Na Matamata kei na Sala
Na cakacaka vakalotu kei na veiyalayalati ni matabete e biuti keda ki na sala ni bula tawamudu ka vakalougatataki keda ena igu eda gadreva ena gauna sara ga oqo.
Eda vakasaqara taucoko na bula tawamudu, ka kena ibalebale na vakabulai kei na vakacerecerei ena ivakatagedegede duadua e cake ni matanitu silesitieli, ka da na rawa ni laki bula kina ena iserau ni Tamada Vakalomalagi vakamatavuvale.
Me ikuri ni vakabauti o Jisu Karisito kei na veivutuni, na cakacaka vakalotu kei na veiyalayalati ni matabete e vakatarai keda meda curuma na sala ka na basika ki na bula tawamudu. Veitalia se gauna cava o butuka kina na sala oqo se vanua cava ena tolonisala o tu kina—se o a sucu ena loma ni Lotu se o qai saumaki mai kina e muri, se o bulabula tu ga vakalotu ena nomu bula taucoko se o se qai lesu tale tiko mai ki na Lotu—ena rawa ni o toso tikoga ena sala oqori ni o vakanamata tikoga ena nomu veiyalayalati kei na veika e rawa ni o cakava mo ciqoma kina ka maroroya.
Ka sa bibi me da kila ni cakacaka vakalotu ni matabete kei na veiyalayalati e sega ni yalataka walega na veisiga ni mataka lagilagi. Era solia talega vei keda na igu, na vakacegu, kei na veitokoni eda gadreva ena gauna sara ga oqo me rawa kina ni da muria na sala ka vosota ki na ivakataotioti ena buladodonu.