ʻEletā Evan A. Schmutz

Fitungofulu Taki Māʻolunga

ʻOku fakamālō ʻa ʻEletā ʻAivani ʻAnitoni Simuti ia ʻi he ngaahi aʻusia kuo fakafou mai he fakahā kiate ia mei he ʻEikí. Kuo toe fakaloloto ange ʻEne ului ki he ongoongoleleí ʻo fakafou ʻi hono ako maʻu pē ʻo e folofolá, tokoni ʻi he puleʻangá pea mo e talangofua ki heʻene ngaahi tukupā ki he ʻOtuá.

Naʻe fāʻeleʻi ia ʻi he ʻaho 6 ʻo Sune 1954, ʻi St. George, Utah, USA, kia Richard mo Miriam Schmutz, pea naʻe ako kei siʻi ai ʻa ʻEletā Simuti ʻo fekauʻaki mo e mālohi ʻo e lotú. ʻI heʻene kei hoko ko ha Cub Scout naʻá ne fakatau ha ngaahi tikite feʻunga hono mahuʻingá mo e U.S. $17 ki ha fakataha fakafonua ʻa e sikautí, ka naʻe fiu kumi e paʻangá ia he taimi naʻe fie maʻu ke tānaki aí. Naʻe fakalotolahiʻi ia heʻene faʻeé ke ne lotu pea naʻe fakahā ange ʻe he ʻEikí e feituʻu ne tuku ai e sēnití. Ko ha fakapapauʻi mālohi ange ia e ʻofa mo e tokanga ʻa e ʻOtuá kiate iá.

ʻI he taʻu 18 ʻa ʻEletā Simutí, naʻe mālōlō ai hono tuofefine lahí ʻi ha fakatuʻutāmaki he meʻalele. Naʻe uesia lahi ai ʻene moʻuí pea hoko ai kiate ia ha ngaahi aʻusia fakalaumālie mahuʻinga.

Taimi siʻi pē mei ai, kuo ui ia ke ne ngāue fakafaifekau pea ke ne hū leva ki he akoʻangá. Naʻá ne lotua ha fakamoʻoni fakatāutaha ki he ongoongoleleí. Lolotonga haʻane siofi hono akoʻi ʻe ha kau faiako e ʻUluaki Mata-meʻa-hā-maí, ʻokú ne pehē, “Ne u maʻu ha fakamoʻoni mālohi fau pea ʻikai ke u kei faʻa nofo he lokí.”

Hili ʻene ngāue fakafaifekau ʻi he Misiona North Carolina Greensboro, naʻe fakapapauʻi ʻe ʻEletā Simuti te ne hokohoko atu pē h ono ako fakaʻaho e folofolá ʻi he toenga ʻene moʻuí. “Kuó u maʻu ha fiefia lahi, ako mo ha mahino fakatāutaha ʻo fakafou ʻi hono ako pongipongí ʻi ha taimi lōloa moʻoni.”

Naʻe mali ʻa ʻEletā Simuti mo Cindy Lee Sims ʻi he ʻaho 3 ʻo Fēpueli 1978, ʻi he Temipale Provo Utah. Naʻe maʻu ha mataʻitohi ʻo ʻEletā Simuti ʻi he lea faka-Pilitāniá pea mo hono mataʻitohi toketā he laó mei he ʻUnivēsiti Pilikihami ʻIongí. Naʻá ne ngāue fakapalofesinale ki ha ngaahi kautaha lao mei he 1984 ki he 2016.

Lolotonga e feinga ʻa ʻEletā Simuti ke feau e ngaahi fie maʻu ʻene fānau ʻe toko nimá, kuó ne ʻosi hoko ko ha aleaʻanga māʻolunga, pīsope, mēmipa ʻo e kau palesitenisī fakasiteikí, palesiteni ʻo e Misiona Philippines Cebu (2011–14), palesiteni fakakolo ʻi he senitā akoʻanga fakafaifekaú pea mo ha mēmipa ʻo e Kōlomu Nima ʻo e Kau Fitungofulú.