Tej Ntsiab Cai txog Kev Mus Saib Xyuas Tom Tsev, Ib Hlis Ntuj 2018

Lub Sij Hawm Twg, Nyob Qhov Twg, Siv txoj Kev Twg Los Cia Li Nrog Nws Sib Txuas Lus

Kev mus saib xyuas tom tsev yeej yog kev txhawb pab. Lub sij hawm twg thiab nyob qhov twg los Yexus yeej txhawb pab lwm tus. Peb ua tau zoo ib yam.

“Kev txhawb pab” yog kev pab los kev saib xyuas lwm tus uas pab nplij lawv lub siab los yog ua rau lwm tus zoo siab. Kev mus saib xyuas tom tsev yeej yog kev nrhiav tej yam uas peb ua tau kom txhawb pab cov uas peb mus xyuas. Yexus Khetos yeej txhawb pab txhua leej txhua tus—tsis hais lub sij hawm twg thiab nyob qhov twg los yog. Nws twb pub 5,000 leej noj, nplij Maivliag thiab Mathas thaum nkawd tus nus tuag, thiab qhia Nws txoj moo zoo rau tus poj niam nyob ntawm lub qhov dej. Nws tau ua li no vim Nws hlub lawv tiag tiag.

Thaum ua raws li Nws tus yam ntxwv, peb cov uas mus saib xyuas tom tsev muaj peev xwm paub thiab hlub txhua tus viv ncaus uas peb mus xyuas, yog peb nco ntsoov tias kev hlub yog lub hauv paus ntawm txhua yam peb ua. Thaum peb thov Vajtswv kom txais kev tshoov siab paub pab nws thiab txhawb nqa nws txoj kev ntseeg, “yuav txwv tsis tau cov tim tswv los ua [peb] tus khub.”¹

Txij thaum tau txhim tsa lub Koom Haum Niam Tsev thaum xyoo 1842 txog niaj hnub no, qhov uas cov poj niam txhawb pab lwm tus yeej tau foom koob hmoov rau lawv lub neej. Piv txwv hais tias, Joan Johnson, ib tug poj ntsuam uas muaj 82 xyoo, thiab nws tus khub mus saib xyuas tom tsev rau nkawd tus neeg zej zog uas muaj 89 xyoos thiab muaj kab mob ntsws. Nkawd pom tias tsis yog nkawd tus neeg zej zog xav tau nkawd ib hlis ib zaug xwb, yog li ntawd nkawd cia li pib mus xyuas nws txhua lub lim tiam mus rau nws lub tsev los yog hu xov tooj.

Rau lwm tus uas mus saib xyuas tom tsev, kev ntaus ntawv email los yog siv xov tooj ntawm tes kom txhawb nqa lawv tej zaum yog qhov zoo tshaj plaws rau ib tug viv ncaus lub hlis ntawd. Lub ntsiab ntawm kev mus saib xyuas tom tsev yog kev sib raug zoo thiab kev mloog lawv hais lus nrog kev hlub. Tej txuj ci technology uas muaj niaj hnub no thiab kev mus saib xyuas lawv tim ntsej tim muag yeej pab tau peb ua li no lub sij hawm twg, nyob qhov twg, thiab siv ntau txoj kev ua los tau.² Ua li no yeej yog kev txhawb pab zoo li Yexus tau ua.

© 2018 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/17. Pub txhais ua lus Hmoob: 6/17. Kev txhais Visiting Teaching Message, January 2018. Hmong 15045 295