សារលិខិតបង្រៀនសួរសុខទុក្ខ ខែ កុម្ភៈ ឆ្នាំ 2015

លក្ខណៈរបស់ ព្រះយេស៊ូវគ្រីស្ទ ៖ ពុំមានអំពើបាប

សូមសិក្សាឯកសារនេះដោយការអធិស្ឋាន ហើយព្យាយាមយល់ដឹងនូវអ្វីដែលត្រូវចែកចាយ ។ តើការយល់ដឹងពីខ្សែជីវិត និង បេសកកម្មរបស់ព្រះអង្គសង្គ្រោះ នឹងពង្រឹងសេចក្ដីជំនឿរបស់អ្នកលើទ្រង់ ហើយប្រទានពរដល់អ្នកទាំងឡាយដែលអ្នកមើលថែ តាមរយៈការបង្រៀនសួរសុខទុក្ខបានដោយរបៀបណា ? ចំពោះព័ត៌មានបន្ថែម សូមចូលទៅ reliefsociety.lds.org ។

រូបភាព

ត្រាសមាគមសង្គ្រោះ

សេចក្ដីជំនឿ ក្រុមគ្រួសារ ការសង្គ្រោះ

ព្រះអង្គសង្គ្រោះរបស់យើងដែលជាព្រះយេស៊ូវគ្រីស្ទ គឺជាអង្គតែមួយគត់ដែលអាចធ្វើដង្វាយធួនសម្រាប់មនុស្សលោកបាន ។ ប្រធាន ឌៀថើរ អេស្វ អុជដូហ្វ ទីប្រឹក្សាទីពីរក្នុងគណៈប្រធានទីមួយបានមានប្រសាសន៍ថា « ព្រះយេស៊ូវគ្រីស្ទ គឺជាកូនចៀមដែលគ្មានទោស ព្រមដាក់ព្រះកាយទ្រង់នៅលើអាសនាយញ្ញបូជា ហើយបង់ថ្លៃជំនួសអំពើបាបរបស់យើង » ។¹ ការយល់ដឹងថាព្រះយេស៊ូវគ្រីស្ទគ្មានអំពើបាប អាចជួយយើងឲ្យបង្កើនសេចក្ដីជំនឿលើទ្រង់ ហើយព្យាយាមរក្សាព្រះបញ្ញត្តិទាំងឡាយរបស់ទ្រង់ ប្រែចិត្ត ហើយក្លាយជាជនបរិសុទ្ធ ។

អែលឌើ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ថា « ព្រះយេស៊ូវ…នៅក្រោមអំណាចសាច់ឈាម និង ព្រះវិញ្ញាណ តែទ្រង់ពុំចុះចាញ់ការល្បួងឡើយ ( សូមមើល ម៉ូសាយ 15:5) « យើងអាចបែរទៅរកទ្រង់… ព្រោះទ្រង់យល់ការណ៍ទាំងនោះ ។ ទ្រង់យល់ពីឧបសគ្គ ហើយទ្រង់ក៏យល់ពីរបៀបយកឈ្នះលើឧបសគ្គនោះដែរ ។ …

«…ព្រះចេស្តានៃដង្វាយធួនទ្រង់អាចលុបបំបាត់ចោលអំណាចនៃអំពើបាបដែលមានមកលើយើង ។ នៅពេលយើងប្រែចិត្ត នោះព្រះគុណដ៏ធួនរបស់ទ្រង់បង្គ្រប់ ហើយលាងសម្អាតយើង ( សូមមើល នីហ្វៃទី 3 27:16–20) ។ នៅពេលយើងពុំបណ្ដោយខ្លួនទៅតាមការល្បួង គឺដូចជាយើងពុំព្រមទៅស្លាប់ដូច្នេះដែរ ។

នៅពេលយើងខិតខំពីមួយថ្ងៃទៅមួយថ្ងៃ និងពីមួយសប្ដាហ៍ទៅមួយសប្ដាហ៍ដើម្បីដើរតាមមាគ៌ារបស់ព្រះគ្រីស្ទ លំដាប់នោះវិញ្ញាណរបស់យើងបង្ហាញឧត្តមភាពរបស់ខ្លួន ហើយចម្បាំងដ៏ឥតស្រាកស្រាន្ត និងការល្បួងទាំងឡាយនឹងលែងជាបញ្ហាទៀត » ។²

ខគម្ពីរបន្ថែម

ម៉ាថាយ 5:48 យ៉ូហាន 8:7 ហេព្រើរ 4:15 នីហ្វៃទី 2 2:5–6

ដកស្រង់ចេញពីព្រះគម្ពីរ

ព្រះអង្គសង្គ្រោះបានបង់ថ្លៃអំពើបាបរបស់យើងតាមរយៈភាពជាបុត្រានៃព្រះ ជីវិតដ៏គ្មានអំពើបាប ការរងឈឺចាប់ និងការបង្ហូរព្រះលោហិតទ្រង់នៅក្នុងសួនច្បារគែតសេម៉ានី ការសុគតនៅលើឈើឆ្កាង និងការមានព្រះជន្មរស់ឡើងវិញពីផ្នូរ ។ តាមរយៈដង្វាយធួនរបស់ព្រះយេស៊ូវគ្រីស្ទ យើងអាចបានស្អាតស្អំសាជាថ្មីនៅពេលយើងប្រែចិត្តពីអំពើបាប ។

ស្ដេច បេនយ៉ាមីន បានបង្រៀនប្រជារាស្រ្តទ្រង់ពីដង្វាយធួនរបស់ព្រះយេស៊ូវគ្រីស្ទ ហើយបានសួរថាតើពួកគេជឿបន្ទូលទ្រង់ដែរឬទេ ។ « ពួកគេទាំងអស់គ្នាបានស្រែកឡើងព្រមគ្នាថា ៖ …ព្រះវិញ្ញាណ…បាននាំមកនូវការផ្លាស់ប្ដូរយ៉ាងធំដល់ពួកយើង ឬក៏នៅក្នុងចិត្តយើងខ្ញុំដែលធ្វើឲ្យយើងខ្ញុំពុំមានបំណងនឹងប្រព្រឹត្តអំពើទុច្ចរិតទៀតឡើយ ប៉ុន្តែចង់ប្រព្រឹត្តអំពើល្អជានិច្ចវិញ ។ …

« ហើយយើងខ្ញុំយល់ព្រមចូលទៅក្នុងសេចក្ដីសញ្ញាជាមួយនឹងព្រះរបស់ពួកយើង ដើម្បីធ្វើតាមព្រះហឫទ័យរបស់ទ្រង់ ហើយគោរពតាមព្រះបញ្ញត្តិទាំងឡាយរបស់ទ្រង់ចំពោះអ្វីៗទាំងអស់ » (ម៉ូសាយ 5:1–2, 5) ។

យើងក៏អាចមាន « ការផ្លាស់ប្ដូរដ៏ធំ » ដូចជាប្រជារាស្ត្ររបស់ស្ដេច បេនយ៉ាមីន ដែល « ពុំមានបំណងនឹងប្រព្រឹត្តអំពើទុច្ចរិតទៀតឡើយ ប៉ុន្តែចង់ប្រព្រឹត្តអំពើល្អជានិច្ចវិញ » (ម៉ូសាយ 5:2) ។

© ឆ្នាំ 2015 ដោយ Intellectual Reserve, Inc ។ រក្សាសិទ្ធិគ្រប់យ៉ាង ។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 6/14 ។ អនុមតិឲ្យបកប្រែ ៖ 6/14 ។ ការបកប្រែនៃ Visiting Teaching Message, February 2015. Cambodian ។ 12582 258

សូមពិចារណាចំណុចនេះ

តើការមានភាពបរិសុទ្ធខុសពីការមានភាពល្អគ្រប់លក្ខណ៍ដូចម្ដេចដែរ ?