Ennaan eo an Būreejtōnji eo Kein Kajuon, M̧aaj 2017
Kar Pojak kōn Jim̧we
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Rikanan eo an Anij ioon laļ, Būreejtōn Thomas S. Monson, ekar kwaļok, “Rainin, jej jeļmae juon kain jerawiwi eļap, m̧wil nana, im nana ko rej koba ippān doon im̧aan mejād.”1
Kwon kar ke bwilōn̄ ilo am̧ ekkatak ke Būreejtōn Monson ekar kōnono kōn naan kein 50 iiō ko remootļo̧k? Eļan̄n̄e jaar kōpopo eļap n̄an jum̧ae nana tōre ko m̧okta, ewi jon̄an an men ko renana kaamijak kōj rainin? Kōn juon un em̧m̧an, em̧ōj an kar Irooj kwaļo̧k kōn tōre kein ad, “Lo, rikōjdat ekoba” (K&B 38:12).
Tariņae in im “jej aolep pād ie”2 ekar ijjino m̧okta jān ad kar ļo̧tak tok n̄an laļ in. Ekar ijjino m̧okta jān an kar laļ in kar kōm̧anm̧an. Ekar jino elōn̄ taujin iiō ko remootļo̧k ilo mour eo m̧okta, ijo Setan eaar jum̧ae im “kappukot n̄an ko̧kkure anemkwōj in kāālet eo an armej” (Moses 4:3).
Setan eaar luuji tariņae eo im “em̧ōj joļo̧k e n̄an laļ” (Revelesōn 12:9), ijo im ej wōnm̧aanļo̧k wōt kōn tariņae eo an rainin. Ijin ioon laļ in “ej kōm̧m̧an tariņae ippān ro rekwōjarjar an Anij, im jepooļe peļaakier” (K&B 76:29) ekoba riab, m̧ōn, im mālijjon̄ ko.
Ej tariņae ippān rikanaan im rijilōk ro. Ej tariņaeik kien erreo im kwojarjar eo an m̧are. Ej tariņaeik ippān baam̧le im tampeļ. Ej tariņaeik men ko rem̧m̧an, kwojarjar, im aorōk.
Ekōjkan ad tariņaeik rikōjdat in? Ekōjkan ad tariņaeik nana ko me rej waļo̧k n̄an aer kapooļ laļ in ad? Ta ko ad kein tariņae? Wōn ro ad rijipan̄?
Kajoor eo an Pinmuur eo
Rikanaan Josep Smith ekar katakin bwe Setan ewōr an kajoor iood n̄e jej kōtļo̧k bwe en anjo̧ iood.3
Loe raan kein ad, Nipai “eaar lo kajoor in Lamb an Anij, bwe ekar bun̄ ioon ro rekwōjarjar jān kabun̄ eo an Lamb eo, im ioon armej in bujen ko an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap” (1 Nipai 14:14; eoon eo eaorōk kar kobaiktok).
Ekōjkan ad kapojak kōj make kōn jim̧we im kajoor? Jej kōjparok raan in Jabōt im kautiej priesthood eo. Jej kōm̧m̧an im kōjparok bujen ko rekwōjarjar, jerbale menmenbwij eo an baam̧le ko ad, im etal n̄an tampeļ eo. Jej wōnm̧aanļo̧k iien otemjej n̄an ukweļo̧k im akweļap ippān Anij n̄an “kōjerbal bōtōktōkin pinmuur eo an Kraist bwe kōmin maron̄ bōk jeorļo̧k in jero̧wiwi ko am” (Mosaia 4:2). Jej jar im jerbal im kam̧ool im kōjerbal tōmak ilo Jisōs Kraist.
Jej barāinwōt kōpooj kōj make kōn jim̧we im kajoor ilo ad “ko̧koni ilo ļōmņak ko [ad] iien otemjej naan ko in mour” (K&B 84:85). Jej ko̧koni naan kein ilo ad leļok aolepen ad n̄an jeje ko rekwojarjar im ilo naan ko an ro rikaijeran Anij im ekar kālet er, ro renaaj kwaļok Ankilan, ļōm̧nak, im ainikien (lale K&B 68:4) ilowaan kweilok eo eļap an allōn̄ in tok.
Ilo tariņae in ad ņae nana, jej aikuj keememej bwe ewōr jipan̄ jān jimōr ijin im turājet in rōn̄ōl eo. Ad rijipan̄ ekoba Anij Jemed indeeo, Irooj Jisōs Kraist, im Jetōb Kwojarjar.
Rijipan̄ ro ad ekoba jar in tariņae eo jen lan̄ im jejjab loi. “Kwon jab mijak,” Elija ekar jiron̄lok juon em̧m̧an eo eleln̄on̄ ilo aer kar jelm̧ae jar in tarinae eo enana, “bwe ro rej rie kōj relōn̄ jān ro rej rie er” (lale 2 Kiin̄ ro 6:15–16).
Jej jab aikuj mijak. Anij ej iakwe rikwojarjar ro an Eban kōmake kōj.
Ijeļā bwe Anij, ilo uwaak in jar, em̧ōj An kwaļo̧k an jouj n̄an lo̧mo̧o̧ren eō jān nana. Ij kam̧ool bwe kōn jipan̄ eo an Anij Jemed, Rilo̧mo̧o̧r eo an laļ, im Jetōb Kwojarjar, jemaron̄ jeļā bwe jenaaj bōk eļapļok jān jon̄an kajoor n̄an jelm̧ae jabdewōt men ko renana jej iooni.
Jemaron̄ ke aolep iien kar pojak kōn jim̧we bwe jen maron̄ leke ippād make ilo anjo̧ eļap.
© 2017 jān Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an First Presidency Message, March 2017. Marshallese. 97923 874