iTovo Vakalou i Jisu Karisito—Vakasinaiti ena Yalololoma kei na Loloma

Vulica ena masumasu na itukutuku oqo ka vakasaqara mo kila na ka mo na wasea. Ena rawa vakacava ki na nomu kila vinaka na itovo vakalou ni iVakabula me vakalevutaka cake nomu vakabauti Koya ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

iVakatakilakila

Visiting teachers with an elderly woman.

Na Nodra Veivakauqeti na Marama Yalododonu, mai vei Julie Rogers

Na iDusidusi ki na iVolanikalou e vakadewataka na yalololoma me “mataqali loloma sa cecere sara, dokai, ka kaukauwa duadua” (“Yalololoma”). Sai koya na loloma savasava i Jisu Karisito. Ni da vulici Jisu Karisito ka saga meda vakataki Koya, ena tekivu meda vakila na Nona loloma savasava ki na noda bula ka da vakauqeti meda loloma ka qaravi ira na tamata me vakataki Koya. “Na loloma uasivi sa ikoya na noda vosota e dua e vakararawataki keda,” e kaya o Peresitedi Thomas S. Monson. “Sa ikoya na noda sega ni vakatara me da cudru vakarawarawa. Sa ikoya na noda ciqoma na malumalumu kei na guce. Sa ikoya na noda ciqomi ira na tamata ena kedra ituvaki dina. Sa ikoya na noda raibaleta na ituvaki vakayago ki na itovo ni bula ka na sega ni katabuto mai ni toso o gauna. Sa ikoya na noda vorata na yalo ni veivakaduiduitaki.”¹

Ena iVola i Momani, eda vulica na dina cecere o ya meda “masuta na Tamada e na [yaloda] taucoko, me vakasinaitini [keda] e na loloma oqo; io na loloma sa solia vei ira era sa muria na Luvena ko Jisu Karisito ena yalodina, [meda] yaco kina [meda] luvena tagane [kei na yalewa] na Kalou; ia ni sa rairai mai ko Koya, eda na tautauvata kaya, ni da na raica na matana dina; ia meda rawata na inuinui oqo ka vakasavasavataki me vaka sa savasava ko Koya” (Moronai 7:48).

iKuri ni iVolanikalou

Joni 13:34–35; 1 Korinica 13:1–13; 1 Nifai 11:21–23; Ica 12:33–34

Mai na Keda iTukutuku Makawa

“A vakavinavinaka e dua na marama ka se qai mate wale na watina ena vukudra na dausiko vuvale ka ra a tagi vata kei koya ka vakacegui koya. A vola kina vaqo: ‘Au a gadreva vakalevu sara e dua meu rawa ni dolele yani kina; e dua ka rawa ni rogoci au. … E rau a rogoci au. E rau vakacegui au. E rau tagi vata kei au. Ka rau mokoti au … [ka] vukei au mai na yaluma titobu kei na rarawa ena vica na vula taumada ni galili.’

“E dua tale na marama e umana vata na nona vakanananu ena nona ciqoma na loloma cecere dina mai vua e dua na dausiko vuvale: ‘Au kila niu sega walega ni dua na iwiliwili vakaivola me sikova e dua na dausiko vuvale. Au kila ni kauwaitaki au.’”²

Me vakataki ira na marama oqo, e vuqa na Yalododonu Edaidai e vuravura raraba era rawa ni ra vakadinadinataka na dina ni itukutuku oqo nei Peresitedi Boyd K. Packer (1924–2015), na Peresitedi ni Kuoramu ni iApositolo Le Tinikarua: “Sa dua dina na vakacegu levu me da kila ni veitalia ga na vanua [e gole kina e dua na matavuvale], sa waraki iratou tu mai e dua na matavuvale ena Lotu. Mai na siga ga e ratou yaco yani kina, ena okati o koya ki na dua na kuoramu ni matabete ka okati na marama ki na iSoqosoqo ni Veivukei.”³