Pāruru i te ti’amāra’a pae fa’aro’o

E mea ti’a i te feiā mo’a ’ia ō atu « ma te huru mataora (constructif) i roto i te mārōra’a faufa’a rahi nō ni’a i te ti’amāra’a pae fa’aro’o », ’ua parau ’o Dallin H. Oaks nō te pupu nō te Tino ’Ahuru Ma Piti ’āpōsetolo i te hō’ē ’āpo’ora’a nō te ti’amāra’a pae fa’aro’o, i Texas, i Marite, i te ’āva’e setepa 2016. « Mai te mau tamari’i nō te tamahou ē te mau feiā tōro’a ta’a ’ē, ’e te mau metua vahine ’e te mau metua tāne, ’e te mau hoa, ’e te feiā tāpiri mai e nehenehe, tātou pā’āto’a e ti’a ’ia hāro’aro’a e aha te ti’amāra’a pae fa’aro’o ’e nō te aha e mea faufa’a roa te reira ».

I te ’āva’e tiunu ra, ’ua paraparau ato’a ’o Elder D. Todd Christofferson nō te pupu nō te Tino ’Ahuru Ma Piti ’āpōsetolo nō te pāruru i te ti’amāra’a pae fa’aro’o i roto i te hō’ē ’āpo’ora’a nā te feiā here ’āi’a i Utaha, i Marite. « ’Aita i maoro a’enei », ’ua parau ’oia « e peu mātarohia te parau ē, te ti’amāra’a pae fa’aro’o o te hō’ē noa ti’ara’a nō te ha’amori ’eiaha rā te ti’ara’a ’ia fa’a’ohipa ti’amā i tō ’outou fa’aro’o i roto i tō ’outou orara’a i te mau mahana ato’a ». ’Ua fa’aitoito ’oia i te mau ta’ata fa’aro’o ’ia ti’a nō te ti’amāra’a pae fa’aro’o nā roto i te vai-ara-noa-ra’a nō ni’a i te mau ’ohipa e tupu ra, te paraura’a i tōna mana’o ’e te fa’aōra’a i roto i te mau fa’anahonahora’a ’e te mau ’ohipara’a ta’ere, huira’atira ’e politita.

E rave rahi taime tō te feiā fa’atere o te ’Ēkālesia paraparaura’a nō niā i te ti’amāra’a pae fa’aro’o i roto i te mau a’ora’a ’e te ’āmuira’a atu i roto i te mau ’āpo’ora’a i Auteralia, Beresīria, Mēhiko, ’e i te Hau ’Āmui nō Peretāne ’e nā te vāhi rau i Marite. E ’itehia tā rātou a’ora’a ’e ha’api’ira’a nō ni’a i te ti’amāra’a pae fa’aro’o ’e e aha tā ’outou e nehenehe e rave nō te pārurura’a i te reira i ni’a religiousfreedom.lds.org. Te tahi mau tuha’a i reira e tano noa nō te fenua Marite, ’āre’a rā te mau parau tumu e nehenehe e fa’atanohia i ni’a i te tahi atu mau fenua.