Ko Ha Telefoni Taimi Tonu
ʻOku nofo ʻa e tokotaha naʻá ne faʻú ʻi Taichung, Taiuani.
ʻI heʻeku tupu haké, naʻe ʻikai ke u tui ʻoku ʻi ai ha ʻOtua. Naʻe felekeu ʻeku moʻuí, pea ʻi hoku ngaahi ʻaho faingataʻa tahá ne feʻunga ʻeku lotomamahí ke u loto ai ke toʻo ʻeku moʻuí. Ko e taimi ia ne tukituki ai e kau faifekaú ʻi hoku matapaá. Ko e ongoongoleleí ʻa e meʻa tofu pē ne u fie maʻú; ne u pīkitai ki ai ʻo hangē ha makinitó.
Naʻe ʻikai ngata hoku ngaahi ʻahiʻahí ʻi he taimi naʻá ku kau ai ki he Siasí, ka ne u ʻi ha tuʻunga lelei ange ke matuʻuaki ʻa e ivi tākiekina ʻo e filí. Ko e fuofua taimi ia, ne u ʻilo ai pe ʻoku ongo fēfē ʻa e fiefiá.
Ka neongo ia, ne ʻikai faingofua ange ai e lotomamahí. ʻI ha taimi ʻe taha ne u toe loto foʻi ai. ʻI he momeniti ko iá ne tā mai ai ʻa Sisitā Tangi, ko e uaifi ʻo e pīsopé. Naʻá ne talamai kiate au naʻá ne maʻu ha ongo ʻoku fie maʻu ke ne tā mai. Naʻá ne ʻeke mai pe ʻoku ou fēfē. Ne u vahevahe ʻa e meʻa kotoa kiate ia. Kiate au, ko ha ʻāngelo ia kuo ʻomi ʻe he ʻOtuá.
Naʻe fakaivia au ʻe he meʻa naʻe hokó. Naʻe fakamālohia ʻeku tuí. Ne u ongoʻi hangē te u lava ʻo ikunaʻi ʻa e maté. Ne u ongoʻi kuo fakahaofi au, ʻo hangē ko ia ʻoku hā ʻi he ʻAlamā 36:2–3:
“Naʻa nau nofo pōpula, pea naʻe ʻikai ha taha ʻe lava ʻo fakahaofi ʻa kinautolu ka … ko e ʻOtuá. …
ʻIlonga ʻa kinautolu ʻe falala ki he ʻOtuá ʻe tokoniʻi ʻa kinautolu ʻi honau ngaahi ʻahiʻahiʻí mo honau ngaahi tuʻutāmakí, mo honau ngaahi mamahí, pea ʻe hiki hake ʻi he ʻaho fakaʻosí.”
ʻOku kei ʻi ai pe hoku ngaahi ʻahiʻahi, ka he ʻikai toe liua ngofua au. Ne poupouʻi au ʻe he ʻOtuá ʻi he kotoa hoku ngaahi ʻahiʻahí mo e hohaʻá. Kuó Ne fakahaofi au mei he pilīsone fakalaumālié mo e pōpulá, pea naʻa mo e maté. Ko Ia hoku Fakamoʻuí.