Cov Hluas

Cog Lus tias Yuav Hloov Siab Lees Txim

Thawj Tswj Hwm Monson piav tias “peb txoj kev lav ris yog qhov uas peb yuav tsum muab peb txoj kev ua dog dig hloov kom txawj ua, hloov qhov uas peb ua tsis taus kom thiaj li ua taus. Peb lub luag hauj lwm yog kho peb tus kheej kom zoo tshaj.” Ntau tus neeg siv lub Ib Hlis Ntuj kom cuab hom phiaj thiab cog lus tias yuav hloov los ua neeg zoo dua: luag ntxiv, noj zaub mov zoo ntxiv, los yog kawm ib qho txuj ci tshiab. Txawm yog tej lub hom phiaj no yuav pab yus hloov ua neeg zoo dua, txoj kev hloov zoo tshaj plaws yog los ntawm kev hloov siab lees txim.

Txawm yog kev hloov siab lees txim yog ib qho nyuaj los, kev hloov siab lees txim yog ib lub txiaj ntsim! Thaum peb tso siab rau Yexus Khetos thaum peb hloov siab lees txim rau peb tej kev txhaum, peb txawj hloov tau thiab vam meej. Thawj Tswj Hwm Monson hais tias “Lub hauv paus rau txoj hau kev [cawm seej] no yog peb tus Cawm Seej, Yexus Khetos. Yog tsis muaj Nws txoj kev theej txhoj, ces txhua yam tsav yuav plam mus.” Los ntawm kev hloov siab lees txim, koj txais tau kev ntxuav nej tej kev txhaum mus thiab yuav vam meej kom hloov los ua neeg zoo li Nws ntxiv.

Cia li xav txog ib yam uas ua rau koj tsis zoo li tus Cawm Seej. Puas yog tej lus uas koj hais? Puas yog tej yam uas koj ua rau koj cov phooj ywg los sis tsev neeg? Tom qab koj xav txog tej uas koj ua tau kom hloov los ua neeg zoo dua, cia li thov Leej Txiv Saum Ntuj Ceeb Tsheej thiab qhia Nws tias koj xav hloov siab. Cia li nco ntsoov tias dhau los ntawm lub hwj chim ntawm Nws txoj Kev Theej Txhoj, Yexus Khetos pab tau koj kov yeej qhov uas koj ua yuam kev. Ib yam li Thawj Tswj Hwm Monson qhia tias, “Lub txiaj ntsim ntawm kev hloov siab lees txim, uas peb tus Cawm Seej muab rau peb, cia peb kho peb txoj hau kev.”