Elder Ricardo P. Giménez
Hitu ’Ahuru Hui mana fa’atere rahi
E ha’amana’o noa te mau melo o te ’Ēkālesia i Antofagasta (Tīreni) i te ’āmuira’a rahi nō ’Ēperēra 2019 nō te fa’aarara’ahia te hō’ē hiero ’āpī i reira ’e te pi’ira’ahia te hō’ē tamaiti ’āi’a, ’o Elder Ricardo P. Giménez, ’ei Hitu ’Ahuru Huimana fa’atere rahi.
’Ia feruri ’oia i te mau hōpoi’a o tōna pi’ira’a ’āpī, tē noa’a nei tō Elder Giménez fa’aro’o ’e te itoito i roto i te parau ē « Tā te Fatu e pi’i, tā te Fatu ïa e fa’a’aravihi » (Thomas S. Monson, « Duty Calls », Ensign, Mē 1996, 44).
« E rave rahi taime vau i te ha’api’ira’a i te reira i te mātāmua ra, ’e i teienei, tē tāmata nei au iho i te fa’a’ohipa i te reira », tē nā reira ra ’oia. « Tē pi’i nei te Metua i te Ao ra ia ’outou. ’Ua mātau ’oia ia ’outou. Nō reira ’a haere noa ’e ’a rave i te mea tāna i hina’aro, ’e e maita’i te mau mea ato’a. »
’Ua fānauhia Ricardo Patricio Giménez Salazar i te 28 nō Novema 1971, te matahiapo o nā tamari’i a Ricardo Benjamín Giménez Gimeno ’e a Myrto Lucisca Amalia Salazar Signorini. ’Ua tomo mai ’oia i roto i te ’Ēkālesia i te 11 te matahiti ’e ’ua fa’anu’u atu i Santiago (Tīreni) nā muri i tōna metua vahine ’e tōna tuahine, i muri mai i te ta’ara’a tōna nā metua.
I te matahiti 1995, ’ua fārerei ’oia ia Catherine Ivonne Carrazana Zúñiga i Santiago i te ha’amatara’a ’oia i te haere mai i te pāroita ’a noho ai ’oia i te fare o tōna metua tāne fēti’i. ’Ua tā’atihia rāua i te hiero nō Santiago (Tīreni) i te 12 nō Tetepa 1997, ’e e piti tā rāua tamari’i.
’Ua manuia Elder Giménez i tāna tuha’a mātāmua ha’api’ira’a tuatoru i roto i te tai’ora’a ’e te hi’opo’ara’a moni, i te fare ha’api’ira’a teitei nō Santiago i te matahiti 1997 ’e te parau tū’ite Master nō te ’ohipa fa’aterera’a taiete i te fare ha’api’ira’a teitei nō Chile i te matahiti 2003. ’Ua ha’amata ’oia i tōna tōro’a ’ohipa i roto i te tapiha’ara’a heru repo, ē i te hope’a, ’ua rave ’oia i roto i te mau rāve’a ’āpī ’ei upo’o fa’atere ha’apa’o i te moni nō te hō’ē taiete roro uira nō Amerika Latino. ’Ua ho’i ’oia i te ’ohipa nō te heru repo i te matahiti 2012, nā mua nō te taiete Sierra Gorda Mining ’e i muri iho nō te taiete Robinson Nevada Mining Company.
I te taime nō tōna pi’ira’a, tē tāvini ra Elder Giménez ’ei tauturu i roto i te hō’ē peresidenira’a titi. ’Ua tāvini ato’a ’oia ’ei Hitu ’Ahuru ārea i te ārea nō Amerika Apato’a, te tuha’a apato’a, ’ei peresideni titi, ’ei melo ’āpo’ora’a teitei, ’ei ’episekōpo, ’ei tauturu i roto i te hō’ē ’episekōpora’a ’e i roto i te hō’ē peresidenira’a Feiā ’Āpī Tamāroa nō te pāroita, ’e ’ei misiōnare rave tāmau i roto i te misiōni nō Tīreni i Concepción.