Ang mga Propeta ug mga Apostoles Nangalagad

Mga propeta ug mga apostoles nagpadayon sa pagpangalagad sa tibuok kalibutan (tan-awa sa D&P 107:23). Ania ang mubo nga summary sa ilang pipila ka mga kalihokan sukad sa miaging kinatibuk-ang komperensya:

Si Presidente Dieter F. Uchtdorf, Ikaduhang Magtatambag sa Unang Kapangulohan, sa pagbisita niadtong Mayo 2016, mihalad og paglaum sa mga miyembro sa mga siyudad nga bag-o lang nabiktima sa pag-ataki sa terorista England, France, ug Belgium. Siya mibisita sa mga refugee, miadto sa dapit sa Paris France Temple (hapit na mahuman), ug miapil sa pag-organisar sa unang stake sa Czech Republic. Niadtong Hulyo mibiyahe siya ngadto sa Italy, nagpresentar og tseke nga $3 milyones nga pundo sa Simbahan sa pagtabang sa refugee relief, ug mibisita sa mga refugee camp sa Greece. Niadtong Septyembre mibisita siya sa mga miyembro sa Romania, Moldova, Slovakia, Norway, ug Germany, diin iyang gipahinungod pag-usab ang Freiberg Germany Temple. Siya miingon nga ang ebanghelyo makahatag og paglaum sa mga katawhan bisan asa sila ug nga taliwala sa mga miyembro “adunay usa ka tinuod nga pagbati sa ingon nga mga kaigsoonan sa Simbahan.”

Si Elder M. Russell Ballard sa Korum sa Napulog Duha ka mga Apostoles midumala sa Moscow Russia Stake conference niadtong Hunyo, samtang ang ubang mga stake nagmiting didto sa Saratov ug St. Petersburg, Russia. Siya usab nakigkita sa mga miyembro sa Latvia, Estonia, ug Ukraine.

Sa England niadtong Hunyo, si Elder Dallin H. Oaks sa Korum sa Napulog Duha ka mga Apostoles misulti sa mga miyembro sa British parliament nga ang kagawasan sa relihiyon nagtugot sa simbahan sa pagbuhat og maayo sa tibuok kalibutan. “Gusto namo nga ang mga panalangin sa kagawasan sa relihiyon maangkon sa tanan nga mga lumulupyo niini nga planeta, ug wala pa nato kana makab-ut karon,” miingon siya.

Sa usa ka komperensya sa pagpanggukod sa relihiyon ug pinugos nga pagbalhin nga gihimo sa Windsor Castle sa England niadtong Septyembre, si Elder Jeffrey R. Holland sa Korum sa Napulog Duha ka mga Apostoles miingon nga adunay daghan angayang makat-unan gikan sa kasinatian sa unang mga pioneer sa LDS nga makatabang sa moderno nga mga refugee nga makasugakod sa ilang mga kahimtang. “Kutob sa mahimo, kita kinahanglang mo-facilitate ug mohatud og talagsaon nga mga ilhanan sa mga refugee ug naghatag og importansya sa mga istorya gikan sa ilang nangagi,” miingon siya.

Sa Spain, lakip ang Canary Islands, ug sa Portugal, si Elder David A. Bednar sa Korum sa Napulog Duha ka mga Apostoles midapit sa mga miyembro, misyonaryo, ug mga lider nga moawhag niadtong kinsa dili kaayo aktibo nga mobalik sa hingpit nga partisipasyon diha sa Simbahan.

Sa dihang ang Vietnam mihatag og hingpit ug opisyal nga pag-ila Simbahan niadtong Hunyo, si Elder Quentin L. Cook ug Elder Gary E. Stevenson, sa Korum sa Napulog Duha ka mga Apostoles, nakigkita sa mga opisyales sa gobyerno ug gihisgutan ang kasaysayan ug kalamboan sa Simbahan. Gihisgutan usab nila sa unsang paagi nga ang Simbahan motabang sa sosyal ug maloloy-ng proyekto ug motabang sa mga kabus ug timawa. Sila usab nangulo sa miting didto sa Guam, Micronesia, ug Japan.

Usab niadtong Hunyo, ang Brisbane, Australia, ug Cook Islands napanalanginan tungod sa pagbisita ni Elder Neil L. Andersen sa Korum sa Napulog Duha ka mga Apostoles. Si Elder Andersen mibisita usab sa mga isla sa Rarotonga ug nahimong unang Apostol nga mitunob sa mga isla sa Mangaia.

Didto sa Colombia, Peru, ug Ecuador niadtong Hunyo, si Elder Ronald A. Rasband sa Korum sa Napulog Duha ka mga Apostoles miusab sa iyang iskedyul aron sa pagbisita niadtong nagpaalim pa sa usa ka dakong linog. Mipakigbahin siya og usa ka mensahe sa gugma gikan ni Presidente Thomas S. Monson ug mipasalig sa nahadlok sa linog nga mga miyembro nga sila wala makalimti.

Didto sa Guatemala niadtong Agosto, si Elder Quentin L. Cook mitimaan sa kanunay nga pag-uswag sa family history research ug buhat sa templo ug miingon nga kini usa ka timailhan sa hugot nga pagtuo sa mga miyembro.

Sa dihang ang hari ug reyna sa Tonga giabi-abi sa Church’s Polynesian Cultural Center sa Hawaii, USA, niadtong Hunyo, si Elder Dale G. Renlund sa Korum sa Napulog Duha ka mga Apostoles mihatag og pasiuna nga pakigpulong kabahin sa kaimportante sa mga relasyon sa pamilya.

Didto sa Louisiana, USA, si Presidente Russell M. Nelson, Presidente sa Korum sa Napulog Duha ka mga Apostoles, ug si Elder M. Russell Ballard mibisita sa mga biktima sa baha samtang ang Mormon Helping Hands miboluntaryo sa paglimpyo sa naguba nga mga panimalay niadtong Agosto ug Septyembre. Si Elder Ballard mitimaan sa kapin sa 11,000 ka mga boluntaryo miabut gikan sa 13 ka mga estado.

Ug niadtong Septyembre, atol sa usa ka tibuok kalibutan nga debosyonal alang sa mga young adult nga nagagikan sa Washington, D.C., USA, si Elder Cook miingon, “Dili kita angayng mahadlok bisan sa usa ka makuyaw ug gubot nga kalibutan.” Gitambagan niya ang mga young adult sa paghimo og matarung nga mga tumong ug pagplano sa pagkab-ot niini ug sa dili ipakaubos ang ilang kaugalingong mga talento ug kapasidad. Giawhag usab niya sila sa pagtimbang-timbang sa ilang paggamit sa social media. “Daghan na kita og nadunggan kabahin sa pagpakatinuod diha sa social media.,” miingon siya, apan “ang tinud-anay nga pagkasama kang Kristo mas importante pa nga tumong kay sa pagpakatinuod.”

Up-to-date nga impormasyon sa pangalagad niining mga lider sa Simbahan makita sa ilang tagsa-tagsa nga mga pahina ug sa Facebook ug sa prophets.lds.org.