola a le Faaola, ua valaaulia ai e le salamo faamaoni i tatou e liliu atu ma faalagolago ia Iesu Keriso, le punavai moni o le olioli. Faamolemole ia mafaufau ma le totoa i le tali a tagata o le Tupu o Peniamina i ana aoaoga e uiga i le Togiola a le Faaola:
“Ma o lenei, sa oo ina ua uma ona fai atu e le tupu o Peniamina o upu na tuu mai e le agelu a le Alii ia te ia, sa tepa atu ona fofoga faataamilo i le motu o tagata, ma faauta ua pauu i latou uma i le eleele, ona ua oo mai i o latou luga le mataʼu i le Alii.
“Ma ua latou vaaia i latou lava i lo latou lava tulagafaaletino, uamaualalo lava nai lo le efuefu o le eleele. Ma sa latou alalaga uma leotele i le leo e tasi, fai mai: E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamāina o matou loto; ona ua matou talitonu ia Iesu Keriso, le Alo o le Atua, o lē nafoafoaina le lagi ma le fogeleele, ma mea uma lava; o lē o le a afio mai i lalo i totonu o le fanauga a tagata.
“Ma sa oo ina ua uma ona latou tautatalaina o nei upu sa afio ifo i o latou luga le Agaga o le Alii, ma faatumuina i latou i le olioli, ina ua latou mauaina sefaamagaloga o a latou agasala, ma ina ua latou maua le filemu o le mafaufau, ona o lefaatuatua tele ia Iesu Keriso sa ia te i latou, o lē o le a afio mai” (Mosaea 4:1–3; faaopoopo le faamamafa).
Ona o le fuafuaga a le Tama Faalelagi ma le Togiola a le Faaola, ua valaaulia ai e le usiusitai i tatou e mulimuli ia Iesu Keriso, le punavai moni o le olioli. Na fetalai atu le Faaola i Ona soo:
“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.
“Ua ou fai atu nei mea ia te outou, ina ia tumau ai lou olioli ia te outou, ia atoatoa foi lo outou olioli” (Ioane 15:10–11; faaopoopo le faamamafa).
“Ma e leai se tagata na te mauaina se atoatoaga vagana ai ua tausi e ia Ana poloaiga.
“O ia o le e tausia Ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma” (Mataupu Faavae ma Feagaiga 93:27–28).
Ona o le fuafuaga a le Tama Faalelagi ma le Togiola a le Faaola, ua valaaulia ai e le auaunaga i tatou e faataitai i uiga o Iesu Keriso, le punavai moni o le olioli. Talu ai nei sa ou faitau ai i se saunoaga a Kevin J Worthen, le Peresitene o le Iunivesite o Polika Iaga, e uiga i le loloto o le olioli. Sa ia fai mai, “Ua ou talitonu o se tasi o fuafaatatau o lo tatou alualu i luma e faavavau o le tele o le olioli tatou te maua mai le auauna atu.”11
Sa tau atu e Alema le Itiiti i lona atalii o Helamana: “o ou galue e le taofia, ina ia mafai ona ou aumai o agaga i le salamo; ina ia mafai ona ou aumai i latou e tofo i le olioli tele lea sa ou tofo i ai; ina ia mafai foi ona fanauina foi i latou i la le Atua, ma faatumuina i le Agaga Paia” (Alema 36:24; faaopoopo le faamamafa).
Toe mafaufau i le olioli o Amona a o ia faamatalaina lana galuega faafaifeautalai sa Lamana:
“Faauta, ua atoatoa lou olioli, ioe, ua tumu lou loto i le olioli, ma o le a ou olioli i lou Atua. …
“Faauta, e fia afe e tele o o tatou uso ua ia tatalaina mai puapuaga o seoli; ma ua aumai ai latou e pesea le alofa togiola, ma ua tupu mai lenei mea ona o le mana o lana afioga ua i totonu o i tatou, o lea, po ua le i ai ea ia te i tatou se pogai tele tatou te olioli ai? …
“… O lenei o lou olioli lea, ma lau faafetai tele; ioe, ma o le a ou avatu le faafetai i lou Atua e faavavau” (Alema 26:11, 13, 37; faaopoopo le faamamafa).
E Leai Se Tiga e Tupu i le Latalata Mai o loʼu Faamafanafana, saunia e Michael Malm
Ona o le fuafuaga a le Tama Faalelagi ma le Togiola a le Faaola, ua valaaulia e luitau ma mafatiaga i tatou ina ia tepa ae o tatou mata (tagai i le Isaia 40:26; Salamo: 123:1–2) ia Iesu Keriso, le puna moni o le olioli. O le vaaiga taua na tuuina mai e le talalelei toefuataiina ua mafai ai ona tatou aoao i lesona e saunia ai i tatou mo le faavavau, e ala i faigata o le olaga faaletino. O o tatou mafatiaga ma faanoanoaga e mafai ona “tofatumoanaina i le olioli ia Keriso” (Alema 31:38) ma faapaiaina mo lo tatou manuia (tagai i le 2 Nifae 2:2), “e mafai ona avea [a tatou] galuega e faamanuiaina ai o [tatou] agaga” (2 Nifae 32:9). O lea e tumau le olioli i le taimi ma e ala i aafiaga lelei ma leaga ona o lo tatou malamalama i le fuafuaga a le Tama ma le Togiola a le Faaola.
O le faatuatua i le Alii o Iesu Keriso, salamo, usiusitai, auauna atu, ma se malamalama o le talalelei e uiga i tofotofoga tatou te fetaiai i le olaga nei ua valaaulia uma i tatou e o mai i le puna o le olioli tumau—o Iesu Keriso. Ou te valaaulia outou e faailoa, suesue, ma mafaufau loloto ma le agaga tatalo i ni mataupu faavae faaopoopo e mafai ona tatou maua ai lenei meaalofa faaleagaga taua o le olioli.
O Se Folafolaga Fiafia
O le olioli tumau e le o se faamanuiaga ua faapolopolo mo na o se vaega filifilia toaitiiti. Nai lo lena, o tagata uma o le Ekalesia toefuataiina a le Alii o loo taumafai e manatua ma faamamalu i feagaiga paia, ma tausi i poloaiga e mafai ona maua lenei meaalofa, e tusa ai ma le finagalo ma le taimi a le Atua. I le vaitau o lenei Kerisimasi, ia tatou taitoatasi ona taumafai e faafetaia ma le atoatoa le meaalofa faalelagi o le olioli. A tatou faia lena mea, atonu tatou te amata ona vaai i ni mata fou ma faalogo i ni taliga fou e pei ona lagiina e “le au paia ma agelu,” a o tatou “toe faaleoina le olioli”, ma a o tatou “tapuai i le Atua.”12
Ou te tuuina atu ma le fiafia la’u molimau faamaoni i le soifua moni ma le paia o le Alii o Iesu Keriso.