Elder Terence M. Vinson
Peresidenira’a no te Hitu Ahuru
Tē ti’aturi nei Elder Terence M. Vinson ē, ’aita roa atu te Fa’aora i ātea roa ia tātou. ’Ua fa’a’ite pāpū ’oia i roto i te ’āmuira’a rahi nō ’Ātopa 2013 ē : « Mea fātata noa mai ’oia i te mau taime ato’a, i roto iho ā rā i te mau vāhi mo’a ’e i te mau taime fifi ». « I te tahi taime, i te taime ’aita roa vau e mana’o, fātata mai te huru ē, tē tūpa’ipa’i mai nei ’oia iā’u i ni’a i te tapono nō te fa’a’ite mai iā’u ē, te here nei ’oia iā’u. »
I te hō’ē taime, tē hāhaere ra Elder Vinson nā muri ia Elder Jeffrey R. Holland nō te pupu nō te Tino ’Ahuru Ma Piti ’āpōsetolo, ’ua tauahi Elder Holland i tōna rima i ni’a i te tapono o Elder Vinson ma te parau ē, ’ua here ’oia iāna. Tē nā ’ō ra Elder Vinson ē : « Tē ti’aturi nei au ē, ’āhiri e taime tō tātou ’ia haere tino roa nā muri iho i te Fa’aora, e ’ite tātou i tōna rima ’ia tauahi mai i ni’a i tō tātou tāpono mai teie te huru. »
’Ua parau Elder Vinson, tei pāturuhia ’ei melo nō te peresidenira’a nō te Hitu ’Ahuru i te 31 nō Māti 2018, te here o te Atua, « ’o te mana’o au roa ïa i roto ia tātou ».
E amo Elder Vinson i tāna pi’ira’a ’āpī i te 1 nō ’Ātete 2018, ’ua pāturuhia ’oia ’ei Hitu ’Ahuru Hui mana fa’atere rahi i te 6 nō ’Ēperēra 2013. I taua taime ra, tē tāvini ra ’oia ’ei melo nō te pupu va’u o te Hitu ’Ahuru, i roto i te ārea Pātifita. I teie taime tē tāvini ra ’oia ’ei peresideni nō te ārea nō Afirika Tō’o’a o te rā.
’Ua noa’a tā Elder Vinson parau tū’ite Licence nō te nūmerara’a ’e te hi’opo’a nūmera, ’e tae noa atu i te hō’ē parau tū’ite nō te ’ohipa ha’api’ira’a, ’e tae noa atu i te hō’ē parau tū’ite Master nō te ’ohipa moni. I roto i tāna tōro’a ’ohipa, ’ua ha’api’i atu ’oia i te ta’ata, ’ua ha’api’ipi’i ’e ’ua vauvau parau i roto i te mau fare ha’api’ira’a teitei. Te rahira’a taime, ’ua ’ohipa ’oia ’ei a’o tauturu i te pae moni ’e ’ei fa’atere ’āfata moni.
I te tuatāpapara’a ’oia nō ni’a i te ’Ēkālesia ’ei taure’are’a, ’ua fāri’i Elder Vinson i te hō’ē mana’o vārua pūai i roto iāna. ’Ua ’ite pāpū maita’i ’oia ē, ’ia tomo ’oia i roto i te ’Ēkālesia e ti’a ai, nō te haere i mua ’e nō te ’ite mai i te mau pāhonora’a i tāna mau uira’a e vai noa ra. ’Ua bāpetizohia ’oia ’e ’ua ha’amauhia ho’i i te hepetoma nō muri iho.
Mai te reira ā taime, « ’ua ’ite au e aha tā te Fatu e tīa’i ra iā’u ’ia rave, ’ua ’itehia mai iā’u ē, e mau pāhonora’a i te tā’āto’ara’a o tā’u mau uira’a. »
Mai tōna bāpetizora’a i te matahiti 1974, ’ua tāvini Elder Vinson ’ei tauturu i roto i te ’episekōpora’a, ’ei ’episekōpo, ’ei melo ’āpo’ora’a teitei, ’ei tauturu i roto i te peresidenira’a titi, ’ei ti’a retioni, ’ei tauturu i roto i te peresidenira’a misiōni, ’ei rave ’ohipa i te hiero ’e ’ei Hitu ’Ahuru ārea.
’Ua fānauhia ’oia i Sydney (Auterāria), i te 12 nō Māti 1951. ’Ua fa’aipoipo ’oia ia Kay Anne Carden i te ’āva’e Mē 1974. E ono tamari’i tā rāua.