Tē tāmau nei te tāvinira’a a te peresideni Nelson
Tē fāri’i-pōpou-hia nei te peresideni Russell M. Nelson ’e Elder Enrique R. Falabella nō te Hitu ’Ahuru i te hō’ē purera’a i Lima (Peru).
I muri noa mai i te ’āmuira’a rahi nō ’Ātopa 2018, ’ua tere atu te peresideni Russell M. Nelson i Peru, Bolivia, Paraguay, Uruguay, ’e Tīreni, i reira tōna fārereira’a i te mau melo ’e te mau misiōnare ’e ’ua fa’atupu i te tahi mau purera’a, mai te hō’ē purera’a nā te feiā ’āpī i Tīreni, e 1 500 ta’ata tei tae mai, ’e ’ua ha’apuroro-ato’a-hia i te fenua ato’a. ’Ua paraparau ’oia i te mau melo nā roto i te reo pāniora, ’ua ha’amo’a i te hiero nō Concepcion (Tīreni) ’e ’ua fārerei i te mau ti’a nō te fa’aterera’a hau i reira.
E tauasinira’a vahine tei pāhono nā ni’a i te rāve’a tūreiara’a sōtiare i te anira’a a te peresideni Nelson ’ia fa’a’ite mai i te ’ohipa i tupu nō rātou ’a rave ai i nā ’ohipa e maha tāna i ani ’ia rave i te ’āmuira’a rahi nō ’Ātopa 2018 : (1) ha’apae e 10 mahana i te mau rāve’a tūreiara’a sōtiare ’e te mau ha’apararera’a ’ī’ino, (2) tai’o i te Buka a Moromona nā mua a’e i te hope’a matahiti 2018, (3) haere pinepine i te hiero, ’e (4) ’āmui hope roa atu i te Sōtaiete Tauturu. « ’Ua hina’aro vau e ha’amāuruuru ia ’outou pā’āto’a i te pāhonora’a i tā’u mau anira’a », ’ua parau te peresideni Nelson, ma te parau ē, maita’i ē « ’ua ha’afātata teie mau anira’a tāta’itahi i te Fa’aora. »
’Ua peresideni te peresideni Nelson i te ’ōro’a hunara’a o tāna tamāhine, ’o Wendy Nelson Maxfield, tei fa’aru’e mai i muri iho i tōna ’arora’a i te ma’i mariri ’aita’ata. « E taui tō tātou hevara’a ’ei ’oa’oara’a ’ia roa’a ia tātou i te hi’ora’a mure ’ore », tē nā reira ra ’oia. ’Ua paraparau ’oia nō ni’a i tāna tamāhine i roto i te hō’ē ’āmuira’a ta’a ’ē nō te titi nō Chico California, tei roto e piti pupu ’āmuira’a nō Paradise tei pa’apa’a i te auahi. « E ’ite ’oe ē, e tāmatara’a tō te mau ta’ata ato’a », tāna ïa parau. « Mai te mea ’ua hina’aro ’outou ’ia maita’i mai, ’a ha’amo’e ia ’outou iho ’e ’a tāvini ia vetahi ’ē. »
I Arizona (Marite), ’ua ani te peresideni Nelson i te 65 000 melo ’ia putuputu i roto i te hō’ē fare rahi tū’arora’a « nō te tauturu i te ha’aputuputura’a ia ’Īserā’ela i nā pae e piti o te pāruru. » ’Ua pāpa’i ato’a te peresideni Nelson i te hō’ē parau tei pūharahia i roto i te ve’a pāpa’i ra Arizona Republic ’e tei fa’aitoito i te ta’ata « ’ia fāriu i ni’a [i te Fatu] ’e ’ia fa’ariro iāna ’ei pū nō tō tātou orara’a. » ’Ua haere ato’a ’oia i te hō’ē uiuira’a mana’o tei ha’apararehia nā ni’a i te mau ’āfata teata o te fenua ; ’ua haere ’oia i te tahi mau ’āru’i e rave rahi ’e te mau feiā fa’atere i te pae tīvira, te pae ha’api’ira’a ’e te pae fa’aro’o ; ’e ’ua fa’atupu ato’a i te hō’ē rurura’a ’īritira’a mana’o ’e te feiā ’āpī pa’ari ’ōtahi.
Mai te taime mai ā ’ua fa’atōro’ahia ’oia i te 14 nō Tēnuare 2018, ’ua tere te peresideni Nelson i nā fenua e 5, 16 nūna’a ’e tuha’a fenua, ’e 24 ’oire, ’e ’ua tere ’oia e 55 000 maile (88 515 km).