Tutu Atu mo Mea Tatou te Talitonu I Ai
Ua tatou ola i se lalolagi lea o le toatele e vaai atu i mea leaga o se mea lelei ma le lelei o mea leaga, ma e tatau ona tatou tutu atu mo le lelei. O molimau nei mai le autalavou matutua o e sa tutu atu mo o latou talitonuga. Latou te lei finau pe tali atu ma le ita po o le agaleaga. Sa latou faaalia “uma ai le lototele ma le amio solia”1 ma, o se taunuuga, ua faamalolosia ai isi (tagai i le 3 Nifae 12:44–45).
Na Musu Lo’u Uso e Inu le Uaina
I Farani, o le tautua faamiliteli e faamalosia. Sa filifili lo’u uso laitiiti e 20 tausaga le matua, o Loïc, e alu i le aoga faaleoleo ina ia avea ma se lutena. I le faaiuga o ana aoaoga, sa i ai se sauniga o le faatautoina o tagata fou. Sa taitasi ma taulotoina se faaupuga faavaega au. Ona tatau lea ona inuina se ipu uaina o loo i ai se rosa—ia inuina uma mea e lua. O lenei tu masani na amataina e Napoléon Bonaparte, ma e leai se tagata talu mai lena taimi ua le mafai ona faataunuuina.
Sa ta’u atu e Loïc i le taitai o ona mataupu faavae faalelotu e le faataga ai o ia e inu se ava malosi. Sa i ai se filemu le mautonu na sosoo ai ma le talosaga a Loïc mo se tuusaunoaga. Sa tu i luga le taitai. Nai lo le faamalosia o Loïc e inu le uaina, sa ia faamalo ia te ia mo le tausiga o ana mataupu faavae e ui lava i le fosi atu, ma sa fai atu ua ia mitamita e faafeiloai lenei alii amio sao i lana vaega au. Sa latou suia le uaina, ma sa auai Loïc i le sauniga o le faatautoga.
Pierre Anthian, Farani
Sa Valaaulia A’u i se Pati Le Taupulea
Ina ua uma le kolisi sa ma faigaluega ma lo’u uso o Grace mo se kamupani faatasi ai ma le tele o isi tagata o le Au Paia o Aso e Gata Ai. O a matou pule e le ni tagata o le Ekalesia. Ina ua faamau lou uso, sa fuafua e la matou pule se pati faalilolilo mo le teine faaipoipo. Sa ou faamoemoe o le a ia faaaloalo i o matou tulaga faatonuina, ae nai lo lena, sa ia faatonuina ni meainu malolosi, o se alii siva, ma se vitio faamaasiasi tagata.
A o lei amataina le pati, sa ou lagonaina le musumusuga a le Agaga Paia i totonu ia te au o uunaia ai au e faamanatu atu i lou pule o matou tulaga faatonuina. Sa ou uuina la’u asoa o Tamaitai Talavou ma mafaufau i taumafaiga ma osigataulaga uma sa ou faia ao ou i ai i Tamaitai Talavou e faamaea ai lo’u alualu i luma o le tagata lava ia. Sa ou tatalo ina ia taialaina au ou te tu teisi maualuga atu i le taimi lenei. Sa ou tesi atu i lo’u pule o’u atugaluga, ma le manatu atonu o le a ia le fiafia. Ae ui i lea, o lo’u naunautaiga sili o le faafiafia i le Tama Faalelagi.
Ina ua amata le pati, e lei tautala mai lo’u pule ia te au e oo lava i se ataata mai ia te au. Ae peitai, sa ia taofia le alii siva ma le vitio.
O aso ia na sosoo ai ma le pati, e lei tautala mai lo’u pule pe ata mai ia te au e pei ona sa i ai ao lei faia le pati. Ae peitai, sa ou lagona le toafilemu aua sa ou iloa sa fiafia le Atua i le mea sa ou faia. Pe a ma se vaiaso mulimuli ane, sa toe foi ai le ma mafutaga ma lo’u pule i le tulaga masani. Ou te iloa na faamaluluina e le Atua lona loto ma fesoasoani ia te ia ia iloa sa ou ola i mea ou te talitonu ai.
Lemy Labitag, Vanu o Cagayan, Filipaina
Sa Ou Faalogo i Gagana Mataga ma Faatiga i le Vasega
Ina ua pe tusa ma le 18 ou tausaga, sa ou aveina se vasega suisui. I se tasi aso e toatolu ni teine e le mamao teisi atu lava ma au na amata ona faaaogaina se gagana mataga. Sa ou le iloa pe tatau ona ou le amanaiaina i latou ina ia aloese ai mai se vevesi pe e tatau ona ou tu atu mo o’u tulaga faatonuina ma fai atu ia te i latou e taofi. Mulimuli ane, sa ou fai atu ma le faaaloalo sa mafai ai, “Faamagalo mai au, ae faamolemole lava pe mafai ona vaaia la outou gagana?”
Sa pulatoa mai ia te au le teine aupito i lapoa o i latou ma fai mai, “Ia e pule lava matou i le mea matou te talanoa ai.”
Sa ou fai atu, “Ae pe tatau lava la ona e palauvale? E matuai faatiga lava ia te au.”
Sa ia fai mai, “Pau lava la le mea o le aua le faalogo mai.”
Sa amata ona ou ita ma fai atu, “E faigata le le faalogo atu pe afai e leotele tele lau talanoa.”
Sa ia fai mai, “Ia onosai ai.”
Sa ou le tali atu. Sa ou le fiafia i teine, ae sa sili atu ona ou le fiafia ia te au lava. Sa ou le talitonu sa ou faatagaina lo’u leo e oo atu i se tulaga tauaimisa. Sa palalauvale pea teineiti, ma ua matou taufai feita uma i le taimi nei.
Ina ua uma ona ou maua le to’a, sa ou vaai sa i ai se faaletonu a teine i le latou laau suisui. Sa ou iloaina le mea o tupu aua sa ou maua i lena foi faafitauli i se taimi muamua atu. O lea sa ou faasino ai ia i latou le auala e faaleleia ai. Sa ou vaaia le suiga i foliga o le teine aupito i lapoa. “Ei,” sa ia fai mai, “matou te faamalie atu.” Sa ou le talitonu i ai—o loo ia faatoese mai. “Ou te faamalie atu foi,” sa ou fai atu i ai. “Sa le tatau ona ou ita faapena.”
Sa ou toe foi i lau laau suisui ma ou te lei toe faalogo i se isi upu palauvale. Na aoaoina au e lena aafiaga o a tatou upu atonu e le suia ai uiga o isi, ae o le agalelei ma le auauna e masani ona mafai ai.
Katie Pike, Iuta, ISA
Sa Ou Puipuia le Auauna Atu i se Misiona
Sa ou auai i le Ekalesia ina ua 19 o’u tausaga, o le lona lua o ni atalii se toatolu ma o le pau lea o le tagata o le Au Paia o Aso e Gata Ai i lo’u aiga. I se taimi e lei leva ona papatiso, sa amata ona ou lagonaina le manao e auauna atu i se misiona. Ina ua mavae se tausaga, sa tau mai e le Agaga ia te au e tatau ona ou alu. Sa ou talanoa i lo’u tina, o le sa lagona e le sa’o lo’u alu. Sa ou tolopoina [lou alu] mo se isi tausaga, ae o le manao e auauna atu i se misiona e lei aluese lava ma au. I le aluga o lena tausaga, sa ou suesue i tusitusiga paia, sefe a’u tupe, saunia au pepa, faia suesuega faafomai uma, ma—ina ua maea mea uma—sa ou faatalitali i le Alii. E lei umi, ae ou maua se valaau e auauna atu i le Misiona a Pasila Campinas.
Na tetee pea ou matua. Sa ou anapogi ma tatalo ma le naunautai, ma ta’u atu i le Tama Faalelagi e uiga i ou popolega uma. Sa ou ole atu ia te Ia e pa’i atu i le loto o lo’u tama faalelalolagi. Sa Ia faia. O le mea na ou te’i ai, sa auai lo’u tama i le pati faamavae lea sa saunia e a’u uo mo au i le Aso Toonai a e ou te lei alu. Ma i lena Aso Gafua, sa aveina au e lo’u tama i le malaevaalele.
I le taimi o la’u misiona, sa ou lagonaina le alofa o le Atua a o ou talai atu le talalelei. E lei taofia lo’u tina mai le avea ai ma se tina, ma ina ua ou toe foi atu i le fale, o ia le tagata muamua sa opoina au.
Sa ou aoaoina o le auauna atu i se misiona e matua sili atu nai lo se tiute; o se avanoa ma se taimi ofoofogia o le tuputupu ae ma le aoaoina.
Cleison Ueligitone Amorim Brito, Paraíba, Pasila
Sa Ou Tuuina Atu Lau Molimau e uiga i le Atua
I le avea ai ma se tasi i le vasega amata o le iunivesite sili ona lelei i lo matou atunuu, sa ou lagonaina le uunaiga e faia le mea sili ou te mafaia. Na oo mai sauaga, ma sa amata ona ou fesiligia lo’u talitonuga i le talalelei aua o le toatele o a’u faiaoga polofesa sa faamalamalama mai mea latou te tautino mai o ni “mea moni.” O le toatele o tamaiti o la’u vasega sa aafia ai. O lenei siosiomaga sa faigata ai le tumau ai i tulaga faatauaina faa-Kerisiano. Sa ou mafaufau e togi le solo ae sa tonu lava e sili atu ona lelei le nofo pea. Sa ou manatu afai e na o ni nai tagata o e agavaa e ulu atu i lenei iunivesite, ma e aofia i lena toalaiti ni nai tagata o le Au Paia o Aso e Gata Ai, ona tatau lea ona ou nofo ma tu atu mo le upumoni.
O la’u polofesa o le paiolo, o se tagata e tautino lava ia e leai se atua, e faiaoga i le faasaienisi e aunoa ma soo se talitonuga i se Foafoa Silisiliese. Ae o le tele o lou faalogo i ai, o le tele foi lea o le faamalosia mai ia te au o loo i ai se Atua—o Le Silisiliese, lo tatou Tama—o le sa foafoaina nei mea uma. O isi sa finau e le talafeagai lenei manatu. Sa atili ona malosi la matou talanoaga. Sa ou fefe e sii lo’u lima ma faamalamalama atu ou te talitonu i le Atua o loo avea ma Foafoa.
Na oo mai le taimi e tuuina atu ai ni manatu faaalia. I la’u aoga, o se tulaga masani mo tagata le patipati, taufono, po o le boo o i latou o e tuuina atu o latou manatu. Sa ou tu atu ma le lototoa ma fai atu ma le manino i le itu tetee: “O le talitonu i le Atua atonu e le o i ai se uiga ia te outou i lenei taimi, ae o le a i ai se aso o le a manino ai ia te outou e pei ona manino ia te au i le taimi nei.”
Talu mai lena taimi, ou te lei mauaina lava soo se boo pe a ou tu atu mo o’u talitonuga. Mai lava i lena taimi, sa ou alualu i luma faaakatemia, faaagafesootai, ma le faaleagaga. Sa amata ona ou toe toaga mai i gaoioiga a tamaiti aoga, ma sa filifilia au i tofi eseese o le aoga.
Sa ou aoaoina o le tu atu mo le upumoni e tusa lava pe faatasi e matua aafia ai a tatou faaiuga i le lumanai.
Vince A. Molejan Jr., Mindanao, Filipaina