Elder Robert C. Gay
Peresidenira’a nō te Hitu ’Ahuru
I te tāvinira’a ’oia ’ei peresideni misiōni i Ghana, ’ua tae mai te mana’o ia Elder Robert C. Gay ē, e tāpe’a nō te tauturu i te hō’ē tamaiti e ta’i ra. I te ha’amatara’a, ’aita ’oia i tāu’a i te reira mana’o, i muri iho rā, ’ua tono atu ’oia i te hō’ē melo o te ’Ēkālesia e ti’i mai i terā tamaiti.
’Ua ’apo mai Elder Gay, tei pāturuhia ’ei melo nō te peresidenira’a nō te Hitu ’Ahuru i te 31 nō Māti 2018, tē ho’o ra terā tamaiti i te i’a tara’i nō tōna ta’ata ha’apa’o. I terā rā mahana, ’ua mo’e iāna te moni, e ’āpo’o i roto i tōna pūtē.
« ’Ia ho’i ’ōna ’aita [terā] moni, e parihia ’oia e ta’ata ha’avare, e taparahihia paha ’e e tīahihia ’oia i ni’a i te purōmu », ’ua fa’ati’a mai Elder Gay. « Ua tamarū māua i tōna mata’u, hōro’a atura i te tahi moni e fa’aho’i atura iāna i te fare o te ta’ata tīa’i. »
Mai tāna i fa’a’ite i te ’āmuira’a rahi nō ’Ātopa 2012, e piti parau mau rahi tāna i ’apo i roto i teie ’ohipa : « ’A tahi, ’ua ’ite roa vau ē, ’ua aroha te Atua ia tātou tāta’itahi ’e e’ita ’oia e fa’aru’e ia tātou ; te piti, ’ua ’ite au e mea ti’a ia tātou ’ia fa’aro’o i te reo o te Vārua i roto ia tātou ’e ’ia haere ‘’oi’oi atu’ i te vāhi ’o tāna e ’āfa’i ia tātou, ma te feruri ’ore i tō tātou taiā ’e ’aore rā i te mau taupupura’a ato’a. »
’Ua pāturuhia Elder Gay ’ei Hitu ’Ahuru Hui mana fa’atere rahi i te 31 nō Māti 2012. I te pi’ira’ahia ’oia i te peresidenira’a o te Hitu ’Ahuru, tē tāvini ra ’oia ’ei peresideni nō te ārea nō Asia Apato’erau. Nā mua atu, ’ua tāvini ’oia i te pū fa’atere o te ’Ēkālesia ’ei fa’atere tōmite nō te Fa’arava’ira’a iāna iho ’e te tuha’a moni nō te ha’api’ira’a tāmau, nāna e ha’apa’o i te mau piha fa’arava’ira’a iāna iho nā te ara.
Nā mua a’e te pi’ira’ahia ’oia i te Hitu ’Ahuru, ’o ’oia te ta’ata fa’atere rahi nō te hō’ē taiete fa’ahotura’a moni, tāna i ha’amau ’e te tahi hoa. ’Ua ha’amau ato’a ’oia ’e te tahi hoa ’e ’ua tāvini ho’i ’ei upo’o fa’atere nō te tahi mau fa’anahora’a tauturu ta’ata nā te ara, ’e ’ua ’ohipa ato’a ’oia i roto i te fa’ahotura’a moni i Wall Street, ’e ’ua tāvini ato’a ’ei ta’ata a’o i te pae fa’aterera’a ’e ’ei ’orometua fa’arava’ira’a faufa’a i Harvard University.
’Ua noa’a tā Elder Gay parau tū’ite Licence nō te fa’arava’ira’a faufa’a ma te tahi ’aravihi rahi i roto i te hi’opo’ara’a nūmera, i te fare ha’api’ira’a University of Utah ’e ’ua noa’a tāna parau tū’ite Doctorat nō te ’ohipa fa’arava’ira’a faufa’a i Harvard University.
’Ua tāvini Elder Gay ’ei misiōnare rave tāmau i Pāniora, ’ei tīa’i pupu tahu’a rahi, ’ei peresideni Feiā ’Āpī Tamāroa o te pāroita, ’ei melo ’āpo’ora’a te’itei, ’ei tauturu i roto i te ’episekōpora’a ’e ’ei Hitu ’Ahuru ārea.
’Ua fānauhia ’oia i Los Angeles, i California (Marite), i te 1 nō Setepa 1951. ’Ua fa’aipoipo ’oia ia Lynette Nielsen i te ’āva’e ’Ēperēra 1974. E hitu tā rāua tamari’i.