Toktok bilong Nambawan Presidensi, Jun 2017
Singautim long Wok
Taim Profet Joseph Smith singautim Elda Heber C. Kimbal (1801–68) long “opim dua bilong salvesen” olsem wanpela misinari igo long England, Elda Kimbal i bin pilim long bel bilong em olsem em i bai no inap long wokim dispela wok.
Em i bin raitim olsem “O, Bikpela,” “Mi no wanpela man bilong toktok gut, na olsem mi bai no inap stret long dispela kain wok.”
Elda Kimball i wanbel tasol wantaim dispela wok, na itok: “Dispela ol tingting ino bin poretim mi long dispela rot bilong wok; dispela taim mi bin save long laik bilong Papa bilong mi long Heven, mi bin pilim wanpela strongpela tingting long go maski olsem planti samting bilong bringim bagarap long mi i stap, mi bilip olsem Em bai sapotim mi ananit long pawa bilong Em we i bikpela moa yet long olgeta samting, na givim mi olgeta samting bai mi nidim.”1
Yupela ol yangpela brata na susa bilong mi husat Profet i singautim yupela long ful-taim misinari sevis, save olsem, em i singautim yupela long dispela wok bikos, olsem Elda Kimball, yupela “gat laik long sevim God” (D&C 4:3) na bikos yupela i redi na yupela i stap long gutpela pasin.
Yupela ol lapun marit lain, yupela tu Profet i singautim yupela long wok bikos long wankain samting. Tasol yupela, bringim ikam ino laik long sevis tasol tu dispela bikpela save yupela kisim long planti yia bilong sakripais, lav, na save olsem Papa bilong yupela long Heven ken yusim long tasim lewa na bel bilong ol pikinini man na pikinini meri bilong Em husat i wok long painim dispela trut. I nogat tubel, yupela lainim pinis olsem yumi no inap save tru tumas long lav bilong Bikpela inap yumi sevim Em taim yumi sevim ol narapela.
Long ol laik bilong yupela long sev olsem ol misinari, yupela bai bungim feit na strong insait long pen na hat taim, strong long bungim pen na bilip long gat tras na igat bun long kamap gut gen taim birua i painim yupela, strongpela tingting na yupela igat wanpela tingting tasol long wokim samting. Ol misinari husat i putim bel na tingting long wokim samting ken bringim ol mirakel insait long misin bilong ol.
Presiden John Taylor (1808–87) toktok long ol nambawan na gutpela bilong ol misinari olsem: “Ol kain man [na meri na marit lain] mipela laikim olsem ol lain long kisim dispela gospel toktok igo aut olsem ol man husat igat feit long God; ol man husat igat feit long lotu bilong ol; ol man husat i onaim prishud bilong ol; ol man long husat … God inap bilip na trastim ol. … Yumi laikim ol man husat i pulap long Holi Gos na pawa bilong God[,] … ol man bilong ona, gutpela pasin, stretpela pasin na klinpela pasin.”2
Bikpela i tokaut:
“Long wanem dispela graun i mau na ol manmeri redi long harim tok bilong God; na lukim, yupela husat i wok hat wantaim olgeta strong bilong yupela, yupela putim gut ol samting bilong bihain taim yupela bai i no inap painim bagarap, tasol yupela bringim salvesen long sol bilong yupela;
“Na feit, hop, siariti na lav, wantaim olgeta samting long bringim glori long God, we bai mekim yupela kamap fit long wokim dispela wok” (D&C 4:4–5).
Singaut bilong yupela ibin kam long wei bilong litimapim tingting. Mi testifai olsem husat Papa lo heven i singautim, bai tu mekim em kamap fit. Yupela bai kisim halivim kam long heven taim yupela prei na wok hat long gaden wain bilong Bikpela.
Dispela naispela promis Bikpela ibin givim long ol misinari pastaim tru long dispela taim, olsem istap insait long Doktrin na Kavanen, bai bilong yupela: :Bai mi go bipo long pes bilong yu. Bai mi stap long han sut sait bilong yu na long han kais sait bilong yu, na Spirit bilong mi bai stap insait long lewa bilong yu, na ol angelo bilong mi bai raunim yu na litimapim yu go antap” (D&C 84:88).
Taim yupela wok long sev, bai yupela wokim planti memori bilong oltaim oltaim na ol lain husat bai yupela stap poroman wantaim ol. Mi no save long wanpela wok we i bai givim wanpela bikpela moa yet kaikai bilong hamamas tasol dispela wok bilong misin.
Na nau, wanpela liklik toktok bilong ol elda, ol sista, na ol marit lain husat, long wanem kain asua, ino inap long pinisim taim yupela kisim long wok bilong misin: Bikpela i lavim yu. Em i hamamas tumas long sakripais bilong yu. Em i save olsem yu pilim nogut long bel bilong yu. Save olsem Em i gat yet wok bilong yu long wokim. Noken larim Satan i tokim yu long narapela samting. Noken daunim yu yet; noken daunim tingting bilong yu; noken lusim hop.
Olsem mi bin lukim gut long jenerol konferens bihain tasol long taim mi kisim wok long Sios: “Noken poret. Stap hamamas tasol. Taim bihain em i lait olsem tasol feit bilong yu.”3 Dispela tok promis em i stap tru yet bilong yu. Olsem na noken lusim feit bilong yu, bikos Bikpela i no lusim feit long yu. Holim pas ol kavanen bilong yu na muv i go het.
Dispela ples graun i nidim tumas gospel bilong Jisas Krais. Bikpela i ken blesim olgeta Sen—bilong Em maski long wanem hap yu wok—wantaim lewa olsem misinari.
© 2017 ikam long Intellectual Reserve, Inc. Olgeta toktok hia i bilong sios tasol Printim long USA. Tok orait long Inglis: 6/16. Tok orait long tanim tokples: 6/16. Tanim tok bilong First Presidency Message, June 2017. Tok Pisin. 97926 878