Ua Faalauiloa Atu e Taitai le Taumafaiga Fou mo Tamaiti ma le Autalavou
O le a faatinoina le [polokalama a] Tamaiti ma le Autalavou ia Ianuari 2020 e fesoasoani ai i tagata talavou e mulimuli i le Faaola a o latou tuputupu ae faaleagaga, faaleagafesootai, faaletino, ma faaleatamai. Mo saunoaga i lenei mekasini lea o loo talanoaina ai [le polokalama a] Tamaiti ma le Autalavou, tagai i itulau e 40 ma le 53.
“Ua oo mai le taimi mo se auala fou, ua mamanuina e fesoasoani ai i tamaiti ma le autalavou o nei aso i le lalolagi atoa,” na saunoa ai Peresitene Russell M. Nelson i se faasalalauga faapitoa i le aso 29 Setema, 2019.
“Nai lo le tuuina atu ia te outou o le tele o tofiga faapitoa,” na ia saunoa atu ai i tamaiti ma le autalavou, “ua matou valaauliaina outou ia fefautuaai faatasi ma le Alii i auala e mafai ai ona outou tuputupu ae i se ala paleni. O le a tauia ma malie, ae o le a alu ai foi se taumafaiga i lau vaega. O le a manaomia ona e saili atu i faaaliga patino. O le a manaomia ona e filifili mo oe lava pe faapefea ona e faatinoina. O nisi taimi e ono uunaia oe e le Agaga e fai ni mea faigata. Ou te manatu ua e mafaia le lu’i. E mafai ona e faia ni mea faigata.”
Na saunoa mai foi Peresitene Nelson o loo i ai i matua se matafaioi taua e faatino. “Faamolemole ia fausia ni sootaga malolosi ma au tamaiti ma le autalavou,” na ia saunoa mai ai. “E mafai ona fesoasoani atu taitai i le lotu, peitai o au fanau nei. E leai se tasi e mafai ona faia se faatosinaga sili atu i lo latou manuia nai lo oe. Tuu atu ia i latou le alofa, faamalosiauga, ma fautuaga, ae ia tetee atu i le faaosoosoga o le faia o filifiliga mo i latou. O le a silisili mea latou te faia pe a latou faatinoina lo latou lava faitalia.
“O lenei fautuaga e faatatau foi i o tatou taitai ma faiaoga lelei o tamaiti ma le autalavou,” na faaauau mai ai Peresitene Nelson. “E manaomia ona tatou tuu atu i le autalavou e taitai, aemaise lava i latou ua valaauina ma vaetofiaina e auauna atu i au peresitene o vasega ma korama. O le a faamatuu atu ia i latou le pule o le perisitua. O le a latou aoao i le auala e maua ai musumusuga i le taitaiga o a latou vasega po o korama.”
I lea lava aoaoga, na folasia mai ai e Peresitene M. Russell Ballard, o le Sui Peresitene o le Korama a Aposetolo e Toasefululua, le faaaliga vaaia mo Tamaiti ma le Autalavou: ina ia “faamalosia le faatuatua o le tupulaga faiae ia Iesu Keriso, ma fesoasoani i tamaiti, autalavou, ma o latou aiga e agai i luma i le ala o feagaiga a o latou faafetaiaia luitau o le olaga.”1 Na ia saunoa mai “o le fesoasoani atu i tamaiti ma le autalavou ia maua se molimau ia Iesu Keriso o le a faamanuiaina ai i latou ma i tatou uma i o tatou olaga atoa.
Ina ua uma ona auai le autalavou i le faasalalauga i se gaoioiga e faailoa ai le faaaogaina o le Taiala Tomua mo Tamaiti ma le Autalavou, na saunoa mai Peresitene Ballard: “Ua na o le amataga lenei. I le asō, faatoa matou amata i lenei gaoioiga. O se mea lenei o le a faia pea i o outou aiga ma a o outou galulue faatasi ai. Matou te valaaulia outou ina ia faaauau le gaoioiga. … Matua, faamolemole faaauau lenei gaoioiga i le fale.” Sa ia faamamafa mai e faapea “o le polokalama lenei e faatotonugalemu i le aiga, ma lagolagoina e le Ekalesia” ma “e aofia faatasi ai aiga i lenei polokalama. O le mea lena o le a maoae tele ai.”
I le tele o eria i le lalolagi, sa maua foi e matua ma taitai a latou lava taiala tomua. O isi eria o le a mafai ona faaliliuina le [polokalama a] Tamaiti ma le Autalavou i a latou lava gagana i se taimi mulimuli ane i le 2020.
O le aoaoina o le talalelei, auaunaga ma gaoioiga, ma le atinaega patino (e aofia ai le setiina ma le ausiaina o sini) o vaega autu ia o le [polokalama a] Tamaiti ma le Autalavou, ma e tatau ona taitai le autalavou i le fuafuaina. E saili e tamaiti ma le autalavou ni faaaliga faaletagata lava ia a o latou agai atu i luma o le ala o feagaiga, ma le lagolago mai le aiga, taitai, ma isi. Sa taua e Peresitene Ballard e faapea o [le polokalama a] Tamaiti ma le Autalavou o se taumafaiga i le lalolagi atoa ma o le mea lea e mafetuutuunai ai i le “nofoaga e te nofo ai ma ou tulaga faaleaiga.”
O le a tuuina atu ni faamatalaga ma ni punaoa faaopoopo i le faasalalauga o le Talanoaga Faafesagai mo tamaiti ma le autalavou i le aso 17 o Novema, 2019, faatasi ai ma Elder Gerrit W. Gong o le Korama a Aposetolo e Toasefululua. O tamaiti ma le autalavou e atoa le tai 8 i le 18 tausaga i le aluga o le 2020, o o latou matua, ma taitai o Tamaitai Talavou, fautua o le Perisitua Arona, ma taitai o le Peraimeri e valaaulia ina ia auai. Auina mai au fesili e uiga i le polokalama a Tamaiti ma le Autalavou ia Elder Gong i le facetoface. ChurchofJesusChrist.org. A uma le gaoioiga tuusao, lea o le a faasalalauina i gagana e 18, o le a teuina le vitio ina ia mafai ona faasalalauina pe siiina mai i soo se taimi.