Sharon Eubank
Unang Magtatambag, Kinatibuk-ang Kapangulohan sa Relief Society
Isip bag-ong empleyado sa LDS Humanitarian Services, nasaksihan ni Sharon Eubank ang mga kasakit, kapait, kasub-anan, ug pagbangutan nga nagpalisud kaniya sa pagtrabaho. Pinaagi sa pag-ampo, iyang nasabtan nga bisan og makatabang siya sa Ginoo sa pag-atiman sa Iyang mga anak, dili siya ang gisangunan niana nga kasubo. “Si Jesukristo ang gisangunan. Iyang pas-anon kini nga palas-anon. Sila Iyang mga katawhan, ug maminaw ug motubag Siya sa ilang mga pag-ampo.” Kana nga tubag miusab sa iyang abilidad sa pagtabang ug pagserbisyo.
Mga tuig ang milabay, si Sister Eubank, isip direktor sa LDS Charities—nga humanitarian arm sa Simbahan—mihatud og tabang ug gi-promote ang self-reliance sa tibuok kalibutan niadtong nanginahanglan.
Gipaluyohan niadtong Abril 1, 2017, ngadto sa Kinatibuk-ang Kapangulohan sa Relief Society, padayon siya sa iyang tahas isip direktor sa LDS Charities. Dunay “talagsaong relasyon” tali sa LDS Charities ug Relief Society, diin ang mga sakop sa Kinatibuk-ang Kapangulohan sa Relief Society molingkod uban sa mga board of director alang sa LDS Charities, mipasabut siya. Ang iyang mga responsibilidad sa duha ka organisasyon molig-on niana nga sumpay.
Natawo niadtong 1963 sa Redding, California, USA, si Sharon ang kinamagulangan sa pito ka anak nila ni Mark ug Jean Eubank. Gipadako sa Bountiful, Utah, USA, si Sister Eubank nagtubo sa usa ka 10-acre (4 hektaryas) nga luna diin ang mga batang Eubank mamu-pu og mga apricot, moayo og mga ligadira [sprinklers], ug dunay dakong akses sa mga kabungturan sa Utah.
Nakadawat si Sister Eubank sa iyang bachelor’s degree sa English ug history gikan sa Brigham Young University sa Provo, Utah, ug nagserbisyo sa Finland Helsinki Mission.
Agig dugang sa iyang trabaho sa Church Welfare Department, si Sister Eubank nagtrabaho sa Capitol Hill sa Washington, D.C., USA, usa sa mga tag-iya sa gamayng negosyo, nga nagpuyo sa tabok sa dagat sa Japan ug France.
Ang matag oportunidad usa ka “dako nga kausaban sa pagtuo” nga nakatabang nga iyang makat-unan ang kahanas nga iyang gigamit karon, naghimo nga iyang matagboan ang talagsaong mga tawo sa sulod ug gawas sa Simbahan, ug naghatag kaniya og gugma ug pagdayeg sa daghang mga kultura sa kalibutan, pinulongan, ug sa pagkaon.