Beku n te Ekaretia
Ko rabwa, te Tari Jay
E maeka te tia korokaraki i Nevada, USA.
I rangi ni kakaitau ibukin te tamnei, te mwioko, te katauraoi, ao aia tangira taan mwakuri aika a ingainga aika a aki kona ni warekaki mwaitiia ni kabuta te Ekaretia.
“Ningabong bon te Tabati,” I tuanga natiu te aine ae nimaua ana ririki ngke e inimaki iaon rangau. E kaoti momoaangarena iaon moana ni kabuta.
“O, e tamaroa,” e taku. “Ngkanne N nang n noora te Tari Jay.”
E kaonaki nanou ma te kakaitau. I rangi n namakina te kakaitau ibukin te tia reirei n te Moanrinan ae tangira, are e a tia ni kabebetea bitakira nakon te uoote ae boou imwiin mwaingira. Kitanan mweengara i Nukanmaeaon mwakoron te U.S. ao ni mwaing n nako 1,350 te maire (2,173 kiromita) te raroa e a riki bwa te karawawata ibukin te utu ae bwanin ma ai moararariki ibukin ara ataei ae e reirei n aia reirei ataei ae, Season. Bon te ataeinaine ae mamamaa, e maakui aro aika boou ao man maaku ibukin irakin te taromauri n ara moan wiiki n te uoote a boou.
Tari Jay, te mwaane ae maam, e bane nanona n ana mwakuri, arona ni mamanikangare ae tau ao te tangira n tokanikai ni karekea onimakinana iroun Season. N te moan Tabati anne e kabaraaka nukana, e taua baina, n tarai matana, ao e taku, “Nakomai, mamatennanou. Ko na kukurei inanon ara kiraati.”
Ngkai e a nako te wiiki, Nei Season e a rangi ni kariaria rokon te Tabati nakon bongin te wiiki ake tabeua. N te tai are ti roko n te taromauri, e tarataraia taan taromauri ni kakaea ana tia reirei. E na bae ni moangare n ana tai ni kamauri.
Rinanon te ririki te Tari Jay e uringiia ana ataei n tatabemaniia ma bwaintangira aika uarereke ibukin motirawan te reirei ao bonginibung. Ngke e a kaan roko ana bonginibung Season, te kabanea n aomata ae kakawaki bwa te irua ae tangiria ni kaoa nakon ana bwatei bon te Tari Jay.
E kona n iai ana iango bwa mwaitira ana anainano are e a tia ni karikia inanon maiun ara ataeinaine ae uarereke? E na kona ni katautaua bwa mwaitira ana taeka ao ana mwakuri are a riki bwa aia koaua kurubu n ataei n te Moanrinan aika nimaua aia ririki? E kona n ataia bwa mwaitira nanon anne nakoiu, n aron te tina, are e a riki ngaia bwa mwakoron maiun natiu te aine?
Imwiina, Season e a kakeerakeaki nakon ana kiraati te Tari Edward, ao ana mwakuri aika a tamaroa inanon te Moanrinan a reitinako. Ai kakaitaura ngai ibukin aia tararua ao aia kekeiaki ae moan baan te tamaroa mwaane ao aine ake a tia ni karaoa ai anainano ae moan tamaroa n te maiu n tamnei iaon maiun Season.
Ara utu ni kabane a tia ni kakabwaiaaki irouia aomata aika a bane nanoia n aia mwakuri ake a tia ni mwakuri ibukira iaon kawaira n rikirakera n te maiu n tamnei. I uringa te tia kairiiri n te Tikauti ae rangi n rianako tamaroana, te tia anga taeka n reirei n te kooram n ibonga ae taotaonakinnano n te tai ae maan, te tia reirei n te Tieminari ae taotaonakinnano, te beretitentii n te Bootaki n Ataeinaine ae rianako, ao te bitiobi ae tararua raoi.
N aron ara utu ngkai a tia ni kakabwaiaaki, I ataia bwa ti aki onoti. A rawata aomata aika ai aron “Te Tari Jay”, ibukina bwa a bati taari ao titita ake aia mwakuri a tia n riinga maiuia utu n ai aron ara utu. Ai kakaitaura ngaira ibukin tamneia, mwiokoaia, katauraoaia, ao aia tangira.
Kam rabwa nakoia taan mwakuri aika ingainga man aki kona ni warekaki ni kabuta te Ekaretia ake a tia n ibuobuoki nakon ara utu.
Tekeraoi te Koro n Ririki!
Rawetamnei iroun Nikolai Sorokin/Hemera/Thinkstock