Elder Ronald A. Rasband

Korum sa Napulog Duha ka mga Apostoles

Human si Elder Ronald A. Rasband nakadawat sa iyang tawag ngadto sa Korum sa Napulog Duha ka mga Apostoles, mibasa siya sa Juan 15:16: “Kamo wala magpili kanako, hinonoa ako mao ang nagpili kaninyo, ug nagtudlo kaninyo.”

Si Elder Rasband miingon, “Duna koy espirituhanong impresyon nga walay butang kalabut niini nga [tawag] nga … akong tinguha. Desisyon kadto sa Ginoo.”

Sa edad nga 19 si Elder Rasband nakakat-on na og susama nga leksyon kalabut sa pagtugyan ngadto sa mga paghukom sa Ginoo. Naglaum siya nga moserbisyo og misyon didto sa Germany, sama sa iyang amahan ug sa magulang nga igsoong lalaki, apan gitawag hinoon ngadto sa Eastern States Mission (USA). Mipakli siya sa iyang kasulatan ug gibasa ang ika-100 nga seksyon sa Doktrina ug mga Pakigsaad:

“Busa, sunod kanako, ug paminaw sa mga tambag nga Ako mihatag nganha kaninyo.

“… Usa ka masangputon nga pultahan pagabuksan diha sa naglibut nga mga rehiyon niining silangan nga bahin sa yuta. …

“Busa, sa pagkatinuod Ako moingon nganha kaninyo, ipataas ang inyong mga tingog ngadto niini nga mga katawhan” (mga bersikulo 2, 3, 5).

Siya adunay usa ka pagsaksi nga ang Ginoo gusto nga siya moserbisyo sa Eastern States Mission.

Si Elder Rasband, nga natawo niadtong Pebrero 6, 1951, naggikan sa ubos nga kahimtang. “Natawo ko gikan sa usa ka drayber sa trak [sa pan] ug sa usa ka minahal [naa ra sa balay] nga inahan,” miingon siya. Gikan siya sa usa ka pamilya sa mga Santos sa Ulahing mga Adlaw nga miyembro na sulod sa daghang henerasyon, usa ka panulundon nga iyang gibahandi.

Niadtong 1973 si Elder Rasband naminyo ni Melanie Twitchell. Sila dunay 5 ka mga anak ug 24 ka mga apo. Si Elder Rasband mipasidungog sa iyang asawa sulod sa 42 ka tuig sa pagtabang kaniya nga mahimong kinsa siya karon. “Ang akong asawa miatiman nako sama sa mamumuhat og kolon ug mihulma nako ngadto sa usa ka butang nga importante kaayo. … Ang iyang espirituhanong impluwensya mao ang nakaingon dili lamang niining maanindot ug espesyal nga tawag apan sa tanan usab nakong nahimo sa espirituhanong paagi.”

Niadtong 1987 si Elder Rasband nahimong presidente ug chief operating officer sa usa ka tibuok kalibutan nga chemical corporation. Iyang nakat-unan gikan sa iyang mga lider kon unsaon nga mahimong mas epektibo sa pagserbisyo sa Simbahan. “Akong nakat-unan sa akong propesyon … nga ang mga tawo mao ang mas importante kay sa bisan unsang butang nga atong buhaton.” Siya usab “nakakat-on og daghan kaayong mga kahanas sa pagpangulo … nga nakatabang kanako isip usa ka General Authority.”

Si Elder Rasband adunay daghang oportunidad sa paggamit niadto nga mga kahanas. Nakaserbisyo siya isip bishop; presidente sa misyon; General Authority Seventy sukad niadtong Abril 2000; supervisor sa North America West, Northwest, ug tulo ka mga Area sa Utah; magtatambag sa Europe Central Area Presidency; Executive Director sa Temple Department; sakop sa Kapangulohan sa Seventy sukad 2005; ug Senior President sa Seventy sukad niadtong Abril 2009.

Ang iyang mga buluhaton sa Simbahan nakahatag kaniya og gugma alang sa mga Santos sa Ulahing mga Adlaw bisan asa. Gisultihan niya ang mga miyembro, “Ang inyong pagtuo nakapalambo sa among pagtuo; ang inyong pagpamatuod nakadugang sa among pagpamatuod” (pahina 90).

Si Elder Rasband mibati og kamapaubsanon sa pagserbisyo isip Apostol ni Ginoong Jesukristo. “Kanunay kong dunay tinguha nga moserbisyo Kaniya,” miingon siya. “Akong ipahinungod ang akong panahon, ang akong mga talento, ug tanan nga anaa kanako karon sa tibuok nakong kinabuhi. Ako mipasalig sa pagbuhat niini. Akong dungog nga mobuhat niini.”