Sapotem Ol Riten Misinari We I Kambak Long Haos Eli.

I Kam long Kevin Theriot, PhD

LDS Famli Seves

Ol tingting blong promotem hiling i go long ol misinari we oli kambak long haos eli.

Wan long ol naes stori long Buk blong Momon hem i 200 soldia blong Hileman we oli kasem kil long taem blong wo (luk long Alma 57:25). Mi no save be mi ting se i semmak nomo bitwin olgeta 200 soldia mo ol misinari blong tedei we, i gat fulap risen from wanem, oli gobak long haos eli bitim deit we oli sud gobak.

Iven ol 200 ia oli lego haos blong olgeta wetem wan strong tingting, be oli faenemaot se oli mas karemaot olgeta aot long ples blong faet. Mi hop se oli luk olgetawan olsem ol waes man, we oli givim evri samting we oli gat, be mi ting se oli gat tu tingting long olgetawan mo tu oli gat kwestin ia se from wanem oli no kasem proteksen olsem ol nara fren blong olgeta.

Olsem ol soldia blong Hileman, ol misinari we oli kam eli long misin blong olgeta, plante taem oli no tekem series tingting ia se oli bin volontia mo go long “wo,” mo oli givim evri samting we oli gat. Oli rere from misin blong olgeta mo oli gat bigfala fet mo strong tingting blong givim seves long Lod. Be taem oli “kasem kil” (fesem, eksampol, sik long bodi o sik long tingting o oli brekem loa), plante taem oli lukluk moa long wanem oli no winim mo oli harem nogud, sem, o tingting i lus. Bae oli gat kwestin long insperesen ia we i mekem se oli go blong givim seves. Ol riten misinari ia bae oli wari long olsem wanem ol nara pipol i i lukluk long olgeta o iven olsem wanem Lod i luk olgeta. Bae oli save filim se oli no winim wan samting o oli no akseptem olgeta mo oli save jajem olgetawan long wan rabis wei.

Ol misinari we i kambak long haos eli oli nidim ol famli memba, ol fren mo ol wod memba blong joen tugeta mo wokhad blong helpem olgeta kasem hiling. Hemia sam tingting blong tugeta riten misinari mo ol memba blong famli, ol Jos lida, ol fren mo ol wod memba.

Blong Olgeta we oli lavem tumas: 6 Samting we Yu Save Mekem blong Helpem Riten Misinari I Kasem Hiling

Go aot wetem lav blong givim kamfot, strong tingting, mo kea long wanwan riten misinari ia mo ol famli blong hem olsem yu yu wan soldia we i kasem wan kil long taem blong wo. Talem tangkyu long olgeta from seves we oli givim, leftemap tingting blong olgeta blong lukluk nomo long wanem oli bin mekem, be i no long wanem oli no mekem.
Tekem hem olsem wan “riten misinari” mo i no wan misinari we i “kambak long haos eli” o “oli rilisem hem eli” Ol gudfala toktok i save helpem olgeta wetem hiling we oli nidim mo blong oli kam gud.
Lisin long olgeta blong save olsem wanem nao yu save helpem gud olgeta.
Sapotem ol papa mo mama blong olgeta. Hemia bae i wan had pat blong misinari i go tru long step ia blong kasem hiling. Tingbaot blong no fogetem ol nid blong papa mo mama blong riten misinari long hadtaem ia.
Lukaotem profesenol kaonsel sapos i nidim. Ol profesenol we oli wok long sik blong tingting i save helpem ol riten misinari ia oli mekem laef blong olgeta i go wetem laef long haos mo mekem olgeta kambak long laen. Sapos i gat, LDS Famli Seves i stap givim sikis fri kaonseling lesen taem riten misinari we i kambak long haos eli i askem.
Lukaotem help long saed blong spirit. Neva gat tu tingting long paoa blong prea. Prea from help long olsem wanem yu save sapotem moa gud olgeta mo fulfilim nid blong olgeta.

Blong ol Riten Misinari: 5 Trutok blong Tingbaot taem Yu kasem Hiling.

God i lavem yu Yumi evriwan i eksperiens oposisen long ol defdefren taem long laef blong yumi long wol ia. Fet long Jisas Kraes i no wan stik meresin we i blokem oposisen—hem i wan prinsipol we i save helpem yu go tru long oposisen. Tru long atonmen mo sakrifaes blong Hem, Kraes i gat paoa i no blong klinim yumi nomo aot long sin be i givim kamfot, andastaning, hiling, mo sapot. (Luk long long toktok blong Elder Jeffrey R. Holland blong jeneral konfrens, “Like a Broken Vessel.”)
Olgeta skripja oli tokbaot hiling. God i toktok tru long Tabu Spirit, i kam tru, long medel blong ol nara samting, wan tru stadi mo fasin blong aplaem olgeta skripja. Ridim abaot ol soldia blong Hileman, mo ol narawan we oli foldaon mo kasem kil long rod blong olgeta long laef, blong oli save kasem moa save. Lukaotem ol nara eksampol blong olsem wanem Papa long Heven i save givhan mo helpem blong hilim olgeta we oli wantem folem Hem bifo.
Seves i helpem yu kasem hiling. God i wantem yu blong “wok wetem strong tingting” blong mekem gud samting (luk long Doktrin mo Ol Kavenan 58:27) from hemia wanem we bae i helpem yu kasem hiling. Luk aotsaed mo prea from ol janis blong givim seves long ol narawan.
Prea i save openem ol ae blong yu. Talem tangkyu i go long Papa long Heven. Hem i wantem helpem yu kasem hiling. Askem Hem blong mekem yu kam strong moa mo openem ol ae blong yu long ol samting we Hem i bin stap mekem finis blong blesem mo hilim yu mo tu blong givim paoa long yu blong lukluk aotsaed long yuwan mo blesem ol narawan.
Ating ol narawan bae oli no andastanem. I no evriwan bae i andastanem wanem yu stap gotru long hem, mo ating bae oli talem sam samting we oli no save nating abaot. !Be no letem hemia i putum yu daon! Tingting strong blong talem tangkyu long olgeta we oli mekem yu kam strong moa, mo prea from help blong fogivim ol narawan sapos oli no andastanem nating wanem yu stap gotru long hem.