Nambawan Presidensi Meseig, FEBRUERI 2016
Kamap Gut long Taim Nogut
Ino long taim i go pinis meri bilong mi, Harriet, na mi bin stap long wanpela ples balus we mipela wok long luk luk i stap long ol kain kain tru ol balus wok long kam pundaun long dispela ples balus. Em i bin wanpela dei wantaim planti win, na strong bilong win wok long paitim sait bilong ol balus taim i wok long kam daun long ples balus, na wok long mekim ol balus long go i kam na sek sek nambaut taim ol i wok long kam klostu long ples balus.
Taim mipela i wok long lukluk long dispela pait bilong mama graun wantaim masin, tingting bilong mi i go bek long pailot skul bilong mi yet na ol strongpela skul mi bin lainim long dispela taim—we bihain taim mi bin tisim ol narapela pailot husat i bin kam insait long skul.
“Noken pait wantaim ol kontrol [bilong balus] long taim nogut, “mi bin save tokim ol. “Stap isi tasol; noken kirap nating nating. Putim ai bilong yu stret tasol long namel bilong rot we balus i bai kam daun. Sapos yu tanim long rot yu i bin laik kisim pastaim, yu i mas tingting gut na mekim kwiktaim niupela rot bai yu kisim. Trastim strong bilong balus bilong yu. Stap tasol wantaim dispela taim nogut, em bai pinis.”
Ol pailot husat i wok longpela taim pinis i save gut olsem ol i no nap kontrolim olgeta taim ol samting we i ken kamap raun long ol. Ol i no nap long tanim wanpela baten long stopim taim nogut. Ol i no nap long rausim nating ren na sno. Ol i no nap long stopim win na i no nap long senisim direksen bilong win.
Tasol ol i save tu olsem em i no stret long poretim taim nogut na strongpela win—na moa olsem long larim dispela long mekim ol poret. Wei long kamap gut tasol taim ol samting i no stap stret em long stap tasol long stretpela na isi isi rot na stap gut tasol.
Taim mi wok long lukluk i stap long ol balus wanwan i wok long mekim ol lastpela ron bilong ol i kam long ples balus na tingim bek long ol strongpela skul mi lanim long ol yia mi wok olsem pailot, mi wok long tingim sapos i nogat skul long dispela samting insait long ol laip bilong yumi long wanwan dei.
Planti taim yumi i no nap long kontrolim ol taim nogut laip i save troim ikam long rot we yumi save wokabaut. Sampela taim ol samting i no save i go long wei yumi laikim ol long go. Yumi ken pilim les na pilim olsem win i troim yumi i go i kam taim ol taim nogut bilong bel hevi, bilip bilong yumi i sot, poret i kam, sori taim i kam, na wari i kisim yumi.
Long ol dispela taim, em i isi long kamap kalabus insait long planti samting we i wok long kamap rong na trabel i ken stap namel long tingting bilong yumi. Temtasen bai mekim yumi putim tingting moa long ol traim yumi wok long kisim na lus tingting long Sevia na testimoni bilong trut.
Tasol dispela em i no gutpela wei long painim rot namel long ol traim taim insait long laip bilong yumi.
Olsem tasol wanpela pailot husati i wok pinis long planti yia i no putim tingting tumas long taim nogut tasol i save lukluk moa yet long namel bilong rot bilong we balus i bai kam daun na long poin we bai balus tasim graun, yumi tu imas putim tingting long namel bilong feit—bilong yumi, Sevia bilong yumi, gospel bilong Em, na plen bilong Papa bilong yumi long Heven—na long bikpela gol—bilong yumi long go bek long heven we em ples yumi laik igo. Yumi mas trastim God na wantaim strong bilong yumi mekim olsem yumi mas stap long rot na putim tingting olsem ol disaipel bilong em. Yumi mas putim ai, lewa na putim tingting bilong yumi stret long stap long we yumi save olsem yumi mas stap.
Soim feit na tras long Papa bilong yumi long Heven na hamamas tasol long bihainim ol komanmen bilong Em we i bai bringim hamamas na glori. Na sapos yumi stap on dispela rot, yumi bai i go gut tasol long taim nogut—maski strong bilong em i luk—bikpela na olsem bai yumi kamap gut tasol long ples bilong yumi long heven.
No meta ol skai raun long yumi i klia o i pulap long kilaut bilong taim nogut, olsem ol disaipel bilong Jisas Krais, yumi i mas lukluk long painim pastaim kingdom bilong God na gutpela pasin bilong Em, olgeta taim save olsem taim yumi wokim dispela, olgeta narapela samting we yumi nidim bai i kam long yumi (lukim Mathew 6:33).
Dispela em i nambawan skul bilong laip!
Taim yumi tingting tumas long ol hevi bilong yumi, ol kros nambaut bilong yumi, ol wari bilong yumi, na ol taim we yumi poret, ol dispela samting bai kamap bikpela hevi moa yet. Tasol taim yumi putim tingting bilong yumi i go long ples bilong yumi long heven we bai yumi go na long ol hamamas taim yumi bihainim rot olsem ol disaipel bilong em—givim bikpela lav bilong yumi long God, givim sevis long ol lain i stap klostu long yumi—bai yumi lukim olsem yumi bai go gut tasol na abrusim ol taim bilong trabel na taim nogut.
Ol poroman, no meta ol strong bilong win long laip bilong yumi long dispela graun i raunim raunim yumi, gospel bilong Jisas Krais bai olgeta taim givim nambawan rot i go long gutpela kamap long kingdom bilong Papa bilong yumi long Heven.
2016 ikam long Intellectual Reserve, Inc. Olgeta toktok hia i bilong sios tasol. Printim long USA. Tok orait long Inglis: 6/15. Tok orait long tanim tokples: 6/15. Tanim tok bilong First Presidency Message, February 2016. Tok Pisin. 12862 878
Tising long Dispela Toktok
Presiden Uchtdorf i kaunselim yumi long “trastim God na wantaim strong bilong yumi mekim olsem yumi mas stap long rot na putim tingting olsem ol disaipel bilong em.” Tingting long askim ol dispela lain we yu wok long tisim ol hao na ol wok long putim tingting “long ples bilong yumi long heven we bai yumi go na long ol hamamas taim yumi bihainim rot olsem ol disaipel bilong em” long ol taim we ol i save painim traim. Yu ken invatim ol long tingting long ol wei we ol i ken putim tingting long testimoni bilong ol na long Krais long ol dispela taim bilong traim na wantaim preya tingting long putim sampela bilong ol dispela aidia insait long laip bilong ol.