Muria na Parofita
Mai na dua na vosa ena lotu ni Church Educational System ena Brigham Young University–Idaho ena ika 5 ni Me, 2013. Me baleta na kena taucoko, rai ki na lds.org/broadcasts.
Ni da vakamuri Peresitedi Monson ka saga meda vakataki koya cake, ena yaco vakaidina meda tisaipeli yalodina cake ni Turaga o Jisu Karisito.
Ena vica na yabaki sa oti, ni bera na koniferedi raraba, a vakavulica o Peresitedi Thomas S. Monson e dua na lesoni totoka. A yaco oqo ena nodra soqoni vata mai na Vakaitutu Raraba era a gole yani ki Salt Lake City, Utah, ka vuqa vei ira era tadu mai na veivanua e vuravura taucoko mai na nodra ilesilesi ena Mataveiliutaki ni iWasewase. Keimami a yaco mai me keimami vakasalataki mai vei iratou na Mataveiliutaki Taumada kei ira na iApositolo Le Tinikarua.
Ni sa yaco mai na gauna ni soqoni, sa vaka me keimami tiko taucoko vakavo ga o Peresitedi Monson. Ni vo e vica na miniti me tekivu na soqoni, ka oti na neimami lululu wavoki ka dabe sobu vakamalua ka vakarorogo ki na sere ivakatagi veikidavaki, ka namaka me sa na yaco mai ena gauna o ya na parofita.
Keimami sa wawa tikoga me yacova ni sa 9:00 na kaloko ka sivi yani. E dua sa gole sara yani i tuba ena katuba vakatikitiki—me laurai ke gadrevi e dua na veivuke. Ni sa lesu mai, a kaya sara, “Ena tomani kemuni wale tikoga oqo o Peresitedi Monson.”
Ni oti toka e 15 na miniti, sa curu mai o Peresitedi Monson. Ena veidokai, keimami a tucake ni sa curu mai. Keimami raici koya ena yalo marau ka taleitaka ni bulabula vinaka. E sega ni kilai na vuna a yaco bera mai kina o koya.
A gole sara yani vakadodonu o Peresitedi Monson ki na itutu ni vunau ka kaya, “Kemuni na veitacini, ni vosoti au niu bera mai, a gadrevi au o watiqu ena mataka nikua.”
A vakauqeti au vakabibi kau yalomalumalumu, kau sega ni tarova na noqu vakasamataka tiko na ka a kaya.
Oqo e dua na soqoni bibi sara. Era sa mai soqoni vata oqo o ira na iliuliu levu taucoko ni Lotu, ia a mai ivakaraitaki vei keimami taucoko o Peresitedi Monson. A gadrevi koya o watina, ka taura kina o koya e dua na gauna me kauwaitaki watina kina. Sa qai dua na vunau cecere. Au sega ni nanuma rawa e dua tale na vosa ena siga o ya, ia au nanuma ga na vunau o ya: “E gadrevi au o watiqu.”
Vakamuria na iVakaraitaki nei Parofita
Au gadreva meu vakatura e lima na sala eda rawa ni vakamuria kina na ivakaraitaki nei Peresitedi Monson.
1. Eda rawa ni vakanananu vakadodonu, ka da rawa ni bula marau.
Ena Mataniciva Talei, a vakamacalataka na Parofita Josefa Simici na nona “itovo mamarau” (Josefa Simici—Ai Tukutuku 1:28). E tukuni ni dau “itovo mamarau” talega o Peresitedi Monson.
Ena dua na gauna a kaya o Peresitedi Monson: “Sa rawa … meda digitaka na vakanananu dodonu. Eda sega ni rawa meda lewa na cagi, ia eda rawa ga ni moica na laca. Sa kena ibalebale, eda rawa ni digitaka meda marau ka vakanananu dodonu, se cava ga e yaco mai ena noda ilakolako.1
Ena dua na siga au a wawa tiko ena tautuba ni rumu ni bose ni Mataveiliutaki Taumada. Au a sureti e kea meu laki vakaitavi ena dua na bose ni kena veivosakitaki na cakacaka ni valetabu. Au a dabe duadua tiko e tautuba ni rumu. Au nanuma ni ratou sa tekivu bose tiko na Mataveiliutaki Taumada kau na sureti meu tomani iratou ni oti e vica na miniti.
Niu dabe toka, au rogoca sara na nona vakalukalu mai e dua ena olo. Au nanuma sara, “Qo e dua beka e sega ni kila na ivakarau ni itovo eke. Ko na sega ni lako voli eke mo qai vakalukalu ena yasani valenivolavola ni Peresitedi ni Lotu.”
Ni oti vakalailai sa yaco mai ena kona o koya a vakalukalu tiko—o Peresitedi Monson. E mamarau, ka vakanananu dodonu. A vakabula vakavinaka mai vei au ka kaya, “Au vakabauta ni na tekivu na bose ena vica na miniti mai oqo.”
E dina ga ni colata tu na bibi taucoko ni Lotu, e vakaraitaka ni bula marau ka sa dau vakanananu dodonu tu ga. E dodonu meda vaka o ya.
2. Sa rawa meda yalovinaka ka daulomani ira na gone.
O Jisu e dau cavuti ira wasoma na gonelalai. Na Nona parofita, o Peresitedi Monson, e dau cavuti ira wasoma talega na gonelalai. Au sa raica, vakabibi na vakatabui ni valetabu, ni dau taleitaki ira na gonelalai, kei na nona ivakaraitaki, ka vakavulica vei keda na sala meda lomani ira kina na gonelalai. Ena veivakatabui yadua ni valetabu e dau vakanamata vei ira na gonelalai. E taleitaka me dau vakaitavitaki ira na gone ena soqo ni vakasobuduru ka dau sureta e vica mera sova na simede ena duru me ivakatakilakila ni sa vakacavari na valetabu. E dau vakamarautaki ira kina. E dau cakava me nodra ivakananumi. E dau matadredredre vakalevu vei ira. E dau vakayaloqaqataka ka vakacaucautaki ira. Sa ka totoka meda raica oqo.
Na nona veikidavaki loloma e oka kina na vakasota liga, yavalata na daligana, kei na veivakayaloqaqataki ni kaulotu kei na vakamau e valetabu.
Ena vica na yabaki sa oti sa vakarau tu o Peresitedi Monson me laki vakatabuya na Valetabu e Oquirrh Mountain Utah ena nona siganisucu. Ni sa yaco yani ki valetabu ka butu yani ena katuba e liu ni valetabu, era sa soqoni vata tu mai e dua na ilawalawa ni itabagone. Era sa kila vinaka tiko ni siganisucu nei Peresitedi Monson ka ra tekivu mera lagata vua na “Happy Birthday.” A tu vakadua ka rai yani vei ira ena matadredredre totoka. Sa tekivu me yaloyalo vei ira me vaka sa liutaki ira tiko ena lagasere. Ena kena icavacava era a kuria ena “Me qai vakavuqa sara.” A kaya vei au, “O ya na tikina taleitaki duadua vei au.”
Era taleitaki koya na gonelalai kei ira na itabagone ena Lotu, ka ra sega ni vakatitiqa ni lomani ira talega o koya!
3. Sa rawa meda vakamuria na veivakauqeti ni Yalotabu.
E kaya kina vakamatata o Peresitedi Monson na nona dina tiko vua na Turaga kei na nona yalodina me vakamuria na veivakauqeti ni Yalotabu ena malanivosa oqo: “Na ka kamikamica ki na noqu bula o ya meu vakila na veivakauqeti vakayalo ka cakava sara kau qai kila e muri ni o ya e na vakavotukana ni nona masu e dua se nona gagadre e dua. Kau dau vinakata tu ga me kila na Turaga ni ke gadreva me talai au, ena cici o Tom Monson ena veitalai o ya.”2
Oqori e dua na ivakarau eda na gadreva yadua meda vakamuria.
4. Sa rawa meda taleitaka na valetabu.
Ena volai ena itukutuku ni veigauna o Peresitedi Monson ni sa dua vei ira na dautara valetabu cecere ena itukutuku ni Lotu. Vakatekivu mai na nona sa Peresitedi ni Lotu ena Feperueri 2008, sa tomana tikoga mai na cakacaka levu ni tara valetabu. Ena loma ni ono na yabaki sa parofita kina, a vakaraitaka kina o Peresitedi Monson na ituvatuva mera tara e 33 na valetabu vou.
E kaya o Peresitedi Monson, “Meda bula kilikili yadudua. Liga savasava ka yalo savasava, me rawa ni tara noda bula kei na noda matavuvale na valetabu.”3
A solia talega mai na iyalayala totoka oqo “Ni da taleitaka na valetabu, ka tara na valetabu, ka curuma na valetabu, ena laurai e noda bula na noda vakabauta. Ni da tadu mai ki na vale savasava oqo ni Kalou, ka nanuma tiko na veiyalayalati eda vakayacora kina, eda sa na rawa ni vorata rawa na veivakatovolei ka valuta rawa na veitemaki yadua.”4
Meda sa qai muria na nona ivakarau na parofita sa tuvanaka vei keda ena kena taleitaki na valetabu.
5. Sa rawa meda lomavinaka, veikauwaitaki, ka dauloloma.
E vakaraitaki totoka o Peresitedi Monson ni nodra lomani na tamata. Na nona ilesilesi vakalotu e vakasinaiti tu ena nodra sikovi na itikotiko; tabaka na buradeladra na tamata ka masulaki ira; qiri sega ni namaki me veivakacegui ka veivakayaloqaqataki; vakau ivola ni veivakayaloqaqataki, vakavinavinaka, kei na vakacaucau; veisiko e valenibula kei na itikotiko ni vakaloloma; ka tiko ena soqo ni veibulu kei na reguregu se cava sara na nona osooso.
Me vaka ga e dau vakayacora na iVakabula, sa dau veilakoyaki o Thomas Monson ena caka vinaka (raica na Cakacaka 10:38) ka vakalougatataka ka lomani ira na tamata; ka sa ikoya oqo na kaukauwa veimuataki ki na nona bula.
E dua na ivakaraitaki cecere ni loloma nei Peresitedi Monson a yaco ena 2012. Ni sa vakarau tara oti na Valetabu totoka e Brigham City Utah, au a laki veivosaki vata kei iratou na Mataveiliutaki Taumada me tuvanaki na kena vakatabui. Me vaka ga ni dua na auwa o Brigham City ena vualiku kei Salt Lake City, ena rawarawa sara vei Peresitedi Monson me gole e kea me laki vakatabuya.
Ia, a mani kaya o Peresitedi Monson, “O Brigham City na itikotiko nei Peresitedi Boyd K. Packer, oqo na iApositolo cecere sa mai tomani au tu ena vica vata na yabaki ena Le Tinikarua. Au vinakata me nona na dokai kei na kalougata me laki vakatabuya na valetabu ni nona itikotiko oqo. Au na sega ni tiko kina, kau na lesi Peresitedi Packer me na laki vakatabuya na Valetabu e Brigham City. Au vinakata me nona siga o ya.”
Sa dua dina na siga totoka vei Peresitedi Packer vakakina vei Sister Packer, ka rau a tubu cake talega mai Brigham City. E veivakayavalati dina na yalovinaka kei na lomasoli cecere nei Peresitedi Monson vua na nona itokani iApositolo. Eda sa rawa ni vaka o ya. Eda sa rawa ni veiwasei ka yalovinaka ka daunanumi ira vakalevu era tiko voliti keda.
Na Nona iVakarau E Dua na Parofita
Sa vakavulica vei keda o Peresitedi Monson na sala meda bulataka kina na noda bula mai na nona vosa totoka ka veivakauqeti ena koniferedi raraba. Sa vakavulica vei keda na sala meda tisaipeli kina i Jisu Karisito mai na nona ivakaraitaki vakaikoya e cecere ka totoka. Sa dina sara ni sa solia vei keda na Turaga na ivakarau ni veika kecega, ka dua vei ira na ivakarau meda na vakasaqara meda muria sai koya mai vua na noda parofita lomani.
Au vakadinadinataka ni bula tiko e dua na Kalou mai lomalagi e kilai keda ka lomani keda. Sa solia mai o Koya e dua na parofita—me dusimaki keda, me vakavulici keda, ka liutaki keda ena siga edaidai. Au vakabauta ni sa namaka tiko na Turaga meda lomana na parofita, meda tokoni koya, ka muria na nona ivakaraitaki.
Au vakatoka me dua na veivakalougatataki cecere na noda mai bula tiko ena siga sa parofita tiko ni Turaga o Thomas S. Monson. Ni da mai muri koya ka saga meda vakataki koya cake, eda na rawata vakaidina meda tisaipeli yalodina cake ni Turaga o Jisu Karisito.