Fas Presidensi Mesej, Febwari 2017
“Olsem We Mi Lavem Yu”
I Kam long Presiden Thomas S. Monson
Sam yia i pas, wan fren, nem blong hem Luis, i talem long mi stori blong mama blong hem we fasin blong hem i kaen. Taem hem i ded, hem i no bin livim biaen wan bigfala mane blong ol boe mo gel blong hem, be hemi livim wan rij fasin long saed blong ol eksampol, sakrifaes mo fasin blong hem blong stap obei.
Afta long ol toktok long fenerol seves mo oli bin wokbaot wetem sore i go long gref, ful famli i bin go tru long smolfala samting we mama i bin livim biaen. Insaed long ol samting ia, Luis i faenem wan pis not wetem wan ki. Pis not ia i talem: “Long bedrum we i stap long kona, insaed long lasfala droa blong tebol blong mi, i gat wan smol bokis. Ol tresa blong hat blong mi oli stap insaed long hem. Ki ia bae i openem bokis ia.”
Evriwan i stap tingting se wanem ia mama i gat we i gud tumas mekem se hem i mas lokem.
Oli karemaot bokis long ples blong hem mo openem sloslo wetem help blong ki ia. Taem Luis mo ol narafala oli stap lukluk tru long ol samting insaed long bokis ia, oli bin faenem foto blong wanwan pikinini, wetem nem blong pikinini mo deit we hem i bon long hem. Luis i pulumaot wan valentine presen oli bin mekem long haos. Long wan raeting we i no gud tumas, olsem blong wan pikinini, we hem i luksave se hem i raeting blong hemwan, hem i ridim ol toktok ia we hem i bin raetem 60 yia i pas: “Dia Mama, mi lavem yu.”
Ol hat oli kam sopsop, ol voes oli go daon, mo ol ae oli wetwet. Tresa blong mama, hem i famli blong hem we i no save finis. Paoa blong hem i stanap long strongfala fandesen ia blong “Mi lavem yu.”
Long wol blong tedei, i nomo gat narafala ples we yumi nidim strongfala fandesen ia i bitim insaed long ol hom blong yumi. Mo i nomo gat wan narafala ples we bae wol i save faenem gudfala eksampol blong fandesen ia bitim hemia we i stap insaed long hom blong ol Lata-dei Sent we oli putum lav long medel blong famli laef.
Long yumi we yumi promes blong stap olsem ol disaepol blong Sevya Jisas Kraes, Hem i givim wan impoten instraksen:
“Wan niufala komanmen mi givim long yufala, blong yufala i lavlavem yufala; olsem we Mi mi lavem yufala, blong yufala i lavem ol narafala man tu.
“Nao from we yufala i stap lavlavem yufala, bambae olgeta man oli luksave se yufala i man blong mi” (Jon 13:35).
Sapos yumi folem komanmen blong lavem narafala man, yumi mas tritim narafala man wetem lav mo sore mo respek, soemaot lav blong yumi long evri samting we yumi mekem evridei. Lav i givim wan toktok we i kaen, wan fasin blong save wet longtaem blong givim wan ansa, wan fasin blong tingbaot narafala man, wan sorae we i save andastanem samting, wan hat we i save fogivim man. Long evri samting we yumi stap mekem, ol fasin ia mo ol narafala fasin olsem, oli save help blong soemaot lav insaed long hat blong yumi.
Presiden Gordon B. Hinckley (1910–2008) i talemaot se: “Lav … hem i sospen blong gol we i stap long en blong renbo. Be yet hem i moa bitim en blong renbo. Lav i stap long stat tu, mo naesfala samting ia we i go kros long skae long taem blong hariken hem i kamaot long lav. Lav hem i sekiuriti we ol pikinini oli krae from, ol yut oli wantem, hem i skoj ia we i fasem taet mared laef, oel ia we i blokem ol rafraf taem insaed long hom; hem i pis long taem we yu olfala, hem i sanlaet blong hop we i saen tru long ded. Olgeta we oli yusum fasin ia long evri samting we oli mekem wetem ol famli, ol fren, jos, mo ol neiba, oli rij”2
Lav hem i stamba blong gospel, bigfala fasin blong sol blong ol man. Lav hem i meresin blong ol famli we oli no oraet, ol komiuniti we oli no gud, mo ol nesen we oli sik. Lav hem i wan smael, wan tata, wan toktok we i kaen, mo wan gudfala toktok. Lav hem i sakrifaes, seves mo fasin blong no tingting long yuwan.
Ol hasban, lavem ol waef blong yufala. Gat respek mo glad long olgeta. Ol sista, lavem ol hasban blong yufala. Givim ona mo leftemap tingting blong olgeta.
Ol papa mo mama, lavem ol pikinini blong yufala. Prea from olgeta, tijim olgeta, mo testifae long olgeta. Ol pikinini, lavem ol papa mo ol mama blong yufala. Soemaot respek, gladhat, mo fasin blong stap obei long olgeta.
Sapos yufala i nogat klin lav blong Kraes, Momon i tijim, “[yufala] i nating.”3 Prea blong mi se bae yumi folem tijing blong Momon blong “prea long Papa wetem evri paoa blong hat, blong [yumi] save fulap wetem lav ia we hem i bin givim long olgeta we oli ol tru man blong folem Pikinini blong Hem Jisas Kraes; blong [yumi] save kam ol boe blong God blong taem we bae hem i kamkamaot, bae yumi kam olsem hem.”4
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong First Presidency Message, Febwari 2017. Bislama. 97922 852
Yusum Mesej Ia blongTij
Presiden Monson i tijim insaed long hom mpoten lesen blong soemaot tru lav olsem hemia blong Kraes. Tingbaot blong askem olgeta we yu visitim blong kam tugeta olsem wan famli mo tokbaot ol samting we oli save mekem blong soemaot lav long wanwan long olgeta. Maet yu wantem leftemap tingting blong olgeta blong jusum wan long ol tingting ia mo mekem ol plan tugeta olsem wan famli blong mekem hemia i wok. Eksampol, ol memba blong famli oli save lukaotem wan janis blong givim wan sikret seves long wan narafala memba blong famli evri wik. Maet yu save askem olgeta blong tingting bak long ol hadwok blong olgeta blong kasem gol blong olgeta blong leftemap fasin blong lav insaed long hom blong olgeta.