Elder Taniela B. Wakolo
General Authority Seventy
Gipahinungod ni Elder Taniela Biu Wakolo ang matag adlaw sa iyang kinabuhi sukad sa iyang bunyag niadtong Marso 1994 sa pagserbisyo sa Ginoo.
Natawo niadtong 1967 sa gamayng isla sa Lomaloma, Lau, Fiji, kang Taniela Vosa ug Temalesi Buadromo Wakolo, si Elder Wakolo ang kinamanghuran sa unom ka anak. “Gipadako ko sa kabus kaayong panimalay, apan buhong sa gugma alang sa usag usa,” miingon siya.
Sa edad nga 12, mibiya si Elder Wakolo sa balay sa iyang mga ginikanan aron moeskwela sa boarding school nga dunay kapin sa 500 ka batan-ong lalaki, nga nanag-edad og 12 hangtud 19. “Usa kadto ka talagsaong dapit sa pagbansay para kanako,” miingon siya. “Didto ko nakakat-on og disiplina sa kaugalingon.”
Nakig-date siya ni Anita Herberta Moimoi, bag-ong kinabig, kapin pa sa usa ka tuig. Nagminyo sila niadtong Agosto 22, 1987, sa Suva, Fiji.
Ang pagkakabig wala dayon mahitabo ni Elder Wakolo, ug kapin sa walo ka tuig sa ilang panag-uban sa kaminyoon, nakatagbo siya’g daghang misyonaryo. “Nakahuman ko sa mga diskusyon [sa misyonaryo] upat ka higayon sulod sa walo ka tuig,” miingon siya. “Naka-24 ka misyonaryo ko.”
Usa ka yanong pangutana gikan sa usa ka misyonaryo mahitungod sa ngalan sa Simbahan ang nakausab sa akong hunahuna mahitungod sa bunyag. “Ang Simbahan kinahanglang nganlan kon kinsa ang tag-iya niini,” miingon siya. “Mao kadto alang kanako.”
Si Elder Wakolo ug ang iyang asawa na-seal sa Nuku‘alofa Tonga Temple niadtong 1995. Mga ginikanan sila sa duha ka mga anak.
Mga oportunidad sa pagserbisyo diha-diha dayon misunod sa iyang bunyag. Duha ka semana human sa iyang bunyag, gitawag siya nga mahimong sakop sa ward Young Men presidency ug magtudlo sa seminary kauban sa iyang asawa. Wala dangti og usa ka tuig, gidawat niya ang tawag nga branch president. Sa wala madugay nagserbisyo siya nga counselor sa stake presidency, stake president, ug Area Seventy. Sa panahon nga gitawag siyang General Authority Seventy, nag-preside siya sa Arkansas Little Rock Mission.
Si Elder Wakolo nagtuon og management and public administration ug nakaangkon og master’s degree sa management. Bag-o lang, siya ang manager sa Fiji Service Center sa Simbahan.