!Bes Dei blong Wok blong Mi!
I kam long: Elda Joni L. Koch
Blong Olgeta Seventi
Taem yu lanem blong lavem wok mo luk hamas i impoten, yu save faenem wan bigfala glad.
Ol foto oli kam long Getty Images
Sam yia i pas finis, mi biin stap long bigfala jim blong Churchill kolej blong Yunivesiti blong Cambridge long Inglan blong wan anuol miting blong kampani we mi wok long hem. Long taem ia, mi bin gat wan spesel janis blong kasem tru long wol presiden blong kampani mo JEO wan awod long bihaf blong tim blong mi from nambawan wok we mifala i bin mekem long yia ia.
Olsem ol lida blong kampani truaot wol, we i representem 80,000 wokman, oli klapem han blong olgeta mo presem tim blong mifala from win blong mifala, mi tingting se, “!Hemia i bes dei blong wok blong mi!” Evriwan long taem ia oli filim hapi tumas.
Serem Bred
Be afta maen blong mi i tekem mi gobak long fas dei blong wok blong mi hemia klosap 40 yia i pas finis. Papa blong mi i gat wan bekeri mo stap bekem bred blong givimaot long plante smosmol maket insaed long siti blong mifala long Saot Brasil. Taem mi smol yet, mi stap wantem se papa bae i tekem mi i go long wok wetem hem. Wan dei, hem i jes talem !yes!
Mama i bin somapem wan smol waet epron mo hat blong mi mo papa wetem mi i go long bekeri. Tugeta, mitufala i miksim mo mekem flaoa i rere wetem han nomo mo rolem i go long ol saes blong bred afta putum i go insaed long oven. Taem we bred i dan, mifala i yusum wan longfala wud spun blong karemaot slo bred. Mifala i wet blong smol taem, afta mifala i serem wan hot bred ia. !I tes naes tumas!
Taem mi tingtingbak, mi disaed se blong kasem wan awod long Cambridge i bin olsem nambatu bes dei blong wok. Bes dei mo hapi dei long wok i bin hapen long wan smol simpol bekeri we i no gat man long hem o wan saen Mi mo papa blong mi nomo Long dei ia, hem i bin tijim mi blong lavem wok mo luk hamas i impoten mo helpm mi filim glad ia blong mekem wan samting stat long stat wetem ol han blong mi. Mi bin lanem se hadwok i mekem tugeta bodi mo sol i harem gud.
Wok i wan Blesing
Taem we Lod i bin talem long Adam mo Iv, “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae” (Jenesis 3:19), i luk olsem Hem i stap panisim tufala wetem lav. Be long ril, Hem i stap givim tufala janis ia blong eksperiensem glad mo gat wan komplit filing blong stap dipen long yuwan blong save provaedem wanem we tufala i wantem mo nidim.
Plante long yumi i stap luk wok hemwan olsem wan samting blong sapotem yumiwan mo ol famli blong yumi blong sot taem o wan wei blong kasem wan taetol mo gat wan flas taetol we i hae. Be wanem we i moa impoten, God i wantem yumi blong wok blong yumi save kasem wan strong tingting blong mekem wan samting taem yumi stap mekem ol wok, krietem wan niu samting, kam antap mo impruvum wan samting we i stap finis, mo givim valiu long wol we yumi stap laef long hem.
Toktok long saed blong spirit, wan laef we i mekem gospel i stap long medel oltaem insaed i gat wok. Elda D. Todd Christofferson blong Kworom blong Olgeta Twelef Aposol i bin talem, “Wan laef we i tingting strong long wok, i fulap long wok, samtaem i mekem sem wok bakegen, samtaem i no fit inaf, samtaem man i no glad from be oltaem i wok blong impruv, putum oda, i sastenem, leftemap, i givhan, givim gudfala samting.”1
Olsem wan pikinini, ating oli bin askem yu, “Bae yu kam wanem taem yu bigwan?” Long ol yia we yu yangfala, kwestin ia bae i save jenis i go long “?Bae yu wantem stadi wanem long kolej?”
Strong tingting, Wetem Ona, mo Stamba Tingting
Nomata wanem wok yu plan blong mekem, wanem laen blong wok we ating bae yu enap long hem lukaot blong mekem wok blong yu wetem strong tingting, ona, mo stamba tingting. Yu mas wokhad mo oltaem traem blong gat ol risal we i fulwan mo i moa gud. Taem yu gat ol fasin ia long wok blong yu, bae i helpem yu i kam sef long saed blong laef, tingting mo long saed blong spirit. Janis blong wok i wan blesing we i kam long Lod Taem yu lanem blong laekem mo lavem wok, bae yu faenem glad mo stamba tingting we i kam tru long fasin blong stap dipen long yuwan.
Mi save harem yet ol klap mo ol toktok blong leftemap tingting we i kam long olgeta we oli bin stap long Yunivesiti blong Kambrij, be hemia we i moa spesel long mi, hem i gudfala meomori blong dei ia long bekeri wetem mi mo papa blong mi mo smel blong ol bred ia taem oli rere blog kamaot long oven.