Sa Ou Lagonaina le Fanau
Joy Cromar, Kalefonia, ISA
O le atuatuvale faalemafaufau o se mea ou te le toe fia feagai ai. Ae ina ua mavae lou le toe oo i ai mo le 12 tausaga, sa ou toe maua ai.
Sa ou fefe ma popole. Sa ou fesiligia le Tama Faalelagi ma tatalo mo le malosi ina ia mafai ona ou manumalo i o’u tofotofoga. Sa ou aioi atu foi ia te Ia ina ia le atoa le lima tausaga o lo’u atuatuvale, e pei o le taimi ua tuanai.
E toatolu le ma fanau ma lo’u toalua, e toalua tama ma le teine, o e ua faamanuiaina i maua ia latou fanau e toa 13. O le iloaina o le faanoanoa na ou feagai ai, sa faatulagaina e la’u tama teine le aiga mo se aso o le anapogi ma tatalo. Sa mananao ia fanau uma a le ma fanau, e i le vaitausaga o le 1 i le 10, e tatalo mo Tinamatua, ao o le toatolu ua uma ona papatiso sa mananao e anapopogi. O se faamafanafanaga le iloa ai o le a anapopogi ma tatalo lo’u toalua, fanau, ma a latou fanau mo a’u.
O le aso na sosoo ai ina ua ou ala ae mai se malologa, sa foliga mai ua le malosi tele le lagona o le atuatuvale. O le aso na sosoo ai sa atili ona siitia ese atu. E oo atu i le aso lona lima ua siitia ese atu atoa. I lena afiafi, ao ou mafaufau i le auala na tupu ai lenei vavega, na pai mai se leo i lo’u agaga ma sa fai mai ia te au, “Sa ou lagonaina le fanau.” Sa lagonaina e le Tama Faalelagi i latou i lo latou mama ma sa tali mai a latou tatalo o le lotomaualalo, faatuatua, ma le alofa.
Na aoao mai le Faaola:
“A le liua outou ma avea ia pei o tama iti, tou te le sao lava i le malo o le lagi.
“O lenei o sē faamaulalo o ia ia te ia e pei o le tamaitiiti nei, e sili lea i le malo o le lagi” (Mataio 18:3–4).
Na ou fetusiai ma fanau a la’u fanau ma faafetai atu ia te i latou mo le anapogi ma tatalo mo a’u. Sa ou tau atu ia i latou lou alofa ia i latou. Sa ou fai atu ia te i latou na faafofoga le Tama Faalelagi ia i latou ma tali mai a latou tatalo.
A o tuputupu ae fanau a la’u fanau i le talalelei, ou te faamoemoe o le a latou manatua le taimi na fai mai ai le Tama Faalelagi i lo latou tinamatua, “Sa ou lagonaina le fanau.” Ma ou te faamoemoe o le a faamalosia e lena aafiaga a latou molimau ma fesoasoani ia i latou e tumau malosi i le talalelei.
Sa mananao ia fanau uma a le ma fanau, e i le vaitausaga o le 1 i le 10, e tatalo mo Tinamatua, ao o le toatolu ua uma ona papatiso sa mananao e anapopogi.