Fa’a’ite i te ’evanelia tei fa’aho’i-fa’ahou-hia mai
Nā Elder Dallin H. Oaks
Nō te pupu nō te Tino ’Ahuru Ma Piti ’āpōsetolo
Te mea tā tātou e parau nei « te ’ohipa misiōnare a te melo » e ’ere ïa te hō’ē fa’anahonahora’a, te hō’ē rā huru nō te here ’e te torora’a atu i te rima nō te tauturu i te mau ta’ata nā pīha’i iho ia tātou.
I.
Fātata i te hope’ara’a o Tāna tāvinira’a i ni’a i te fenua nei, ’ua fa’aue tō tātou Fa’aora, ’o Iesu Mesia, i tāna mau pipi : « ’E teienei, e haere ’outou e fa’ariro i te mau fenua ato’a ’ei pipi » (Mataio 28:19) ’e « E haere ’outou ē ’ati noa a’e te mau fenua ato’a, e fa’a’ite haere i te ’evanelia i te ta’ata ato’a » (Mareko 16:15). Tei raro a’e te mau keresetiano ato’a i teie mau fa’a’uera’a ’ia fa’a’ite i te ’evanelia i te ta’ata ato’a. E rave rahi tei pi’i i te reira « te fa’auera’a rahi. »
Mai tā Elder Neil L. Andersen i fa’a’ite i roto i te tuha’a purera’a nō teie po’ipo’i, e mea pāpū roa tei roto te Feiā Mo’a i te mau Mahana Hope’a nei i te feiā ha’apa’o roa a’e i teie hōpoi’a rahi. E ti’a ia tātou ’ia nā reira nō te mea ’ua ’ite tātou ē tē here nei te Atua i te tā’āto’ara’a o tāna mau tamari’i ’e ’ua fa’aho’i mai ’oia i teie mau mahana hope’a nei i te tahi atū ā ’ite faufa’a rahi ’e te mana nō te ha’amaita’i ia rātou pā’āto’a. ’Ua ha’api’i te Fa’aora ia tātou ’ia here i te ta’ata ato’a mai tō tātou mau taea’e ’e mau tuahine, ’e tē fa’atura nei tātou i taua ha’api’ira’a ra nā roto i te fa’a’itera’a i te ’itera’a pāpū ’e te parau poro’i nō te ’evanelia tei fa’aho’i-fa’ahou-hia mai « i rotopū i te mau nūna’a ato’a, te mau ’ōpū, te mau re’o, ’e te mau ta’ata ato’a » (PH&PF 112:1). E tufa’a faufa’a te reira nō te rirora’a ’ei Feiā Mo’a i te mau Mahana Hope’a nei. E fa’ariro tātou i te reira mai te hō’ē ha’amaita’ira’a ’oa’oa. E aha atu ā ïa te mea ’oa’oa roa a’e maori rā te fa’a’itera’a i te mau parau mau nō te orara’a mure ’ore i te mau tamari’i a te Atua ?
I teie nei mahana e rave rahi tā tātou mau rāve’a nō te fa’a’ite i te ’evanelia tei ’ore i vai na i te mau u’i nā mua atu. Tē vai nei ia tātou te ’afata teata, te ’itenati, ’e te tahi atu mau rāve’a natira’a sōtiare. E rave rahi tā tātou mau parau poro’i faufa’a rahi nō te fa’a’ite atu i te ’evanelia tei fa’aho’i-fa’ahou-hia mai. E ti’ara’a maita’i tō te ’Ēkālesia i roto i te mau fenua e rave rahi. ’Ua rahi atu ā te nūmera o tā tātou mau misiōnare. Tē fa’a’ohipa hope ra ānei tātou i te tā’āto’ara’a o teie mau rāve’a ? Tē ti’aturi nei au ē e parau mai te rahira’a o ’outou ē, ’aita. Tē hina’aro nei tātou ’ia manuia maita’i atu ā i te ravera’a i tā tātou hōpoi’a tei hōro’ahia mai e te Atua nō te poro i te ’evanelia tei fa’aho’i-fa’ahou-hia mai nā te ao ato’a nei.
Tē vai nei e rave rahi mau mana’o maita’i e nāhea ’ia fa’a’ite i te ’evanelia ’o te manuia i roto i te mau titi ’aore rā te mau fenua tāta’itahi. Terā rā, nō te mea ho’i ē e ’Ēkālesia tātou nā te ao tā’āto’a nei, tē hina’aro nei ïa vau ’ia paraparau atu i te mau mana’o o te manuia i te mau vāhi ato’a, mai te mau ’āma’a ha’amau-’āpī-hia ’e tae atu i te mau ’āma’a teī ha’amau-maoro-hia, mai te mau ta’ere tei fāri’i i te ’evanelia a Iesu Mesia ’e tae atu i te mau ta’ere ’e te mau nūna’a o tē pāto’i rahi nei i te fa’aro’o. Tē hina’aro nei au e paraparau nō ni’a i te mau mana’o tā ’outou e nehenehe e fa’a’ite i ni’a i te feiā tei ti’aturi pāpū ia Iesu Mesia, te feiā tei ’ore roa atu i fa’aro’o a’e i tōna i’oa, te feiā ’o tē au nei i tō rātou orara’a, ’e te feiā e tūtava onoono nei i te ha’amaita’i ia rātou iho.
E aha ïa tā’u ’e nehenehe e parau ’o te tauturu i roto i tā ’outou fa’a’itera’a i te ’evanelia noa atu te huru o tō ’outou orara’a ? Tītauhia te tauturu a te mau melo ato’a, ’e e nehenehe i te mau melo ato’a e tauturu, nō te mea e rave rahi ’ohipa e ti’a ’ia ravehia ’a fa’a’ite ai tātou i te ’evanelia tei fa’aho’i-fa’ahou-hia mai i te mau nūna’a ato’a, te mau ’ōpū ato’a, te mau re’o ato’a, ’e te mau ta’ata ato’a.
’Ua ’ite pā’āto’a tātou ē ’e mea faufa’a rahi te tauturura’a a te mau melo i roto i te ’ohipa misiōnare nō te fa’atupura’a i te fa’afariura’a ’e te tāpe’ara’a mai i te mau ta’ata. ’Ua parau te peresideni Thomas S. Monson ē : « Teie te taime nō te mau melo ’e nō te mau misiōnare ’ia haere ’āmui, ’ia ha’a ’āmui, ’ia rohi i roto i te ’ōvine a te Fatu nō te arata’i mai i te mau vārua Iāna ra. ’Ua fa’aineine ’oia i te mau rāve’a nā tātou nō te fa’a’ite i te ’evanelia i roto i te mau fa’anahora’a e rave rahi, ’e e tauturu mai ’oia ia tātou i roto i tā tātou ’ohipa mai te mea ē, e fa’a’ohipa tātou i te fa’aro’o nō te fa’aoti i tāna ’ohipa ».1
Tē fa’a’itera’a i te ’evanelia tei fa’aho’i-fa’ahou-hia mai, e hōpoi’a ’e e ha’amaita’ira’a keresetiano ïa nō te roara’a o tō tātou orara’a. ’Ua fa’ahamana’o mai ’o Elder Quentin L. Cook ia tātou : « E ’ere te ’ohipa misiōnare mai te hō’ē noa o nā 88 nota i roto i te hō’ē piana ’o te fa’ata’ihia i te tahi noa mau taime ; e nota faufa’a rā i roto i te hō’ē pehe e ti’a ’ia fa’ata’i-tāmau-noa-hia i roto i te roara’a o tō tātou orara’a mai te mea e ti’a ia tātou ’ia ha’apa’o noa i tō tātou ti’ara’a keresetiano ’e i te ’evanelia a Iesu Mesia ».2
II.
Tē vai ra e toru mea e ti’a i te mau melo ato’a ’ia rave nō te tauturu i te fa’a’ite i te ’evanelia, noa atu te huru o te vāhi e ora rātou ’e e ’ohipa nei. E ti’a ia tātou pā’āto’a ’ia rave i te reira mau mea.
’A tahi, ’e nehenehe ia tātou pā’āto’a ’ia pure ’ia tauturuhia i roto i teie tufa’a faufa’a rahi o te ’ohipa nō te fa’aorara’a. E ha’amata te mau tauto’ora’a ato’a nā roto i te hina’aro.
Te piti, e nehenehe tā tātou iho e ha’apa’o i te mau fa’auera’a. Te mau melo ha’apa’o ’e te fa’aro’o ’o rātou ïa te mau ta’ata ’ite ’aravihi roa a’e i te fa’a’itera’a i te parau mau ’e te faufa’a o te ’evanelia tei fa’aho’i-fa’ahou-hia mai. Hau atu i te faufa’a rahi, e fāri’i ïa te mau melo ha’apa’o i te mau taime ato’a i te Vārua o te Fa’aora, nō te arata’i ia rātou ’a tūtava ai rātou i te rave i teie ’ohipa fa’ahiahia nō te fa’a’itera’a i te ’evanelia a Iesu Mesia tei fa’aho’i-fa’ahou-hia mai.
Te toru, e nehenehe tā tātou e pure ’ia fa’auruhia tātou i te mau mea e nehenehe tā tātou e rave i roto i tō tātou huru orara’a tāta’itahi nō te fa’a’ite i te ’evanelia ia vetahi ’ē. E mea ’ē te reira i te purera’a nō te mau misiōnare ’aore rā te purera’a nō te mau mea e nehenehe tā vetahi ’ē e rave. E ti’a ia tātou ’ia pure nō te mau mea e nehenehe ia tātou iho ’ia rave. ’Ia pure ana’e tātou, e ti’a ia tātou ’ia ha’amana’o ē e pāhonohia te mau pure nō teie huru fa’aurura’a mai te mea e ’āpe’ehia e te hō’ē fa’aotira’a—te tahi mea tā te mau pāpa’ira’a mo’a i pi’i « te mana’o pāpū » ’aore rā « ma tō ’ā’au ato’a ». ’A pure ma te fa’aotira’a ’ia ha’a mai te au i te fa’aurura’a tā ’outou e fāri’i, ma te fafau atu i te Fatu ’e mai te mea e fa’auru mai ’oia ia ’outou ’ia paraparau atu i te tahi ta’ata nō ni’a i te ’evanelia, e rave ’outou i te reira.
E hina’aro tātou i te arata’ira’a a te Fatu nō te mea i te hō’ē taime ’ua ineine te tahi mau ta’ata—’e te tahi ’aita—’ia fāri’i i te tahi atu ā mau parau mau nō te ’evanelia tei fa’aho’i-fa’ahou-hia mai. ’Eiaha roa atu tātou e fa’ariro ia tātou ’ei ha’avā ē ’o vai tei ineine ’e ’o vai tei ineine ’ore. ’Ua ’ite te Fatu i te ’ā’au o te tā’āto’ara’a o tāna mau tamari’i, ’e mai te mea e pure tātou nō te fa’aurura’a, e tauturu ïa ’oia ia tātou ’ia ’imi i te mau ta’ata tāna i ’ite « tei ineine i te fa’aro’o i te parau » (Alama 32:6).
’Ei ’āpōsetolo nā te Fatu, tē ani nei au i te mau melo ato’a ’e te mau ’utuāfare ato’a i roto i te ’Ēkālesia ’ia pure i te Fatu nō te tauturu ia rātou ’ia ’imi i te mau ta’ata tei fa’aineinehia nō te fāri’i i te poro’i a te ’evanelia a Iesu Mesia tei fa’aho’i-fa’ahou-hia mai. ’Ua hōro’a Elder M. Russell Ballard i teie a’o faufa’a rahi, ’o tā’u e pāturu nei : « ’A ti’aturi i te Fatu. ’O ’oia te Tia’i Māmoe maita’i. ’Ua ’ite ’oia i tāna mau māmoe… Mai te peu e’ita tātou e fa’aō atu i roto, e rave rahi ’o rātou te riro i te fa’aro’o i te poro’i nō te Fa’aho’i-fa’ahou-ra’a ’o te ha’amo’ehia… E mea ’ōhie roa te mau ture—’a pure, ’o ’oe iho ’e i roto i tō ’outou ’utuāfare, nō te mau taime misiōnare. »3 ’Ia fa’a’ite ana’e tātou i tō tātou fa’aro’o e tae mai ïa teie mau taime maita’i ’e ’aita « e pāhonora’a ha’avī ’e… te fa’ahepo. E tahe mai te reira mai te fa’ahope’ara’a au nō tō tātou here i tō tātou mau taea’e ’e mau tuahine.4
’Ua ’ite au e parau mau te reira ! Tē ’āpiti atu nei au i ta’u fafaura’a ē ma te fa’aro’o i te tauturu a te Fatu, e arata’ihia ïa tātou, e fa’aurūhia ïa, ’e e ’itehia ïa ia tātou te ’oa’oa rahi i roto i teie ’ohipa faufa’a rahi ’e te mure ’ore nō te here. E noa’a ïa ia tātou te ’ite ē, te manuiara’a i roto i te fa’a’itera’a i te ’evanelia, ’o te anira’a ïa i te ta’ata ’ia haere mai nā roto i te here ’e te mana’o mau e tauturu ia rātou, noa atu e aha tā rātou pāhonora’a.
III.
Teie te tahi atu mau mea e nehenehe tā ’outou e rave nō te fa’a’ite manuia maita’i i te ’evanelia :
-
E ti’a ia tātou ’ia ha’amana’o ē « e ha’api’i te ta’ata ’ia ineine ana’e rātou i te ha’api’i mai, ’eiaha rā ’ia ineine ana’e tātou i te ha’api’i atu ia rātou. »5 Te mea tā tātou e ’ana’anatae nei, mai te tahi atu ā mau ha’api’ira’a tumu i roto i te ’Ēkālesia tei fa’aho’i-fa’ahou-hia mai, e ’ere ïa te mea tā vetahi ’ē e ’ana’anatae ra. Te mea tā vetahi ’ē e hina’aro ’o te mau hotu ïa nō te ha’api’ira’a tumu, ’eiaha rā te ha’api’ira’a tumu iho. ’A hi’o ai ’aore rā ’a ’ite ai rātou i te mau hotu nō te ’evanelia ’a Iesu Mesia tei fa’aho’ihia mai i roto i tō tātou iho mau orara’a, e fāri’i ïa rātou i te Vārua ’e e ha’amata rātou i te ’ana’anatae i te ha’api’ira’a tumu. E ’ana’anatae ato’a paha rātou ’ia ’imi rātou i te ’oa’oa rahi atu ā, te pirira’a atu ā i te Atua, ’aore rā te hō’ē ’itera’a maitai a’e nō ni’a i te tumu ’o te orara’a.6 Nō reira, e ti’a ia tātou ’ia ’imi māite nā roto i te pure ’ia ’ite e nāhea ’ia ’imi i te mea e ’ana’anatae te ta’ata e ha’api’i rahi atu ā. Tei te huru ïa o te mau mea e rave rau, mai te huru orara’a o te ta’ata ’e tō tātou mau aura’a ’e ’ōna. E parau tumu maita’i roa teie nō te tūatapapa i roto i te mau ’āpo’ora’a, te mau pūpū autahu’ara’a ’e te mau Sōtaiete Tauturu.
-
’Ia paraparau ana’e tātou ia vetahi ’ē, e ti’a ia tātou ’ia ha’amana’o ē, e mea au a’e te hō’ē anira’a manihini ’ia ha’api’i atu ā i ni’a ia Iesu Mesia ’e tāna ’evānelia, i te hō’ē anira’a ’ia ha’api’i atu ā nō ni’a i tā tātou nei ’Ēkālesia.7 Tē hina’aro nei tātou ’ia fa’afāriu te ta’ata i te ’evānelia. ’O te hōpoi’a rahi terā a te Buka a Moromona. Te mau mana’o nō ni’a i tā tātou ’Ēkālesia e tupu ïa te reira i muri a’e i te fa’afāriura’a ia Iesu Mesia, ’aita nā mua atu. E rave rahi ’o te ’ore e mana’o maita’i nei i te mau ’Ēkālesia e here rā tō rātou nō te Fa’aora. ’A tu’u i te mau ’ohipa faufa’a rahi nā mua.
-
’Ia ’imi ana’e tātou i te arata’i i te ta’ata i te ’evanelia tei fa’aho’i-fa’ahou-hia mai, e ti’a ia tātou ’ia rave i te reira nā roto i te mana’o mau ’e te māna’ona’ora’a here i te ta’ata. E tupu te reira ’ia tāmata ana’e tātou i te tauturu i te ta’ata ’e te mau fifi tā rātou i ’ite mai ’aore rā ’a rave ai tātou i te ’ohipa i pīha’i iho ia rātou i roto i te mau ’ohipa tauturu i roto i te ’oire, mai te tāmarūra’a i te māuiui, te utuutura’a i te feiā veve ’e tei roto i te ’ati, ’aore rā te ha’amaita’ira’a i te huru orara’a o vetahi ’ē.
-
’Eiaha tā tātou mau tūtavara’a nō te fa’a’ite i te ’evanelia ’ia tā’ōti’a-noa-hia i tō tātou ana’e mau hoa ’e te feiā e rave nei i te ’ohipa i pīha’i iho ia tātou. I roto i te mau Ha’utira’a Olympic ’ua fa’aro’o tātou i te parau nō te hō’ē ta’ata fa’ahoro taxi Feiā Mo’a i te mau Mahana Hope’a nei tei ta’ita’i i te mau Buka a Moromona nā roto e hitu reo ’ē’ē ’e ’ua hōro’a i te reira i te feiā ato’a e hina’aro e fāri’i i te reira. ’Ua pi’i ’oia iāna iho te « misiōnare fa’ahoro taxi ». ’Ua parau ’oia, « Te mau āroa porōmu nō Rio de Jāneiro… ’o [tā’u] ïa ’āua misiōni. »8
’Ua parau ’o Clayton M. Christensen, tei rave rahi i te ’ohipa ’ei melo misiōnare ē, « i roto i te ārea e piti ’ahuru matahiti i ma’iri a’enei, ’aita mātou i ’ite i te tū’atira’a i rotopū i te hōhonura’a o te aura’a ’e te hō’ē ta’ata, ’e tōna ’ana’anataera’a ’ia ha’api’i nō ni’a i te ’evanelia. »9
-
E nehenehe tā te mau ’episekōpora’a nō te pāroita e fa’anaho i te hō’ē purera’a ’ōro’a ta’a ’ē i reira te mau melo e fa’aitoitohia ai ’ia ’āfa’i mai i te mau ta’ata e ’ana’anatae i te ’evanelia. E iti ri’i mai ïa te taiā o te mau melo nō te pāroita ’ia ’āfa’i mai i tō rātou mau hoa i taua huru rurura’a ra nō te mea ’ua pāpū ia rātou ē e fa’anaho-maita’i-hia te rurura’a nō te fa’a’ana’anatae ’e nō te fa’ahōho’a maita’i i te ’Ēkālesia.
-
E rave rahi atu ā te rāve’a nō te fa’a’ite i te ’evanelia. ’Ei hi’ora’a, i teie iho nei tau māhanahana ’ua fāri’i au i te hō’ē rata ’oa’oa a te hō’ē melo vāhine ’āpī tei ha’api’i nō ni’a i te ’evanelia tei fa’aho’i-fa’ahou-hia mai ’a niuniu mai ai te hō’ē o tōna hoa pīahi tahito nō te ani i te huru o te ma’i tāna e fa’aruru ra. ’Ua pāpa’i ’oia : « ’Ua fa’ahiahia vau i te huru o tōna fa’a’itera’a iāna iho iā’u nei. I muri a’e tau ’āva’e i te ha’api’ira’a nā muri i te mau misiōnare, ’ua bāpetizohia vau. ’Ua maita’i roa tō’u nei orara’a mai taua taime ra. »10 ’Ua ’ite pā’āto’a tātou ē e taui te ’evānelia tei fa’aho’i-fa’ahou-hia mai i te orara’a o te mau ta’ata e rave rahi. Tē toro ra ānei tātou i te rima ia rātou ?
-
’Ua riro te ’ana’anatae ’e te ’aravihi o tō tātou feiā ’āpī i te mau rāve’a natira’a sōtiare ’ei mau rāve’a ta’a ’ē nā rātou nō te fa’atupu i te ’ana’anatae nō te ’evanelia i roto ia vetahi ’ē. I roto i tāna fa’a’itera’a nō ni’a i te fāra’a mai o te Fa’aora i te ’āti Nephi, ’ua pāpa’i ’o Moromona : « ’Ua ha’api’i mai ’oia i te mau tamari’i a te tia’a ta’ata… ’e ’ua matara tō rātou arero iāna… e ti’a ai ia rātou ’ia parau » (3 Nephi 26:14). I teie mahana, e nehenehe paha tātou e parau ē, « e matara tō rātou [mau manimani rima] e ti’a ai ia rātou ’ia parau. » ’A nā reira, e te Feiā ’Āpī !
E ’ere te fa’a’itera’a i te ’evanelia i te hō’ē utu’a, e ’oa’oa rā. Te mea tā tātou e parau nei « te ’ohipa misiōnare a te melo » e ’ere ïa te hō’ē fa’anahonahora’a, te hō’ē rā huru nō te here ’e te torora’a atu i te rima nō te tauturu i te mau ta’ata nā pīha’i iho ia tātou. E hō’ē ato’a rāve’a nō te fa’a’ite i tō tātou mana’o nō ni’a i te ’evanelia a tō tātou Fa’aora, tei fa’aho’i-fa’ahou-hia mai. Mai tā Elder Ballard i ha’api’i mai : « Te hō’ē tāpa’o fa’a’ite faufa’a rahi roa nō tō tātou fa’afāriura’a ’e nō tō tātou mau mana’o nō ni’a i te ’evanelia i roto i tō tātou iho mau orara’a ’o tō tātou ïa hina’aro ’ia fa’a’ite i te reira ia vetahi ’ē. »11
Tē fa’a’ite pāpū nei au nō ni’a ia Iesu Mesia, ’o te Māramarama ’e te Ora o te Ao nei (hi’o 3 Nephi 11:11). Tē tūrama nei tāna ’evanelia tei fa’aho’i-fa’ahou-hia mai i tō tātou haere’a i roto i te orara’a tāhuti nei. ’Ua hōro’a mai tāna tāra’ehara ia tātou i te ha’apāpūra’a nō te orara’a i muri a’e i te pohe ’e te pūai ’ia tāmau noa i roto i te orara’a tāhuti nei. ’E tē hōro’a mai nei tāna tāra’ehara ia tātou i te rave’a ’ia fa’a’orehia tā tātou mau hara ’e, i raro a’e i te fa’anahora’a hanahana nō te fa’aorara’a a te Atua, ’ia noa’a ia tātou te ora mure ’ore, « te hōro’a hau a’e… i te mau hōro’a ato’a a te Atua » (PH&PF14:7). Nā roto i te i’oa o Iesu Mesia ra, ’āmene.