Aisea E Taua ai Iesu Keriso i Lo’u Olaga?

Saunia e Michael R. Morris

Mekasini a le Ekalesia

Pe a tatou malamalama i mea uma e faia e le Faaola mo i tatou, e avea o Ia ma tagata aupito sili ona taua i o tatou olaga.

Ata

Photograph of actor portraying Jesus Christ in the Bible Videos.

Talu ai nei sa ou faitau ai i se tusiga i luga o le initoneti lea sa talanoa mai ai le tagata na tusia e uiga i le auala o loo faia ai e le Faaola se matafaioi taua i lona olaga i aso taitasi. Sa ou fiafia i lona manao e faasoa mai o ona lagona, ae sa ou faanoanoa i le tali atu a se tasi o tagata faitau: “E leai lava ma se taua o Ia i se mea o lo’u olaga—e le’i i ai ma o le a le i ai lava.”

O lena tagata faitau ua matuai sese lava. E i ai se taimi, o le a tatou manaomia uma ai le Faaola. Tatou te faia uma ni mea sese e le mafai ona tatou faaleleia, oo i le oti lea e le mafai ona tatou toe maua mai, ma feagai ma le tiga, sauaga, mala, avega, ma le le fiafia e le mafai ona tatou taulimaina na o i tatou.

O le tala fiafia e faapea e le tatau lava ona tatou taulimaina na o i tatou.

“I se taimi o le vaivai tatou te ono tagi atu ai, ‘E leai se tasi na te iloaina pe faapeī. E leai se tasi e malamalama i ai.’ Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi,” na saunoa ai Elder David A. Bednar o le Korama a Aposetolo e Toasefululua. “Ma ona o Lana taulaga e lē iu ma faavavau (tagai i le Alema 34:14), ua Ia malamalama lelei i ai ma mafai ona faaloaloa mai ia i tatou Lona aao o le alofa mutimutivale.”¹

E taua Iesu ia i tatou ona e auala mai i Lana Togiola, aoaoga, faamoemoega, filemu, ma faataitaiga, ua Ia fesoasoani mai ai ia i tatou e suia o tatou olaga, feagai ma o tatou tofotofoga, ma agai i luma ma le faatuatua a o tatou malaga e toe foi atu ia te Ia ma Lona Tama.

O Iesu Ua Mafai ai Ona Salamo

O se tasi o mafuaaga e taua tele ai Iesu ia i latou o e e taumafai faamaoni e mulimuli ia te Ia e faapea, o i tatou uma lava e le atoatoa ma manaomia le meaalofa o le salamo na ofoina mai e ala i le Togiola.

Pe a tatou tautevateva ma pauu, e manao Satani ina ia tatou mafaufau e le lava lo tatou lelei tatou te toe tutu a’e ai i luga ma toe foi i le ala sa’o. E manao foi o ia ia galo ia te i tatou o le talalelei o “le talalelei o le salamo” (MF&F 13:1; faaopoopo le faamamafa). Ae ua tatou iloa “e moni le alofa tunoa o Keriso, ua maua uma ai le faamagaloina ma le faamamaina o le tagata agasala ua salamo.”²

O loo avanoa mo i tatou taitoatasi le mana o le Togiola a Iesu Keriso, ae e tatau ona tatou filifili ina ia mafai ai ona aoga i o tatou olaga. Vaai faalemafaufau i le tuuina atu o se meaalofa faapitoa i se uo—o se mea o loo matuai manaomia lava e lau uo ma o se mea na e saunia e ala i le ositaulaga patino. Ona vaai faalemafaufau lea i le tali mai o lau uo, “Faafetai, ae ou te le manao moni i lau meaalofa.” O le a sou lagona?

A tatou le valaaulia Iesu e fesoasoani ia i tatou ina ia tatou mama e ala i le salamo, e pei lava ua tatou teenaina Lana meaalofa.

Ua Aoao Mai e Iesu le Upumoni

I se tasi taimi, ina ua mumusu se vaega o tagata e toe savavali faatasi ma Ia, sa fesili Iesu i Aposetolo e Toasefululua, “Pe tou te fia o ese foi?” Sa tali atu Peteru, “Le Alii e, a matou o ea ia te ai? o ia te oe upu o le ola e faavavau” (Ioane 6:67–68).

E mafai ona e maua le “afioga o le ola faavavau” a le Faaola i tusitusiga paia, i aoaoga a perofeta soifua, ma musumusuga a le Agaga Paia. Latou te ofoina atu se faavae mo le “fiafia i lenei olaga ma le ola e faavavau i le lalolagi a sau,”³ ma latou taitai saogalemu i tatou e toe foi atu i lo tatou Tama Faalelagi ma lo tatou Faaola.

O a nisi o upumoni maoae na aoao mai e le Faaola? Sa lisi mai e Peresitene Dieter F. Uchtdorf, Fesoasoani Lua i le Au peresitene Sili, [ni upumoni] se fa i se lauga o le konafesi aoao talu ai nei:

“Ua tuu mai e lo tatou Tama i Ana fanau le fuafuaga sili o le fiafia.”
“E auala mai i le Togiola …, e mafai ona tatou ola ai e faavavau faatasi ma e pele ia i tatou.”
“O le a tatou mauaina ni tino mamalu, atoatoa, ma ola pea, ua le toe mafatia i ma’i ma le le atoatoa.”
“O le a suitulagaina o tatou loimata o le faanoanoa i le anoanoai o le fiafia ma le olioli.”⁴

Ua Ofo Mai e Iesu le Faamoemoe

Pe a tatou feagai ma luitau ogaoga, o nisi taimi e faigata ai ona tatou faalagolago i le Alii. Ae o le faalagolago ia te Ia e aumaia ai ia i tatou le faamoemoe tatou te manaomia ina ia mafai ona feagai ma o tatou luitau.

O le mea lena na tupu i tagata o le auaiga o Gatrell, o loo nonofo i totonu o le uarota a Sister Jean A. Stevens. Na fai mai Sister Stevens, o le fesoasoani muamua o le au peresitene aoao a le Peraimeri, sa pipiimau le aiga i le talalelei ma a latou feagaiga o le malumalu ina ua maua Tuagane Gatrell i le kanesa. O le faia o lena mea na tuuina atu ai ia te i latou le faamoemoe i folafolaga a le Atua o le a latou toe faatasi pe a mavae lenei olaga.

I aso faigata a o lei maliu lana tane, na fai mai ai Uso Gatrell, “Sa ou iloaina sa leoleoina i matou e le Alii. Afai e te faalagolago i le Alii, e moni lava, e mafai ona e faatoilaloina soo se luitau o le olaga.”⁵

O le meaalofa o le Togiola e aumaia ai ia i tatou le faamoemoe o le ola faavavau—o se mea tatou te manaomia pe a tatou puapuagatia i tofotofoga po o le maliu o se tasi e pele.

“Na tuu mai e lo tatou Tama Faalelagi alofa ia i tatou le meaalofa o Lona Alo Pele, o Iesu Keriso, e fai ma o tatou Faaola,” na saunoa mai Peresitene Henry B. Eyring, Fesoasoani Muamua i le Au peresitene Sili. O lena meaalofa maoae ma le faamanuiaga o le Togiola a Iesu Keriso ua aumaia ai se tofi mo tagata uma: le folafolaga o le Toetu ma le mauaina o le ola e faavavau mo i latou uma e fananau.”⁶

Ua Ofo Mai e Iesu le Filemu

Ata

Afai na e feagai ma se faalavelave faalenatura, fai ma autu o ni faiga faitatalaga faalealofa, aafia i se luitau na suia ai le olaga, i ai se feeseeseaiga ma se uo, po o le tu atu foi mo le mea sa’o, e te iloa e te manaomia le filemu o le Alii. “E faatoilalo e le filemu o le Faaola,” Na saunoa ai Elder Neil L. Andersen o le Korama a Aposetolo e Toasefululua, “ia taaviliga o asiosio o le lalolagi.”⁷

I se konafesi aoao lata mai nei, na faasoa mai ai e Elder Andersen se tala e uiga [i se tamaitai o le] Lora sa tauemuina ma faifaiupu i ai tagata ona o le tu atu mo le faaipoipoga masani [o se alii ma se tamaitai]. Ua ia aoaoina, o le tauemuina o nisi taimi o le tau lea o le “faamaoni i le Atua ma aoaoga a Ana perofeta soifua.”⁸

Ae o le tu atu e le faapea o le tu na o oe. E mafai ona tatou liliu atu i taimi uma i le Alii o le Filemu pe a tatou lagonaina le tuuatoatasi po o le lofituina, faanoanoa po o le popole, fefe po o le le tāua. Tatou te faia lena mea e ala i le:

Tatalo i le Tama Faalelagi mo le Agaga e faatasi ma i tatou.
Faitau afioga a le Alii i tusitusiga paia ma e pei ona faaalia mai e perofeta soifua.
Auai atu i le malumalu.
Suesueina o le soifuaga o le Faaola i le lotu ma i le seminare.
Faaaogaina o Lana Togiola e ala i le salamo i a tatou agasala.
Faasoa atu a tatou molimau e uiga ia te ia.

A tatou lagonaina le filemu o le Faaola, e le tatau ona atuatuvale o tatou loto pe mata’u (tagai i le Ioane 14:26–27).

Na saunoa Peresitene Thomas S. Monson, “Ua na o le Matai lava Na te silafiaina le matuitui o o tatou tofotofoga, o tatou tiga, ma o tatou mafatiaga. E na o Ia lava tatou te maua ai le filemu e faavavau i taimi o faigata. Ua na o Ia lava e pa’i mai i o tatou agaga ua faamanualia i Lana fetalaiga faamafanafana.”⁹

Ua Faia e Iesu le Faataitaiga

Ata

I Lana galuega, e lē na ona faasino atu e Iesu o le ala i le fiafia—ae Na te taitaia foi le ala. E ala i Lana Togiola, Na te taitai atu ai i tatou i le alofa. E ala i Ana aoaoga, Na te taitaia atu ai i tatou i upumoni e faavavau. E ala i Lona soifuaga atoatoa, Na te taitaia ai i tatou i le ala o le usiusitai.

Na saunoa Elder Richard G. Scott o le Korama a Aposetolo e Toasefululua, “O le faataitaiga aupito sili lava na savalia le fogaeleele o lo tatou Faaola, o Iesu Keriso. Sa faatumulia Lana galuega faaletino i aoaoga, auaunaga, ma le alofa i isi.Na ia faaopoopo mai, “Ua valaaulia i tatou e le Faaola ia mulimuli i Lana faataitaiga atoatoa.”¹⁰

A tatou malamalama o le Faaola ua mafai ai le salamo ma le toetu, aoao mai upumoni taua, ofoina mai le faamoemoe ma le filemu, ma faia le faataitaiga atoatoa, e avea o Ia ma totonugalemu o o tatou olaga. Ma i le avea ai o Ia ma a tatou uo, ua tatou maua ai le lototele e lafoa’i ai le mata’u ae agai i luma ma le faatuatua.