Te Rongorongo man te Moan Beretitentii, Beberuare 2016
Karoroan te Wanikiba ma te Kamanoaki Rinanon Angibuaka aika Korakora
N te tai ae aki maan n nako Ngai, ma kainnabau, Harriet, ti mena n te marae ni wanikiba n matakuakinii taian wanikiba aika kamiimi n tikurikaaki iaon te aba. E angang te bong anne, ao te ubwannang ae korakora e karematoa ni ueebana te wanikiba, are e a karika waekoan rairakin temanna ma temanna ao ni maaku n tain te roko aio.
Ngke ti tabe n taraa te kaangangaa aei imarenan ana kario bwai te aba ao te mitiin, e oki au iango nakon moan au kataneiai ni kiba ao taian reirei ake I reiakin ikekei—ao are i aki toki n reireiniia bwairati ake tabeman aron te kataneiai aio.
“Tai korakai ni kairoroa te wanikiba bwa e na karaoa are ko tangiria n tain te angibuaka,” I taneiai n tutuangiia aio. “Taotaona angina; tai rang riao. Kateimatoai matami n raini n nuukan te kawai. Ngkana ko tua nako man kawaim n ruo, karaoia ni kaetia ma te karaurau. Onimakina ana konabwai am wanikiba. Teimatoa kiiba ni karokoa e toki te ang.”
Bwairati ake a mwaatai a atatai raoi bwa a aki kona n taobarai bwaai ake a riki irarikiia n taainako. A aki kona ni katoka te angibuaka. A aki kona ni kamaunanakoa te karau ke te tinoo. A aki kona ni katoka kareng te ang ke ni bita kawaina.
Ma a ota bwa bon te kairua ae e na maakaki te angibuaka ke te ang ae korakora—ao ai moarara riki n akean te kantaninga n te bwai ae ti kona ni karaoia iai. Te kawai n tikurikaaki ma te kamanoaki ngkana e a karako bwaai aika a riki nakon te kantaninga bon te tiku ni kawain te kiba ae eti.
Ngke I tabe ni matakuakina tewana imwiin tewana te wanikiba ni karaoa tokin kawaina ao n uring taian reirei ake I reakin man au ririki ni bwairati, I miimi ngkana akea te reirei n aei ibukin maiura ni katoa bong.
Ti aki kona n taobaraa te buaka are ti rinanona inanon maiura. N tabetai bwaai a aki riki n aron are ti tangiri. Ti na bae n tabeaianga ni kaangaangan te nanokawaki, te nanououa, te maaku, te rawawata, ke te raraoma.
N taai akanne, e bebete te rekenako ni bwaai aika bure ao ni karaoi ara kaangaanga bwa nuukan ara iango. Te kariiri bon katuruan ara taratara iaon kakatai ake ti kaitarai ma tiaki iaon te Tia Kamaiu ao ara kakoaua ibukin te koaua.
Ma tiaki anne te kawai ae tamaroa n rinanon ara kaangaanga inanon maiura.
N aron te bwairati ae mwaatai e kateimatoa ni katurua ana taratara tiaki iaon te buaka ma iaon rainin nuukan te kawai ao te tabo ae eti are e na kona n tikurikaak iai, ngaia are ti riai ni katurui ara taratara n nuukan ara onimaki—ara Tia Kamaiu, Ana euangkerio, ao ana babaire Tamara are i Karawa—ao ni kabanean ara kouru—n oki ma te kamanoaki n tokin kawaira i karawa. Ti riai n onimakina te Atua ao ni kateimatoai ara kekeiaki ni bwaai ake a riai ni karaoi ana reirei. Ti riai ni kateimatoai matara, nanora, ao ni katarui ara iango ni mauakinan te kawai are ti ataia bwa ti riai ni karaoia.
Ni kaota ara onimaki ao onimakinan te Tama are i Karawa ni kimwareireira ni kawakin Ana tua e na uota nakoira te kukurei ao te mimitong. Ao ngkana ti tiku iaon te kawai, ti na kona n rinanon angibuaka nako—e aki kakawaki bwa korakorara are e na kaoti—ao n oki ma te kamanoaki nakon mweengara i karawa.
Ngkana e itiaki te nang are e katobibira ke ni kaonaki ma te nang ae kakamaaku, n aroia ana reirei Iesu Kristo, ti ukoukora moa uean te Atua ao raoiroina, n ataia bwa ngkana ti karaoia, bwaai ake ti kainnanoi a na katauraoaki n te kabane (taraa Mataio 6:33).
Bon te reirei ae kakawaki n te maiu aio!
Ngkana ti kamwaitia riki ni katurua ara taratara iaon ara kaangaanga, korakaira, ara nanououa, ao maakura, a na mwaiti riki ni kaoti bwaai aika kaangaanga. Ma ngkana ti kamwaitia riki ni katurua ara taratara n tokin kawaira i karawa ao ni karaoi bwaai ake e riai ni karaoi ana reirei —tangiran te Atua, ni beku ibukiia kaain rarikira—taraan ae ti na kona n tokanikai ni borau rinanon taai ni kaangaanga ao angibuaka.
Nakoia raoraou, e aki kakawaki bwa matoatoara aekakin maiura ma angibuaka aika a na roko iaora, ma ana euangkerio Iesu Kristo e a tia ni katauraoa te kawai ae tamaroa n tainako ni kakoroi nanon ara kouru n abanuean Tamara are i Karawa.
© 2016 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te First Presidency Message, February 2016. Kiribati. 12862 859
Reirei man te Rongorongo Aei
E reireiniira Beretitenti Uchtdorf bwa ti na “onimakina te Atua ao ni katurui ara kekeiaki ni bwaai ake a riai ni karaoi ana reirei. Iangoia n titirakiniia naake ko reireiniia bwa a kanga n teimatoa ni katurui aia taratara “n tokin kawaira i karawa ao iaon kukureira n iriira kawain ana reirei” inanon taai ngke a kaitara ma taian kakatai. Ko bae ni kaoiia bwa a na iangoi kawai ake a kona ni katurui aia iango iaon aia kakoaua ao iaon Kristo n taai ni kaangaanga ao n tataromwaaka bwa a na kanga ni karina teuana te iango te a mwaiti riki inanon maiuia.