Ko ʻEku Palani Hao ʻAki e Mūsiká
Alixa B., Netaleni
Ngaahi tā fakatātā ʻa Ben Simonsen
Naʻá ku tangutu ʻi muʻa ʻi ha taʻahine naʻá ne fai maʻu pē ha ngaahi lea mo ha ngaahi tūkuhua taʻe-taau naʻá ne fakatupu ke u ongoʻi taʻe fiemālie, he lolotonga ʻeku heka ʻi he pasí ʻi ha fononga ʻaʻahi fakaako. Naʻe talaange heʻeku kau faiakó mo ha fānau ako kehe ke tuku, ka naʻe kei hoko atu pē. Naʻe ʻikai ke u ʻilo ʻa e meʻa ke faí, peá u pehē leva ke toʻo hake ʻeku MP3 ʻo fanongo ki ha niʻihi ʻo ʻeku ngaahi fasi manakó.
Naʻá ku fakamoʻui ia ke lele hokohoko pea ko e taha ʻo e ngaahi ʻuluaki foʻi hiva naʻe ongo maí ko ha foʻi hiva mei he youth.lds.org/music. Naʻe ʻai ke u hiki fakalaka ka naʻe talamai ʻe ha meʻa ʻi hoku lotó ʻoku totonu ke u fanongo pē ki he fasí. Naʻá ku fanongo pē ki he ngaahi fasi fakalaumālié ʻi he miniti ʻe 20 hono hokó. Naʻe poupouʻi au ʻe he fakaleá ke u kātaki, pea naʻa nau fakamanatu mai ko ha ʻofefine ʻofeina au ʻo e Tamai Hēvaní.
Naʻe fakahoko ʻe hoku ʻapiakó he konga kimui ʻo e uiké ha hulohula. Neongo naʻa nau fakaʻaongaʻi ha ngaahi fasi hulohula lelei, ka naʻe kamata ke kaikaila ʻaki ʻe he tokolahi ʻi heʻeku kalasí ʻa e foʻi lea naʻe toʻo mei ha foʻi hiva pau ʻe taha.
Naʻá ku toe ongoʻi taʻe fiemālie pē. Naʻe tangutu ofi mai pē kau faiakó pea naʻe hangē naʻe ʻikai ke nau fakatokangaʻí. Naʻá ku sio ki hoku fasiʻanimá. ʻO u fakatokangaʻi hoku vesa mei he konifelenisi ʻa e toʻu tupú ʻoku pehē ai, “Mou tuʻu ʻi he ngaahi potu toputapú, pea ʻoua ʻe hiki mei ai (T&F 87:8).”
Naʻá ku ʻilo ko e feituʻu naʻá ku ʻi aí, naʻe ʻikai ko ha potu toputapu, ko ia naʻá ku mavahe kae ʻoua kuo tā mai ha foʻi fasi foʻou.
ʻOku ou ʻilo ʻe lava ke ʻi ai ha ivi takiekina lahi ʻo e mūsiká ʻi heʻetau moʻuí. ʻOku ou ʻiloʻi ko ʻeku fanongo ko ia ki he fasi fakalaumālié ʻi heʻeku MP3 he ngaahi ʻaho kimuʻá naʻe tokoni ʻo ne ʻomi kiate au ʻa e loto-toʻa naʻá ku fie maʻú ke u mavahe mei he hulohulá. Naʻe tokoni ʻa e ngaahi meʻa ko ʻení ke u toe ofi ange ki heʻeku Tamai Hēvaní.