Visiting Tijing Mesej, Febwari 2017
Atonmen blong Kraes Hem I Pruf blong Lav blong God
Stadi long toktok ia wetem prea mo luklukgud blong kasem insperesen blong save wanem blong serem.
Fet, Famli, Help
Blong andastanem se Papa blong yumi long Heven i givim Wan Pikinini blong Hem Nomo blong mekem se yumi nomo save ded, mo janis blong kasem laef we i no save finis i save helpem yumi blong filim lav blong God we i nogat en long hem mo i had blong yumi save andastanem. Sevya blong yumi tu i lavem yumi.
“Huia i save seraotem yumi long lav blong Kraes? …
“From se Mi mi strong long tingting, se i no ded, o laef, o ol enjel, o ol tijing, o ol papa, o ol samtimg blong naoia, o ol samtig we bae i kam,
“ O ol samting we i stap hae antap, ol samting we i stap andanit, o eni narafala man o animol, i save seraotem yumi long lav blong God, we i stap Kraes Jisas Lod blong yumi” (Rom 8:35, 38–39).
Long Atonmen blong Jisas Kraes, Elda D. Todd Christofferson blong Kworom blong Olgeta Twelef Aposol oli talem: “Safaring blong Sevya long Getsemane mo bigfala harem nogud blong Hem long kros i pemaot yumi long sin from se hem i stretemaot wanem we jastis i putum agensem yumi. Hem i soemaot moa sore mo fogivim olgeta we oli sakem sin. Atonmen i stretem tu ol kaon we jastis i gat long yumi taem hem i stap hilim mo pemaot yumi from eni safaring we yumi go tru long hem nomata se yumi raet. ‘From luk, hem i harem nogud long ol soa blong bodi blong evri man, yes, ol soa blong bodi blong evri samting we i stap laef, ol man tugeta wetem ol woman, mo ol pikinini, we oli blong famli blong Adam’ (2 Nifae 9:21; luk tu long Alma 7:11–12).”1
Kraes i bin “raetem nem blong yumi long medel blong ol han blong Hem” (Aesaea 49:16). Linda K. Beton, Rilif Sosaeti Jeneral Presiden, i talem, “Bigfala fasin ia blong lav i sud sendem wanwan long yumi i go daon long ol ni blong yumi mo prea wetem wan tingting we i stap daon blong talem tangkyu long lav blong Papa long Heven blong sendem Wan Pikinini blong Hem ia nomo we i stret mo gud evriwan blong safa from ol sin blong yumi, ol hat we oli soa, mo evri samting we i no stret long wanwan laef blong yumi.”2
Sam moa skripja mo Infomesen
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong Visiting Teaching Message, February 2017. Bislama. 97922 852
Tingting long Hemia
?Olsem wanem nao yumi save soemaot tangkyu blong yumi long lav blong God mo long Jisas Kraes from presen ia we i Atonmen blong Sevya?