Mensahe iti Visiting Teaching, Hulio 2014
Ti Nadiosan a Mision ni Jesucristo: Mangibabaet
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati • Pamilia • Tulong
Ni Jesucristo ti Mangibabaet kadatayo iti Ama. The balikas a mangibabaet ket nagtaud iti Latin a kayatna a sawen ti “maysa a mangipakpakaasi para iti sabali.”1 Ipakpakaasinatayo ti Apo, nga us-usarenna ti pannakaawat, hustisia, ken kaasi. Iti pannakaammo iti daytoy ket mangpunno kadatayo iti ayat ken panagyaman para iti Pannubbotna.
“Dumngegka ken ni [Jesucristo] nga isu ti mangibabaet iti Ama, a mangipakpakaasi para kenka iti sangona—
“Kunkunana: Ama, kitaem ti panagrigrigat ken ipapatayna a saan a nagbasol, iti nakaay-aywam unay; kitaem ti dara ti Anakmo a nagsayasay, ti dara nga intedmo tapno maidaydayawka;
“Gapuna, Ama, ispalem dagitoy kabsatko a mamati iti naganko, tapno umasidegda kaniak ken maaddaanda iti awan inggana a biag” (DkK 45:3–5).
Maipapan ken ni Cristo kas Mangibabaet kadatayo, kinuna ni Elder D. Todd Christofferson ti Korum dagiti Sangapulo-ket-dua nga Apostol: “Napateg unay kaniak, nga iti ania man a kanito ken iti ania man a kasasaad maasitgak babaen ti kararag ti trono ti grasia, tapno mangngegan koma ti Nailangitan nga Amak ti ararawko, tapno ipakaasi ti Mangibabaetko ti dawatko, isu nga awan basolna, isu a naibuyat ti darana.”2
Manipud kadagiti Nasantuan a Kasuratan
Mosiah 15:8–9; Moroni 7:28; Doktrina ken Katulagan 29:5; 110:4
Manipud iti Pakasaritaantayo
Iti unos ti pakasaritaan ti Simbaan ti Apo, sinuroten dagiti babbai a disipulo ni Jesucristo ti pagwadanna. Napudno ken natured a mangibabaet ni Ester. Impatulodan ti kasinsinna a ni Mardokeo iti kopia ti paulog ti ari a nasken a madadael dagiti Judio, ket binilinna isuna nga agkiddaw iti sanguanan [ti ari] para iti ilina.” Innayonna: “Ket asino ti makaammo a sika dika mayeg iti pagarian a maipaay iti kasta a tiempo a kas itoy?” (Ester 4:8, 14.)
Iti baet ti peggad ti panagbalinna a mangibabaet para kadagiti taona, inyanamong ni Ester: “Sumrekakto agingga iti ari, nga uray saan a mayalubog iti linteg: ken no mapukawak, mapukawak” (Ester 4:16).
Sipapakumbaba a kinasarita ni Ester ti ari ket “nagpasag kadagiti saksakana, ket gimmawawa kenkuana a binuyog dagiti lulua … a sinuratanna … a pangdadael kadagiti Judio.” Innayonna, “Kasano ti pannakaibturko a mangkita ti pannakarba ti kabagiak?” (kitaen iti Ester 8:3, 5–6). Limmukneng ti puso ti ari, ket pinatganna ti kiddawna.3
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, July 2014. Ilokano. 10867 864
Panunoten Daytoy
Kasano a maparegtanatayo ti panangibabaet ni Jesucristo tapno mangngaasi ken mangpakawantayo kadagiti dadduma?