Te Rongorongo man te Moan Beretitentii, Ritembwa 2017
Ukoukora Kristo n te Kiritimati
Iroun Beretitenti Dieter F. Uchtdorf
Te Kauoman ni Kauntira n te Moan Beretitentii
Nakoia naake a tangiria n ataia bwa antai ngaira ae kaain Ana Ekaretia Iesu Kristo ibukiia Aika Itiaki ni Boong Aika Kaitira, I tangiria ni moanna ma (te ukeuke ibukin ataakina) ae kamatataaki raoi man taeka aika teniua aikai: Ti ukoukora Kristo.
Ti ukoukoria n reirei mai Irouna. (Ti ukoukoria) n Ririmwiina. N riki n ai Arona.
Ni katoa bong rinanon te ririki, ti Ukoukoria. Ma riki n tain te ririki aei—te Kiritimati, ngke ti bukamarua bungiakin ara Tia Kamaiu ae tangiraki—a rikirake nanora nako Ina.
Ngkai mwakoron ara katauraoi ibukin bukamaruan te Kritimati, ti riai n iangoia bwa a kanga naake a maeka uoua tengaa te ririki n nako n tauraoi ni butimwaea rokon te Tia Kamaiu.
Taan Kawakin Tiibu
Ti aki atai raoi aroia taan kawakin tiibu, ti tii ataiia bwa a “maeka n te tawaana, aika a tantani n te bong i rarikin aia nanai.”1 Taan kawakin tiibu kaanga bon aomata aika bon arora, n aroia aomata aika mwaiti aika tamaroa aika aki toki n nako ni karekei maiuia.
A kona n tei ibukiia aomata ake, n te taina, a tia n aki rangin ni kekeiaki ni ukoukora te Kristo, ma a bitaki nanoia ngke a kaukaki taian karawa ao e katanoataaki Kristo nakoia.
Ao aikai ake, imwiin ongoraeakin bwanaaia ana taan uarongorongo karawa, a waekoa n nako Betereem n noora te baere e roko.2
Aomata Aika a Wanawana
Aomata aika a wanawana bon taan reirei ake a tia ni kamatebwaia rokon te Mesia, Natin te Atua. Rinanon aia kamatebwai, a kunea te kanikina are e kaota Bungiakina. Ngke a kinaia, a kitana mwengaia ao n nako Ierutarem, n titiraki, “E nga Teuare bungiaki ba aia Uea Iutaia?”3
Aia atatai iroun te Kristo e aki tiku n tii te reirei. N te tai are a noori kanikinaa ni Bungiakina, a waekoa n rimwiina. A waakina mwanangaia n ukoukora te Kristo.
A kona Aomata aika Wanawana n tei ibukiia naake a ukoukora te Kristo rinanon te kekeiaki ao te kamatebwai. Nanoia ae korakora nakon te koaua e kairiia nakon kakaean te Kristo ao n Taromauriia n Nakoana ae aia Uea ueea, aia Tia kamaiu aomata.4
Timeon ao Nei Anna
A kona Timeon ao Nei Anna n tei ibukiia naake a ukoukora Kristo rinanon te Tamnei. Aomata aika moan te tamaroa aikai a bon rangin n taua te aro ao, rinanon te aki mamatam ao te tataro ao man kairan maiu ni kiritian ao n ongotaeka, a tataninga ma te ingainga ni kan noora te bong are e na roko iai Natin te Atua.
Rinanon te kakaonimaki, te nanorinano, ao te onimaki, a tataninga ma te taotaonaki n nano ibukin rokon te Tia Kamaiu.
N tokina, a kaniwangaaki aia kakaonimaki ngke anganaki Maria ao Iotebwa te ataei are n te bong teuana e na katoka Iaona aia bure aomata.5
Taan Onimaki ibuakoia Nibwaite ao Reimwanaite
Te karaki ae riinga te nano n aroia taan onimaki n te Aonaaba ae Boou n tarai kanikina ibukin bungiakin te Tia Kamaiu ae kuneaki inanon Ana Boki Moomon.
Ko uringnga bwa naake iai aia onimaki iroun Kristo a bwainingareaki ao ni bwainikirinaki. Aomata aika a mwaiti aia taneiai ao aia atatai ni bwain te aonaaba n te bong anne a bukiniia taan onimaki ibukin teimatoaia ni boutokai keewe aika buakaka. Ni koauana, taan aki onimaki a rangin ni korakora aia bwainingare ngaia are a karika “te kiriwe ae korakora” n te aba (3 Nibwaai 1:7). A kaenaenaia naake a kakoaua bwa e na bungiaki te Tia Kamaiu.
Uniia ao nanobuakaia e rikirake ni korakora n te aro are a tangiria n tiringiia naake a kakoauaa te Tia Kamaiu. A bane n tauaki mwiin aron katokan mwakuri aikai n Ana Boki Moomon.6
Taan onimaki ake a maiu n te tai aei a kona n tei ibukiia naake a ukoukora te Kristo riki ngkana tabeman a ngare, a kaenaena, ao ni kamaraki nano. A ukoukora Kristo e ngae ngke tabeman a kataia n taekiniia ni kewe bwa aki itiaki, aki reirei, ao ni kai mwamwanaaki.
Ma uniia tabeman aki kakerikaaka aia onimaki ni koaua taan onimaki man ukoukoran Kristo.
Ti Ukoukora Kristo
Ni kabutaa te ririki, ao tao riki n tain te Kiritimati aei, e na kakabwaiaira ngkana ti titiraki riki te titiraki “I kanga n ukoukora Kristo?”
N tain te kaangaanga ni maiuna, te Uea ae Tawita e koroia, “O te Atua, bon Atuau ngkoe; N na kakorakoraai n ukoukoriko: e taka tamneiu n tangiriko, e bati ni bwarua rabwatau i bukim.”7
Tao te katei aei n ukoukora te Atua bon teuana bukina ae kabwarabwaraaki iai Tawita bwa te aomata ae ai aron nanon te Atua.8
N tain te Kiritimati aei ao ni kabuta te ririki, ti kona n ukoukoria ma nanora ao tamneira ara Tia Kamaiu ae tangiraki, te Uea n Raoi, Atuaia Iteraera ae Tabu. Ibukin te nano aei, nanona ae raka riki, e aki tii kabwarabwaraa bwa antai ngaira ngkai ngaira kaain Ana Ekaretia Iesu Kristo ni Boong Aika Kaitira ma ae raka riki bwa antai ngaira aika ana reirei Kristo.
© 2017 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/17. Kariaiakaki rairana: 6/17. Rairan te First Presidency Message, December 2017. Kiribati. 97932 859